ທ່ານນາງ ພັນລະນີ ຄຳຜຸຍ ຮອງປະທານສະມາຄົມນັກທຸລະກິດໜຸ່ມ ປະທານອຳນວຍການບໍລິສັດ Champa Market ແລະ Champa Nusantara Trading ໄດ້ໃຫ້ສຳພາດວ່າ: ກ່ຽວກັບທ່າແຮງ ແລະ ໂອກາດທາງການຄ້າລາວ ກັບ ປະເທດອິນໂດເນເຊຍ ຊຶ່ງຖືເປັນຕະຫຼາດທີ່ມີທ່າແຮງຫຼາຍທີ່ສຸດແຫ່ງໜຶ່ງໃນພາກພື້ນ. ຜູ້ຊື້ຈາກອິນໂດເນເຊຍມີຄວາມຕ້ອງການຫຼາຍທີ່ຈະຊື້ສິນຄ້າຈາກລາວ ໂດຍສະເພາະ ທັນຍະພືດ, ສິນຄ້າກະສິກຳທີ່ນຳມາແປຮູບຕ່າງໆ ແລະ ສິນຄ້າທີ່ເປັນອໍການິກ, ນອກຈາກທັນຍະພືດ ແລະ ສິນຄ້າກະສິກຳແລ້ວ, ຍັງມີໂອກາດຢູ່ໃນຂະແໜງສຸຂະພາບ, ເຄື່ອງເພັດ ເຄື່ອງປະດັບ ແລະ ຂະ ແໜງການຕົບແຕ່ງພາຍໃນ ແລະ ໃນຖານະຜູ້ສົ່ງເສີມສິນຄ້າລາວ ຂໍແນະນຳສຳລັບຜູ້ປະກອບການຄົນລາວທີ່ຢາກເຂົ້າສູ່ຕະຫຼາດສາກົນ. ປັດໄຈທຳອິດທີ່ສຳຄັນທີ່ສຸດແມ່ນການຫຸ້ມຫໍ່. "ການຈະໃຫ້ສິນຄ້າລາວອອກໄປຕ່າງປະເທດໄດ້ ຫຼື ຢູ່ຕະຫຼາດພາຍໃນກໍຕາມຜູ້ຜະລິດສິນຄ້າຕ້ອງເອົາໃຈໃສ່ໃນການຫຸ້ມຫໍ່ ເພາະເປັນສິ່ງທຳອິດທີ່ຜູ້ຊື້ຈະເຫັນ ແລະ ການສ້າງຍີ່ຫໍ້ກໍມີຄວາມແຂງແຮງບໍ່ແມ່ນພຽງແຕ່ການອອກແບບໂລໂກ້, ແຕ່ເປັນການສ້າງເລື່ອງເລົ່າທີ່ເຊື່ອມໂຍງກັບລູກຄ້າໄດ້.
ທ່ານນາງ ພັນລະນີ ຄຳຜຸຍ ໃຫ້ຮູ້ຕື່ມວ່າ: ຝາກເຖິງເພື່ອນນັກທຸລະກິດ ແລະ ຜູ້ປະກອບການລາວ ຜູ້ທີ່ຜະລິດສິນຄ້າລາວ ໃຫ້ມີຄວາມກະຕືລືລົ້ນໃນການພັດທະນາສິນຄ້າແບບມືອາຊີບ, ເພາະຕະຫຼາດພາຍນອກ ບໍ່ສະເພາະແຕ່ອິນໂດເນເຊຍນັ້ນກວ້າງໃຫຍ່ ແລະ ຍັງເປີດຮັບສິນຄ້າລາວເປັນຈຳນວນຫຼວງຫຼາຍ ແລະ ສິນຄ້າລາວທີ່ອິນໂດເນເຊຍສົນໃຈນັ້ນກໍຄືຄວາມເປັນທຳມະຊາດ ແລະ ຄຸນະພາບອໍການິກ. ປັດຈຸບັນບໍລິສັດ Champa Market ມີຄວາມຕັ້ງໃຈໃນການສົ່ງເສີມສິນຄ້າກະສິກຳພາຍໃນ ໂດຍການນຳໃຊ້ຕະຫຼາດ ໃໝ່ ຫຼື ຕະຫຼາດອອນລາຍເຂົ້າມາເພື່ອຊ່ວຍຮອງຮັບສິນຄ້າຈາກຊາວກະສິກອນຫຼາຍຂຶ້ນ.
ສໍາລັບສິນຄ້າຄຸນນະພາບສູງ ໄດ້ມາດຕະຖານສາກົນຫຼາຍຢ່າງ ແລະ ລາຄາສົມເຫດສົມຜົນ, ທີ່ບໍລິສັດອິນໂດເນເຊຍນຳເຂົ້າສິນຄ້າທີ່ມາວາງຂາຍໃນລາວເຊັ່ນ: ນໍ້າໝາກໄມ້ແບບຕ່າງໆ, ໂຢເກີດທີ່ມີຄຸນນະພາບສູງ, Indo Mee ທີ່ຄົນລາວຫຼາຍຄົນຄຸ້ນເຄີຍ, ນໍ້າກະທິທີ່ໃຊ້ໃນການປຸງອາຫານ, ໂລຊັ່ນກັນຍຸງ, ນໍ້າຢາທຳຄວາມສະອາດ ແລະ ຜະລິດຕະພັນຮັກສາຄວາມສະອາດຕ່າງໆ ກຳລັງວາງຂາຍຢູ່ຕາມຮ້ານມິນິມາດ ແລະ ຮ້ານຊັບພະສິນຄ້າຊັ້ນນຳທົ່ວປະເທດ ເຊັ່ນ Sokxay, Xokthavy, Rimping, Bestco ແລະ ອື່ນໆອີກ. ການຕອບຮັບ "ຜູ້ບໍລິໂພກຊາວລາວ ແລະ ຕ່າງປະເທດທີ່ອາໄສໃນລາວ ສິນຄ້າອິນໂດເນເຊຍດີຫຼາຍ ໂດຍສະເພາະປະເພດ ນົມ ແລະ ໂຢເກິດ ທີ່ມີລາຄາເໝາະສົມແຕ່ຄຸນນະພາບດີ ນີ້ເປັນສັນຍານທີ່ດີສຳລັບການຂະຫຍາຍສາຍຜະລິດຕະພັນໃນອະນາຄົດ.
ຄໍາເຫັນ