ການເຄື່ອນທັບທາງໄກຂອງກອງທັບແດງຈີນ

ຕໍ່ເຫດການປະຫວັດສາດອັນຍິ່ງໃຫຍ່ໃນຄັ້ງນີ້, ຄົນຮຸ່ນໃໝ່ ຕ້ອງໄດ້ຮຽນຮູ້ ແລະ ເຂົ້າ ໃຈຢ່າງເລິກເຊິ່ງ ຕໍ່ນ້ຳໃຈເສຍ ສະຫຼະອັນສູງສົ່ງຂອງກອງທັບແດງຈີນ ເພື່ອໃຫ້ໄດ້ມາຊຶ່ງຄວາມເປັນເອກະລາດແຫ່ງຊາດ, ອຳນາດອະທິປະໄຕຂອງປະຊົນຢ່າງແທ້ຈິງ.

ກອງທັບແດງ ໄດ້ເຄື່ອນທັບຈາກພາກໃຕ້ຂຶ້ນສູ່ພາກເໜືອຂອງຈີນ ດ້ວຍໄລຍະທາງ 12,500 ກິໂລແມັດ ໃຊ້ເວລາຫຼາຍປີ. ຕະຫຼອດໄລຍະຂອງການເດີນທາງ ແມ່ນລະອິດລະອ້ຽວຫຍຸ້ງຍາກລຳບາກຫຼາຍ. ຜ່ານທົ່ງພຽງ, ພູເຂົາ ແລະ ຫ້ວຍນ້ຳລຳເຊ ບໍ່ຈັກວ່າເທົ່າໃດ, ຊ້ຳຍັງຖືກກອງທະຫານຂອງຝ່າຍສັດຕູ ທີ່ມີກຳລັງອັນຫຼວງຫຼາຍ ໄລ່ຕິດຕາມຢ່າງຕໍ່ເນື່ອງ ຊຶ່ງໄດ້ມີການປະທະ ແລະ ຕໍ່ສູ້ກັນຕະຫຼອດໄລຍະຂອງການເດີນທາງ. ແຕ່ກອງທັບແດງ ກໍບໍ່ໄດ້ຫວັ່ນໄຫວຕໍ່ອຸປະສັກນາໆປະການ, ທັງເຄື່ອນທັບ ທັງຕໍ່ສູ້ກັບສັດຕູ ເພື່ອບັນລຸຈຸດໝາຍ ແລະ ອຸດົມການຂອງພັກ ທີ່ໄດ້ກຳນົດໄວ້.

ຍ້ອນການຊີ້ນຳ-ນຳພາ ອັນປີຊາສາມາດ ແລະ ສະຫຼາດສ່ອງໃສຂອງພັກກອມມູນິດຈີນບວກກັບທາດແທ້ປະຕິວັດອັນອົງອາດກ້າຫານຂອງກອງທັບແດງ, ຈຶ່ງເຮັດໃຫ້ການເຄື່ອນທັບບັນລຸຈຸດໝາຍປາຍທາງ ຢ່າງເດັດຂາດມີໄຊ. ຈາກນັ້ນ, ພັກ ກໍໄດ້ສືບຕໍ່ນຳພາພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ປັດຈຸບັນນີ້, ປະເທດຈີນ ແມ່ນໄດ້ມີການພັດທະນາຢ່າງຮອບດ້ານ ແລະ ກ້າວກະ ໂດດ, ອັນໄດ້ເຮັດໃຫ້ ສປ ຈີນ ມີບົດບາດອັນສູງສົ່ງ ໃນເວທີພາກພື້ນ ແລະ ສາກົນ. ນັ້ນສະແດງໃຫ້ເຫັນເຖິງບົດບາດການນຳພາຂອງພັກ ບວກກັບກຳລັງແຮງແຫ່ງຄວາມມະຫາສາມັກຄີຂອງປວງຊົນທັງຊາດ, ໄດ້ພ້ອມກັນເປັນຈິດໜຶ່ງໃຈດຽວ ປະຕິບັດຕາມແນວທາງຂອງພັກ ໃນແຕ່ລະໄລຍະ ໃຫ້ປະກົດຜົນເປັນຈິງດັ່ງທຸກວັນນີ້. ຂ້າພະເຈົ້າ ມີຄວາມເຊື່ອໝັ້ນ ຢ່າງແຮງກ້າວ່າ: ສປ ຈີນ ຈະມີຄວາມເຕີບໃຫຍ່ຂະ ຫຍາຍຕົວ ແລະ ມີຄວາມເຂັ້ມ ແຂງຢ່າງຮອບດ້ານ ແລະ ກ້າວເດີນຕາມຈຸດໝາຍສັງຄົມນິຍົມ ຕາມວັດຖຸປະສົງຂອງພັກ ທີ່ໄດ້ກຳນົດໄວ້.

ເພື່ອສືບຕໍ່ເສີມຂະຫຍາຍສາຍພົວພັນອັນດີງາມ ທີ່ມີມາແຕ່ດົນນານ ແລະ ການສ້າງຄູ່ຮ່ວມຊາຕາກຳ ລາວ-ຈີນ ທີ່ບໍ່ມີອຸປະສັກໃດໆ ຈະມາກີດຂວາງໄດ້ນັ້ນ ພວກເຮົາ ຈະໄດ້ມີການຮ່ວມມືກັນໃນຫຼາຍດ້ານ ເພື່ອພ້ອມກັນກ້າວເດີນໄປຂ້າງໜ້າ ຕາມທິດຂະຫຍາຍຕົວ ໂດຍສະເພາະ ດ້ານການພັດທະນາຊົນນະບົດ, ແກ້ໄຂຄວາມທຸກຍາກຂອງປະຊາຊົນ ຊຶ່ງບັນຫານີ້ພັກ ແລະ ລັດຖະບານ ແຫ່ງ ສປປ ລາວ ໄດ້ຖືເປັນບັນຫາສຳຄັນ ເປັນບຸລິມະສິດ ໂດຍໄດ້ຍົກຂຶ້ນເປັນວາລະແຫ່ງຊາດ ແນໃສ່ປັບປຸງປົວແປງຊີວິດການເປັນຢູ່ຂອງປະຊາ ຊົນບັນດາເຜົ່າໃຫ້ດີຂຶ້ນເປັນ ກ້າວໆ, ເຮັດໃຫ້ປະເທດລາວ ຫຼຸດພົ້ນອອກຈາກຄວາມດ້ອຍພັດທະນາ.

ສະນັັ້ນ, ຜ່ານການມາເຄື່ອນໄຫວຢ້ຽມຢາມ ແລະ ເຮັດວຽກຂອງພວກຂ້າພະເຈົ້າ ໃນຄັ້ງນີ້, ເຫັນໄດ້ຢ່ງຈະແຈ້ງວ່າ: ຍ້ອນມີການນຳພາທີ່ສະຫຼາດສ່ອງໃສຂອງພັກກອມມູນິດຈີນ, ປະເທດຈີນ ຈຶ່ງໄດ້ຮັບການພັດທະນາຢ່າງບໍ່ຢຸດຢັ້ງ ແລະ ມີຄວາມຈະເລີນຮຸ່ງເຮືອງສີວິໄລ, ສັງຄົມມີຄວາມສະຫງົບ, ຍຸຕິທຳ, ປະຊາຊົນມີສິດເສລີພາບ ແລະ ມີເງື່ອນໄຂໃນການພັດ ທະນາຕົນເອງຢ່າງເຕັມສ່ວນ, ເຮັດໃຫ້ຊີວິດການເປັນຢູ່ຂອງປະຊາຊົນຈີນ ມີຄວາມອີ່ມໜຳສຳລານ.ຂ້າພະເຈົ້າ ຈະນຳເອົາບົດຮຽນອັນລ້ຳຄ່ານີ້ ແລະ ທີ່ຮັບຮູ້ໄດ້ໃນຄັ້ງນີ້, ປະກອບເຂົ້າໃນຫຼັກສູດການຮຽນ-ການສອນ ຂອງໂຮງຮຽນການເມືອງ ແລະ ການປົກຄອງແຂວງຫຼວງພະບາງ.

ຕໍ່ໜ້າສະພາບການຂອງໂລກ ແລະ ພາກພື້ນ ທີ່ມີການຜັນແປຢ່າງສັບສົນ ແລະ ຄາດເດົາໄດ້ຍາກຄືຊູ່ມື້ນີ້, ພວກເຮົາ ຍິ່ງຈະຕ້ອງໄດ້ເພີ່ມທະວີສາຍພົວພັນຮ່ວມມືມິດຕະພາບ ແລະ ຄວາມສາມັກຄີໃຫ້ໜັກແໜ້ນກວ່າເວລາໃດໝົດ. ພ້ອມດຽວກັນນີ້, ຂ້າພະເຈົ້າ ກໍມີຄວາມເຊື່ອໝັ້ນວ່າ: ຈະໄດ້ຮັບການສະໜັບສະໜູນອຸ້ມຊູຊ່ວຍເຫຼືອຈາກພັກ, ລັດ ແລະ ປະຊາຊົນຈີນອ້າຍນ້ອງ ຕໍ່ກັບວຽກງານດ້ານຕ່າງໆ ໃຫ້ ສປປ ລາວ ທີ່ເຫັນວ່າ: ຍັງມີຄວາມຫຍຸ້ງຍາກ ແລະເປັນອຸປະສັກ ໃນການສ້າງສາພັດທະນາປະເທດຊາດ.

ຂໍສະແດງຄວາມຂອບໃຈເປັນຢ່າງສູງຕໍ່ພັກ ແລະ ລັດຖະບານ ແຫ່ງ ສປ ຈີນ ທີ່ໄດ້ໃຫ້ໂອກາດ, ອຳນວຍຄວາມສະດວກທຸກປະການ ໃນການມາເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້ ຊຶ່ງບັນດາຄວາມຮູ້ ແລະ ປະສົບການທີ່ໄດ້ຮັບ, ຂ້າພະເຈົ້າ ຈະເອົາໄປໝູນໃຊ້ເຂົ້າໃນໜ້າທີ່ວຽກງານໃຫ້ເກີດປະໂຫຍດສູງສຸດ.

ອວຍພອນສາຍພົວພັນມິດຕະພາບ ລາວ-ຈີນ ຈົ່ງສວຍສົດງົດງາມ ແລະ ຍືນຍົງຊົ່ວກາລະນານ.