ສູນກາງຊາວໜຸ່ມລາວ ຊຸກຍູ້ການຮ່ວມມືດ້ານ AI ແລະ ການສຶກສາ ທີ່ຫວຽດນາມ

ການຢ້ຽມຢາມຄັ້ງນີ້, ແນໃສ່ສຶກສາ ແລກປ່ຽນບົດຮຽນດ້ານການຮຽນ-ການສອນ, ການຄົ້ນຄວ້າວິທະຍາສາດ, ການພັດທະນາຊັບພະຍາກອນມະນຸດຮຸ່ນໜຸ່ມ ແລະ ການນຳໃຊ້ເຕັກໂນໂລຊີທີ່ທັນສະໄໝ. ພິເສດ, ສອງຝ່າຍໄດ້ແລກປ່ຽນແນວ ທາງຊຸກຍູ້ການຮ່ວມມືທີ່ເປັນຮູບປະທຳໃນຫຼາຍດ້ານ ເປັນຕົ້ນ ການຈັດຫຼັກສູດຝຶກອົບຮົມໄລຍະສັ້ນດ້ານປັນຍາປະດິດ (AI) ແລະ ທັກສະດີຈີຕອນສຳລັບຄູຝຶກ; ການລິເລີ່ມໂຄງການທົດລອງຢູ່ສູນຝຶກວິຊາຊີບ 1-2 ແຫ່ງ; ການສົ່ງເສີມໂອກາດດ້ານທຶນການສຶກສາ ແລະ ການສ້າງ “ໂຄງການຄວາມຊົງຈຳການປະຕິວັດລາວ” ໃນຮູບແບບດີຈີຕອນ. ບັນດາແນວທາງດັ່ງກ່າວມຸ່ງເນັ້ນການນຳເອົາຄວາມຮູ້, ເຕັກໂນໂລຊີ ແລະ ປະສົບການທີ່ດີຂອງຫວຽດນາມ ມາປະຍຸກໃຊ້ໃນການພັດທະນາທັກສະ ແລະ ຍົກລະດັບຄຸນນະພາບຊາວໜຸ່ມລາວ ໃຫ້ສາມາດຕອບສະໜອງຄວາມຕ້ອງການຂອງຍຸກດີຈີຕອນ.

ໂອກາດດຽວກັນ, ສະຫາຍ ທອງລີ ສີສຸລິດ ຍັງໄດ້ພົບປະໂອ້ລົມ ແລະ ໃຫ້ການຊີ້ນຳຕໍ່ນັກສຶກສາລາວທີ່ກຳລັງສຶກສາຮ່ຳຮຽນຢູ່ ສສ ຫວຽດນາມ ໂດຍເນັ້ນໜັກ 4 ທິດຊີ້ນຳສຳຄັນຄື: ໜຶ່ງ ຕັ້ງໃຈສຶກສາຮ່ຳຮຽນ, ຄົ້ນຄວ້າຫາຄວາມຮູ້ ແລະ ຍາດແຍ່ງເອົາບົດຮຽນ, ປະສົບການ ແລະ ຄວາມກ້າວໜ້າທາງວິທະຍາສາດ-ເຕັກໂນໂລຊີຂອງຫວຽດນາມ ເພື່ອກັບຄືນໄປປະ ກອບສ່ວນພັດທະນາປະເທດຊາດ; ສອງ ປັບຕົວໃຫ້ເຂົ້າກັບສະພາບແວດລ້ອມ, ເຄົາລົບກົດໝາຍ, ລະບຽບການ ແລະ ຮີດ ຄອງປະເພນີອັນດີງາມຂອງປະເທດເຈົ້າພາບ ພ້ອມທັງຮັກສາຄຸນຄ່າ ແລະ ເອກະລັກອັນດີງາມຂອງຊາດລາວ; ສາມ ເສີມສ້າງຄວາມສາມັກຄີ, ຮັກແພງ ແລະ ຊ່ວຍເຫຼືອຊຶ່ງກັນ ແລະ ກັນ ທັງໃນໝູ່ນັກສຶກສາລາວ ແລະ ນັກສຶກສາຫວຽດນາມ ເພື່ອສ້າງສະພາບແວດລ້ອມການຮຽນຮູ້ທີ່ດີ ແລະ ອົບອຸ່ນ; ສີ່ ເປັນ “ນັກການທູດປະຊາຊົນ” ທີ່ດີ, ເປັນຂົວຕໍ່ແຫ່ງມິດຕະພາບ ແລະ ຄວາມເຂົ້າໃຈອັນດີລະຫວ່າງຊາວໜຸ່ມສອງຊາດ ປະກອບສ່ວນສືບທອດ ແລະ ເສີມສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫຸ້ນສ່ວນຍຸດທະສາດລາວ–ຫວຽດນາມ ໃຫ້ນັບມື້ນັບແໜ້ນແຟ້ນ ແລະ ຍືນຍົງ.

ການຢ້ຽມຢາມ ແລະ ພົບປະຄັ້ງນີ້, ເປັນອີກໜຶ່ງການເຄື່ອນໄຫວທີ່ສຳຄັນ ໃນການສົ່ງເສີມການຮ່ວມມືດ້ານການສຶກສາ, ວິທະຍາສາດ ແລະ ເຕັກໂນໂລຊີ ຄຽງຄູ່ກັບການປູກຝັງຈິດໃຈຮັກຊາດ ແລະ ຄວາມຮັບຜິດຊອບຂອງນັກສຶກສາລາວ ໃນການເປັນກຳລັງສຳຄັນຂອງການພັດທະນາປະເທດໃນອະນາຄົດ.