ລາວ-ຫວຽດນາມ ເພີ່ມທະວີການສ້າງບຸກຄະລາກອນວຽກງານສື່ມວນຊົນ

ໃນໂອກາດດັ່ງກ່າວ, ສະຫາຍ ຟ້າມ ມິງເຊິນ ໄດ້ລາຍງານໂດຍຫຍໍ້ກ່ຽວກັບໂຄງການຮ່ວມມື ບໍາລຸງສ້າງ ແລະ ຝຶກອົບຮົມໃຫ້ພະນັກງານສື່ມວນຊົນ ແລະ ໂຄສະນາ ຊຶ່ງສະຖາບັນດັ່ງກ່າວໄດ້ສ້າງຕັ້ງຂຶ້ນໃນປີ 1962, ມາຮອດປັດຈຸບັນແມ່ນມີອາຍຸ 63 ປີ ແລະ ໃນປີ 1992 ໄດ້ເປີດໃຫ້ນັກສຶກສາ ແລະ ພະນັກງານລາວມາສຶກຮໍ່າຮຽນ ໃນສະຖາບັນແຫ່ງນີ້, ຜ່ານມາສະຖາບັນດັ່ງກ່າວໄດ້ບຳລຸງສ້າງນັກສຶກສາ ແລະ ພະນັກງານລາວສຳເລັດແລ້ວ 700 ຄົນ, ໃນນັ້ນນັກສຶກສາ, ພະນັກງານລາວຍັງສືບຕໍ່ສຶກສາຮ່ໍາຮຽນຢູ່ສະຖາບັນແຫ່ງນີ້ຫຼາຍຫົວຂໍ້ວິຊາໃນນັ້ນລວມມີບຸກຄະລາກອນວຽກງານສື່ມວນຊົນລາວກໍໄດ້ສືບຕໍ່ຮຽນຢູ່ສະຖາບັນແຫ່ງນີ້ເຊັ່ນກັນ.

ໃນການພົບປະສອງຝ່າຍໄດ້ແລກປ່ຽນນຳກັນຫຼາຍບັນຫາ ໂດຍສະເພາະແມ່ນການສ້າງບຸກຄະລາກອນໃນໄລຍະຜ່ານແຕ່ປີ 2012-2019, ສະຖາບັນສື່ມວນຊົນ ແລະ ໂຄສະນາໄດ້ຮ່ວມືກັບສະຖາບັນ ສື່ມວນຊົນ, ວັດທະນາທຳ ແລະ ທ່ອງທ່ຽວ ສປປ ລາວ ຈັດຊຸດຝຶກອົບຮົມ 6 ຊຸດ, ມີນັກສຳມະນາກອນ ເຂົ້າຮ່ວມທັງໝົດຈຳນວນ 132 ຄົນ, ໃນຂະນະດຽວກັນຍ້ອນເກີດມີສະພາບໂຄວິດ-19 ຈຶ່ງເຮັດໃຫ້ການພົວພັນສອງສະຖາບັນບໍ່ໄດ້ດຳເນີນບັ້ນອົບຮົມໄລຍະໜຶ່ງ ແລະ ມາຮອດປີ 2023-2024 ຈຶ່ງໄດ້ຝຶກອົບຮົມຄືນໃໝ່ຈຳນວນ 2 ຊຸດ ຢູ່ຫວຽດນາມ, ຊຸດລະ 15 ຄົນ ແລະ ມາຮອດເດືອນ 10/2025 ຈຶ່ງໄດ້ດຳເນີນຊຸດອົບຮົມອີກ 1 ຊຸດມີຜູ້ເຂົ້າຮ່ວມ 15 ຄົນ ໂດຍແມ່ນສື່ມວນຊົນຈາກສູນກາງ ແລະ ທ້ອງຖິ່ນເຂົ້າຮ່ວມ.

ຝ່າຍຫວຽດນາມ ໄດ້ສະເໜີໃຫ້ນັກສຶກສາລາວເຂົ້າມາຮຽນຢູ່ສະຖາບັນແຫ່ງນີ້ໃຫ້ຫຼາຍກວ່າເກົ່າ ແລະ ໃຫ້ເຂົ້າຮຽນຫຼາຍຂະແໜງການເພາະຜ່ານມານັກສຶກສາລາວຮຽນແຕ່ 5-6 ຂະແໜງການເທົ່ານັ້ນ ແຕ່ສະຖາບັນດັ່ງກ່າວມີ 32 ຂະແໜງການ, ພ້ອມດຽວກັນນັ້ນຍັງສະເໜີໃຫ້ສ້າງຕັ້ງສະມາຄົມອະດີດນັກສຶກສາລາວທີ່ຮຽນຈົບຈາກສະຖາບັນແຫ່ງນີ້ອີດດ້ວຍ. ຝ່າຍລາວໄດ້ເຫັນດີເປັນເອກະພາບກັບການສະເໜີຂອງຝ່າຍຫວຽດນາມ ແລະ ຈະນໍາເອົາຄຳສະເໜີດັ່ງກ່າວໃຫ້ກະຊວງສຶກສາທິການ ແລະ ກິລາຊາບເພື່ອຄົ້ນຄວ້າ, ຄັດລືອກເອົານັກສຶກສາມາຮຽນໃຫ້ມີຫຼາຍຂະແໜງການຕື່ມໂດຍສະເພາະແມ່ນຂະແໜງ ການສື່ມວນຊົນສືບຕໍ່ເຊັນ MOU ນຳກັນເພື່ອສ້າງວຽກງານໂຄສະນາ ແລະ ສື່ມວນຊົນໃຫ້ມີຄຸນະພາບຍິ່ງຂຶ້ນ.

ໃນໂອກາດດັ່ງກ່າວ, ສະຫາຍ ນາງ ວິລະວອນ ພັນທະວົງ ໄດ້ສະແດງຄວາມຂອບໃຈ ຕໍ່ຫົວໜ້າ ສະຖາບັນສື່ມວນຊົນ ແລະ ໂຄສະນາທີ່ໄດ້ໃຫ້ການການຕ້ອນຮັບຢ່າງອົບອຸ່ນ ແລະ ໄດ້ລາຍງານໃຫ້ຝ່າຍ ຫວຽດນາມຮູ້ກ່ຽວກັບການໂອນວຽກງານສື່ມວນ ມາຂຶ້ນກັບຄະນະໂຄສະນາ ອົບຮົມສູນກາງພັກ ແລະ ໄດ້ຖືໂອກາດນີ້, ສະແດງຄວາມຂອບໃຈຕໍ່ສະຖາບັນທີ່ໄດ້ໃຫ້ການຊ່ວຍເຫຼືອບຳລຸງ, ກໍ່ສ້າງບຸກຄະລາກອນລາວ ຕະຫຼອດໄລຍະທີ່ຜ່ານມາ ຈົນເຖິງປັດຈຸບັນ, ໃນນັ້ນ ບຸກຄະລາກອນສື່ມວນຊົນລາວ ກໍໄດ້ຮັບທຶນການ ຊ່ວຍເຫຼືອບຳລຸງກໍ່ສ້າງ ແລະ ພັດທະນາຄວາມຮູ້, ຄວາມສາມາດແຕ່ລະໄລຍະ ຢູ່ສະຖາບັນດັ່ງກ່າວຫຼາຍ ຊຸດ, ທັງໄດ້ໄປຝຶກອົບຮົມໃຫ້ພະນັກງານຢູ່ລາວຕື່ມອີກ, ປັດຈຸບັນນີ້, ກໍມີພະນັກງານຈາກພາກສ່ວນອົງການສື່ມວນຊົນ ແລະ ພາກສ່ວນໂຄສະນາຢູ່ສູນກາງ ແລະ ທ້ອງຖິ່ນ ທີ່ກໍາລັງໄດ້ຮັບການບຳລຸງ, ໃນປັດຈຸບັນໄລຍະສອງເດືອນ. ສະນັ້ນ, ເພື່ອເປັນການສືບຕໍ່ຍົກລະດັບກໍ່ສ້າງບຸກຄະກອນລາວເປັນຕົ້ນໃນຂະແໜງການສື່ມວນຊົນລາວ, ຈົ່ງສືບຕໍ່ໃຫ້ການຮ່ວມມືຊ່ວຍເຫຼືອກໍ່ສ້າງບຸກຄະກອນລາວຕໍ່ໄປ, ຢ່າງເປັນລະບົບ ແລະ ຕໍ່ເນື່ອງເພື່ອເຮັດແນວໃດເຮັດໃຫ້ວຽກງານສື່ມວນຊົນລາວ ພັດທະນານັບດີຂຶ້ນເລື່ອຍໆ.

ໃນຕອນທ້າຍ, ສະຫາຍ ຟາມ ມີງເຊິນ ຍັງໄດ້ອວຍພອນໃຫ້ຄະນະຜູ້ແທນລາວ ຈົ່ງປະສົບຜົນ ສຳເລັດໃນການມາເຄື່ອນໄຫວຢ້ຽມຍາມ ແລະ ເຮັດວຽກ ຢູ່ ສສ ຫວຽດນາມ ໃນຄັ້ງນີ້ ອີກດ້ວຍ.

(ຂ່າວ-ພາບ: ສຳນານ)