ກອງປະຊຸມຜ່ານຮ່າງຄຳແນະນຳວ່າດ້ວຍການກວດສອບຫົວທີ ຂອງອົງການກວດສອບແຫ່ງລັດ

ກອງປະຊຸມປະກອບມີ ຜູ້ເຂົ້າຮ່ວມທີ່ມາຈາກອົງການກວດສອບປະຈໍາພາກເໜືອ 1; ອົງການກວດສອບປະຈໍາພາກເໜືອ 2; ອົງການກວດສອບປະຈໍາພາກກາງ 1; ອົງການກວດສອບປະຈໍາພາກກາງ 2; ອົງການກວດສອບປະຈໍາພາກໃຕ້ ແລະ ບັນດາກົມທີ່ຂຶ້ນກັບອົງການກວດສອບແຫ່ງລັດ ເຂົ້າຮ່ວມທັງໝົດ ຈໍານວນ 68 ທ່ານ.

ໃນກອງປະຊຸມ, ທ່ານປະທານກອງປະຊຸມໄດ້ມີຄໍາເຫັນຊີ້ນໍາ ແລະ ມີຄໍາຖາມເຈາະຈີ້ມເພື່ອໃຫ້ຜູ້ເຂົ້າຮ່ວມກອງປະຊຸມ ເຫັນໄດ້ຄວາມສໍາຄັນຂອງໜ້າທີ່ຂອງອົງການກວດສອບແຫ່ງລັດ ໃນການເຂົ້າຮ່ວມແຕ່ຫົວທີຂອງອົງການກວດສອບແຫ່ງລັດ ໃນການກວດສອບການສ້າງແຜນ ແລະ ດັດແກ້ແຜນງົບປະມານແຫ່ງລັດ ທີ່ໄດ້ກໍານົດໄວ້ໃນ ຂໍ້ 1 ມາດຕາ 110 ລັດຖະທໍາມະນູນແຫ່ງ ສປປ ລາວ ສະບັບປີ 2025 ພ້ອມກັນນັ້ນ ປະທານກອງປະຊຸມ ກໍໄດ້ມີຄໍາເຫັນເຈາະຈີ້ມ ເພື່ອໃຫ້ຜູ້ເຂົ້າຮ່ວມຄົ້ນຄວ້າປະກອບຄໍາເຫັນ ຕໍ່ກັບເນື້ອໃນຂອງຄຳແນະນຳ ວ່າດ້ວຍການເຂົ້າຮ່ວມແຕ່ຫົວທີ ຂອງອົງການກວດສອບແຫ່ງລັດ ໃນການກວດສອບການສ້າງແຜນ ແລະ ການດັດແກ້ແຜນງົບປະມານແຫ່ງລັດເພື່ອເຮັດໃຫ້ເນື້ອໃນຂອງຄໍາແນະນໍາມີຄວາມຄົບຖ້ວນ ແລະ ສອດຄ່ອງກັບສະພາບຄວາມເປັນຈິງໃນການຈັດຕັ້ງປະຕິບັດ ຢູ່ຂັ້ນສູນກາງ ແລະ ຂັ້ນທ້ອງຖິ່ນ ດັ່ງນີ້:

1. ຂັ້ນຕອນ ການເຂົ້າຮ່ວມແຕ່ຫົວທີ ຂອງອົງການກວດສອບແຫ່ງລັດ ໃນຂະບວນການກວດສອບການສ້າງແຜນ ແລະ ການດັດແກ້ແຜນງົບປະມານແຫ່ງລັດ ທີ່ກຳນົດໄວ້ 3 ຂັ້ນຕອນ ເຫັນວ່າເໝາະສົມແລ້ວບໍ່?

2. ໃນຂະບວນການ ເກັບກຳຂໍ້ມູນ ແລະ ເອກະສານ ເຫັນວ່າຄວນເພີ່ມ ຫຼື ຫຼຸດເນື້ອໃນໃດ ເພື່ອໃຫ້ສາມາດຈັດຕັ້ງປະຕິບັດໄດ້ ໂດຍສະເພາະການເກັບກຳຂໍ້ມູນ ຂອງຂັ້ນສູນກາງ ແລະ ທ້ອງຖິ່ນ?

3. ໃນຂັ້ນຕອນ ການສ້າງບົດປະກອບຄຳເຫັນ, ກຳນົດເວລາ ໃນການສົ່ງບົດປະກອບຄຳເຫັນເໝາະສົມແລ້ວບໍ່?

4. ເນື້ອໃນ ຂອງບົດປະກອບຄຳເຫັນ ຄົບຖ້ວນແລ້ວບໍ່? ຄວນເພີ່ມເນື້ອໃນໃດເຂົ້າໃສ່ຕື່ມ?

5. ຂັ້ນຕອນ ການເຂົ້າຮ່ວມພິຈາລະນາ ຂັ້ນທ້ອງຖິ່ນ ຄວນເພີ່ມເນື້ອໃນໃດໃຫ້ຄົບຖ້ວນ ໂດຍສະເພາະແຕ່ລະຂະບວນການ ຂອງການພິຈາລະນາ ງົບປະມານ ທ້ອງຖິ່ນ?

6. ຂັ້ນຕອນ ການເຂົ້າຮ່ວມພິຈາລະນາ ຂັ້ນສູນກາງ ຢູ່ກອງປະຊຸມກະຊວງການເງິນ, ກອງປະຊຸມລັດຖະບານ, ກອງປະຊຸມຄະນະປະຈຳສະພາ ແລະ ກອງປະຊຸມສະພາແຫ່ງຊາດ ມີຄວາມເໝາະສົມແລ້ວບໍ່?

ຜູ້ເຂົ້າຮ່ວມ ກອງປະຊຸມໄດ້ເອົາໃຈໃສ່ຄົ້ນຄວ້າ ຮ່າງຄຳແນະນຳ ຢ່າງເລິກເຊິ່ງ, ປະກອບຄຳເຫັນ ຢ່າງກົງໄປກົງມາ ແລະ ມີຄວາມຮັບຜິດຊອບສູງ ໂດຍອີງໃສ່ປະສົບການຕົວຈິງ ຂອງກົມ ແລະ ອົງການກວດສອບປະຈຳພາກ ຂອງຕົນ; ຊີ້ໃຫ້ເຫັນ ທັງບັນຫາ ແລະ ສະເໜີທາງອອກ ທີ່ປະຕິບັດໄດ້.

ໃນຕອນທ້າຍກອງປະຊຸມ ກໍໄດ້ຮັບຮອງເອົາເນື້ອໃນຄຳແນະນຳ ວ່າດ້ວຍການເຂົ້າຮ່ວມແຕ່ຫົວທີຂອງອົງການກວດສອບແຫ່ງລັດ ໃນການກວດສອບການສ້າງແຜນ ແລະ ການດັດແກ້ແຜນງົບປະມານແຫ່ງລັດທາງດ້ານຫຼັກການ.

(ຂ່າວ: ອົງການກວດສອບ)