 |
ກອງປະຊຸມສຸດຍອດອາຊຽນ-ຈີນ ຄັ້ງທີ 28, ກ່ອນດໍາເນີນກອງປະຊຸມບັນດາຜູ້ນໍາອາຊຽນ ແລະ ສປ ຈີນ ໄດ້ເຂົ້າຮ່ວມເປັນສັກຂີພິຍານໃນພິທີລົງນາມສັນຍາເຂດການຄ້າເສລີອາຊຽນ-ຈີນ ສະບັບປັບປຸງ 3.0 ຊຶ່ງສັນຍາດັ່ງກ່າວ ໄດ້ກວມເອົາບັນດາຂົງເຂດການຮ່ວມມືດ້ານເສດຖະກິດທີ່ສໍາຄັນ ເປັນຕົ້ນແມ່ນ ເສດຖະກິດດິຈີຕອນ, ເສດຖະກິດສີຂຽວ, ການເຊື່ອມຈອດຕ່ອງໂສ້ການສະໜອງຂອງພາກພື້ນ ແລະ ອື່ນໆ. ພ້ອມນີ້, ໃນກອງປະຊຸມສຸດຍອດອາຊຽນ-ຈີນ, ບັນດາຜູ້ນໍາ ໄດ້ຊຸກຍູ້ໃຫ້ພາກສ່ວນທີ່ກ່ຽວຂ້ອງຈັດຕັ້ງປະຕິບັດສັນຍາດັ່ງກ່າວຢ່າງມີປະສິດທິພາບ ເພື່ອເພີ່ມທະວີການຄ້າ ແລະ ການລົງທຶນ ລະຫວ່າງ ອາຊຽນ ແລະ ສປ ຈີນ. ກອງປະຊຸມ ຍັງໄດ້ຊົມເຊີຍການຈັດຕັ້ງປະຕິບັດບັນດາກິດຈະກໍາ ເພື່ອສະເຫຼີມສະຫຼອງ ປີ ແຫ່ງ ການໄປມາຫາສູ່ ລະຫວ່າງ ປະຊາຊົນ ອາຊຽນ-ຈີນ ໃນປີ 2024 ແລະ ປີ 2025 ແລະ ເຫັນດີກໍານົດເອົາປີ 2026 ເປັນປີແຫ່ງການສະເຫຼີມສະຫຼອງຄົບຮອບ 5 ປີ ແຫ່ງການເປັນຄູ່ຮ່ວມຍຸດທະສາດຮອບດ້ານອາຊຽນ-ຈີນ. ພ້ອມດຽວກັນນີ້, ຜູ້ນໍາອາຊຽນ ແລະ ສປ ຈີນ ຍັງໄດ້ຮ່ວມກັນກໍານົດທິດທາງໃຫ້ແກ່ການພົວພົວພັນຮ່ວມມືໃນຕໍ່ໜ້າ ໂດຍຜ່ານການຈັດຕັ້ງປະຕິບັດ ແຜນປະຕິບັດງານ ເພື່ອຈັດຕັ້ງປະຕິບັດການເປັນຄູ່ຮ່ວມຍຸດທະສາດຮອບດ້ານອາຊຽນ-ຈີນ (2026-2030) ເນັ້ນໜັກໃສ່ຂົງເຂດບຸລິມະສິດການຮ່ວມມື ທີ່ ອາຊຽນ ແລະ ສປ ຈີນ ມີທ່າແຮງ ເປັນຕົ້ນແມ່ນ ດ້ານເຕັກໂນໂລຊີ, ນະວັດຕະກໍາ ແລະ ປັນຍາປະດິດ, ພະລັງງານສະອາດ, ກະສິກໍາ, ອຸດສາຫະກໍາ, ການແພດ, ການສຶກສາ, ການຂົນສົ່ງ ແລະ ອື່ນໆ.
ກອງປະຊຸມສຸດຍອດສະເຫຼີມສະຫຼອງການພົວພັນຮ່ວມມືອາຊຽນ-ນິວຊີແລນໄດ້ຕີລາຄາສູງຕໍ່ກັບຜົນສໍາເລັດຂອງການພົວພັນຮ່ວມມືອາຊຽນ-ນິວຊີແລນ ໃນຕະຫຼອດ 5 ທົດສະຫວັດທີ່ຜ່ານມາ ແລະ ໄດ້ເຫັນດີຍົກລະດັບການພົວພັນອາຊຽນ-ນິວຊີແລນ ຂຶ້ນເປັນຄູ່ຮ່ວມຍຸດທະສາດຮອບດ້ານ. ພ້ອມນີ້, ກອງປະຊຸມ ໄດ້ຮັບຮອງເອົາຖະແຫຼງການວິໄສທັດຜູ້ນໍາ ວ່າດ້ວຍ ການພົວພັນຮ່ວມມືອາຊຽນ-ນິວຊີແລນ ຄົບຮອບ 50 ປີ ແລະ ໄດ້ຍິນດີຕໍ່ການຮັບຮອງເອົາແຜນປະຕິບັດງານອາຊຽນ - ນິວຊີແລນ ສະບັບໃໝ່ (2026-2030) ພ້ອມທັງຊຸກຍູ້ໃຫ້ ອາຊຽນ ແລະ ນິວຊີແລນ ຈັດຕັ້ງປະຕິບັດແຜນປະຕິບັດງານດັ່ງກ່າວ ໃຫ້ປະກົດຜົນເປັນຈິງ ແນໃສ່ຈັດຕັ້ງຜັນຂະຫຍາຍການເປັນຄູ່ຮ່ວມຍຸດທະສາດຮອບດ້ານອາຊຽນ-ນິວຊີແລນ ໃນຕໍ່ໜ້າ. ນອກຈາກນີ້, ບັນດາຜູ້ນໍາອາຊຽນ ແລະ ນິວຊີແລນ ໄດ້ເຂົ້າຮ່ວມງານລ້ຽງອາຫານທ່ຽງເພື່ອສະເຫຼີມສະຫຼອງຄົບຮອບ 50 ປີ ຂອງການພົວພັນຮ່ວມມືອາຊຽນ-ນິວຊີແລນ.
 |
ກອງປະຊຸມສຸດຍອດອາຊຽນ-ອົດສະຕຣາລີ ຄັ້ງທີ 5 ໄດ້ສະແດງຄວາມຊົມເຊີຍຕໍ່ຄວາມຄືບໜ້າໃນການຈັດຕັ້ງຜັນຂະຫຍາຍຜົນກອງປະຊຸມສຸດຍອດສະໄໝພິເສດ ເພື່ອສະເຫຼີມສະຫຼອງ ຄົບຮອບ 50 ປີ ແຫ່ງການພົວພັນຮ່ວມມື ອາຊຽນ - ອົສຕຣາລີ ທີ່ຈັດຂຶ້ນໃນປີ 2024 ກໍຄືບັນດາເອກະສານຜົນກອງປະຊຸມ ແລະ ໂຄງການ/ກິດຈະກໍາຕ່າງໆ ແລະ ໄດ້ເຫັນດີສືບຕໍ່ເຮັດວຽກຮ່ວມກັນຢ່າງໃກ້ຊິດ ເພື່ອຈັດຕັ້ງປະຕິບັດແຜນປະຕິບັດງານອາຊຽນ-ອົສຕຣາລີ (2025-2029) ເພື່ອເສີມຂະຫຍາຍ ແລະ ຮັດແໜ້ນການເປັນຄູ່ຮ່ວມຍຸດທະສາດຮອບດ້ານອາຊຽນ-ອົສຕຣາລີ ໃນຕໍ່ໜ້າ. ກອງປະຊຸມ ຍັງໄດ້ຮັບຮອງເອົາຖະແຫຼງການຮ່ວມຂອງຜູ້ນໍາອາຊຽນ-ອົສຕຣາລີ ວ່າດ້ວຍ ການປ້ອງກັນຂໍ້ຂັດແຍ່ງ, ການຈັດການກັບວິກິດການ ແລະ ໂຄງສ້າງພາກພື້ນທີ່ອາຊຽນເປັນຜູ້ນໍາພາ.
ຫຼັງຈາກສໍາເລັດການເຂົ້າຮ່ວມບັນດາກອງປະຊຸມສຸດຍອດຕ່າງໆ, ທ່ານນາຍົກລັດຖະມົນຕີ ໄດ້ນໍາພາຄະນະເຂົ້າຮ່ວມພິທີປິດກອງປະຊຸມສຸດຍອດອາຊຽນ ຄັ້ງທີ 47 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ. ໃນພິທີປິດດັ່ງກ່າວ ໄດ້ມີການມອບ-ຮັບການເປັນປະທານອາຊຽນ ຈາກ ມາເລເຊຍ ໃຫ້ແກ່ ຟິລິບປິນ ໃນນາມປະທານອາຊຽນ ປີ 2026 ຊຶ່ງ ຟິລິບປິນ ຈະເລີ່ມເປັນປະທານອາຊຽນ ນັບແຕ່ວັນທີ 1 ມັງກອນ 2026 ເປັນຕົ້ນໄປ.
ຂ່າວ: ກະຊວງການຕ່າງປະເທດ
ຄໍາເຫັນ