 |
ໃນໂອກາດນີ້, ສະຫາຍ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງທີ່ ສະພາແຫ່ງຊາດຫວຽດນາມ ຮັບຮອງ ສະຫາຍ ເລ ຮວາຍ ຈູງ ເປັນລັດຖະມົນຕີກະຊວງການຕ່າງປະເທດ ແຫ່ງ ສສ ຫວຽດນາມ ຄົນໃໝ່ ຢ່າງເປັນທາງການ ໃນວັນທີ 25 ຕຸລາ ຜ່ານມາ.
ໃນການພົບປະ, ສອງຝ່າຍໄດ້ເນັ້ນໜັກໃນການເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ກໍຄື ລະຫວ່າງສອງກະຊວງການຕ່າງປະເທດລາວ ແລະ ຫວຽດນາມ. ສອງຝ່າຍ, ເຫັນດີເປັນເອກະພາບ ໃນການຈະສືບຕໍ່ຊຸກຍູ້ບັນດາກະຊວງ, ຂະແໜງການຕ່າງໆ ສືບຕໍ່ຈັດຕັ້ງປະຕິບັດບັນດາຜົນການພົບປະຂອງສອງກົມການເມືອງ ກໍຄືຜົນຂອງກອງປະຊຸມ ຄັ້ງທີ 47 ຂອງຄະນະກຳມະການຮ່ວມມືລາວ-ຫວຽດນາມ ໂດຍສະເພາະການຈັດຕັ້ງປະຕິບັດບັນດາໂຄງການຮ່ວມມືທີ່ມີລັກສະນະຍຸດທະສາດຂອງສອງປະເທດຢ່າງຕັ້ງໜ້າ ໃຫ້ມີປະສິດທິພາບ ແລະ ປະສິດທິຜົນເປັນຮູບປະທໍາຍິ່ງໆຂຶ້ນ. ສອງຝ່າຍ ຍັງໄດ້ປຶກສາຫາລືກະກຽມໃຫ້ແກ່ການເດີນທາງຢ້ຽມຢາມ ສປປ ລາວ ຂອງ ສະຫາຍ ໂຕ ເລີມ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ພ້ອມທັງເຂົ້າຮ່ວມພິທີສະເຫຼີມສະຫຼອງວັນຊາດ ແຫ່ງ ສປປ ລາວ ຄົບຮອບ 50 ປີ ກໍຄືການເຂົ້າຮ່ວມການພົບປະລະຫວ່າງສອງກົມການເມືອງ ແລະ ການກະກຽມໃຫ້ແກ່ກອງປະຊຸມ ຄັ້ງທີ 48 ຂອງຄະນະກຳມະການຮ່ວມມືລາວ-ຫວຽດນາມ ທີ່ຈະມີຂຶ້ນ ຢູ່ ສປປ ລາວ ໃນທ້າຍປີ 2025 ທີ່ຈະມາເຖິງນີ້.
ພ້ອມດຽວກັນນີ້, ສອງຝ່າຍ ຍັງໄດ້ຕີລາຄາສູງການພົວພັນຮ່ວມມື ແລະ ການປະສານສົມທົບກັນຢ່າງແໜ້ນແຟ້ນລະຫວ່າງສອງກະຊວງການຕ່າງປະເທດ ໃນໄລຍະຜ່ານມາ, ພ້ອມທັງເຫັນດີເປັນເອກະພາບຈະສົມທົບກັນທົບທວນຄືນຜົນການຈັດຕັ້ງປະຕິບັດຂໍ້ຕົກລົງລະຫວ່າງສອງກະຊວງ ແລະ ຮ່ວມກັນສ້າງຂໍ້ຕົກລົງການຮ່ວມມືໃນໄລຍະໃໝ່ ໂດຍສະເພາະແມ່ນເພື່ອແນໃສ່ການຊຸກຍູ້ການແລກປ່ຽນບົດຮຽນການທູດເສດຖະກິດ, ການຄົ້ນຄວ້າ ແລະ ແລກປ່ຽນທັດສະນະບັນຫາຕ່າງໆ ໃນພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ ກໍຄືການຕິດຕໍ່ພົວພັນ ລະຫວ່າງ ບັນດາກົມຕ່າງໆທີ່ກ່ຽວຂ້ອງ ລວມເຖິງການແລກປ່ຽນຂອງສອງສະຫະພັນແມ່ຍິງກະຊວງການຕ່າງປະເທດ ລາວ ແລະ ຫວຽດນາມ.
(ຂ່າວ: ກຕທ)
ຄໍາເຫັນ