 |
ທ່ານ ສາຍທອງ ໄຊຍະວົງ ໄດ້ກ່າວ່າ: ກອງປະຊຸມຄັ້ງນີ້, ຈະໄດ້ຮັບຟັງການລາຍງານ ຜົນສໍາເລັດການເລືອກຕັ້ງສະມາຊິກສະພາແຫ່ງຊາດ ຊຸດທີ X, ສະມາຊິກສະພາປະຊາຊົນຂັ້ນແຂວງ ຊຸດທີ V ແລະ ຢັ້ງຢືນຄຸນລັກສະນະຂອງສະມາຊິກສະພາປະຊາຊົນຂັ້ນແຂວງ ຊຸດທີ V, ພິທີມອບຫຼຽນທີ່ລະນຶກ 50 ປີ ສະພາແຫ່ງຊາດ ແລະ ຫຼຽນທີ່ລະນຶກສະພາປະຊາຊົນແຂວງຈໍາປາສັກ. ພ້ອມນີ້ ກອງປະຊຸມ ຍັງຈະໄດ້ດໍາເນີນການເລືອກຕັ້ງ ແລະ ຮັບຮອງເອົາຕຳແໜ່ງສໍາຄັນຂອງອົງການອໍານາດລັດຂັ້ນແຂວງ ເປັນຕົ້ນ ປະທານ, ຮອງປະທານ ແລະ ຄະນະປະຈຳສະພາປະຊາຊົນແຂວງ, ຮັບຮອງເອົາກົງຈັກການຈັດຕັ້ງ, ບັນດາປະທານຄະນະກຳມະການ ແລະ ຫ້ອງວ່າການສະພາປະຊາຊົນແຂວງ ແລະ ຈະໄດ້ຮັບຮອງເອົາການແຕ່ງຕັ້ງປະທານສານປະຊາຊົນແຂວງ. ການເລືອກຕັ້ງບຸກຄະລາກອນດັ່ງກ່າວ, ແມ່ນບາດກ້າວສໍາຄັນໃນການສືບຕໍ່ບຸລະນະລະບົບອຳນາດລັດປະຊາທິປະໄຕປະຊາຊົນ ໃຫ້ໜັກແໜ້ນເຂັ້ມແຂງ ເພື່ອຮັບໃຊ້ປະຊາຊົນຢ່າງແທ້ຈິງ; ຈະໄດ້ຄົ້ນຄວ້າ ແລະ ຮັບຮອງເອົາແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 5 ປີ (2026-2030) ຂອງແຂວງຈໍາປາສັກ; ຈະໄດ້ພິຈາລະນາ ແລະ ຮັບຮອງເອົາແຜນການເຄື່ອນໄຫວວຽກງານ 5 ປີ (2026-2030) ຂອງສະພາປະຊາຊົນແຂວງ, ສານປະຊາຊົນ, ອົງການໄອຍະການປະຊາຊົນ, ອົງການກວດສອບພາກໃຕ້ ແລະ ອົງການກວດກາລັດແຂວງ; ຈະສະເໜີໃຫ້ບັນດາອົງການດັ່ງກ່າວ ເພີ່ມທະວີຄວາມຮັບຜິດຊອບ ໂດຍສະ ເພາະແມ່ນການຕິດຕາມກວດກາບັນດາໂຄງການລົງທຶນຂະໜາດໃຫຍ່, ການແກ້ໄຂຜົນການກວດສອບ ແລະ ການປັບປຸງຈັນຍາບັນ-ຈັນຍາທຳຂອງພະນັກງານ ໃນລະບົບຍຸຕິທຳໃຫ້ໜັກແໜ້ນ; ຮັບຮອງເອົາແຜນການສ້າງ ແລະ ປັບປຸງນິຕິກຳໃຕ້ກົດໝາຍ 5 ປີ ຂອງແຂວງຈໍາປາສັກ ເພື່ອເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍລະບຽບກົດໝາຍ ໃຫ້ດີຂຶ້ນເທື່ອລະກ້າວ ແລະ ບັນຫາສຳຄັນອື່ນໆ.
 |
ກອງປະຊຸມຄັ້ງນີ້, ຈະໄດ້ດຳເນີນໄປຮອດວັນທີ 24 ເມສາ 2026 ຈຶ່ງຈະສຳເລັດ.
(ຂ່າວ: ເກດສະໜາ, ພາບ: ຈັນທະວີສັກ)
ຄໍາເຫັນ