ພະອາຈານ ທອງໄໝ່ ວົງສະໜິດ ປະທານອົງການພຸດທະສາສະໜາສຳພັນລາວເມືອງ ບໍ່ແຕນໄດ້ກ່າວເປີດກອງປະຊຸມພ້ອມທັງຜ່ານບົດລາຍງານຜົນການຈັດຕັ້ງປະຕິບັດວຽກງານຂອງ ອພສ ເມືອງໃນໄລຍະ 5 ປີຜ່ານມາ ແລະ ທິດທາງແຜນການ 5 ປີຕໍ່ໜ້າ ມີບາງຕອນກ່າວວ່າ: ທົ່ວເມືອງມີວັດທັງໝົດ 22ວັດ, ມີພະສົງປະຈຳຢູ່ 16 ວັດ.ໃນໄລຍະ 5 ປີຜ່ານມາຄະນະ ອພສ ເມືອງໄດ້ເຄື່ອນໄຫວໂຄສະນາໃຫ້ພະສົງສາມະເນນຊາວພຸດທະສະນິກະຊົນທັງຫຼາຍໃຫ້ມີຄວາມສາມະຄີ ຮັກແພງຊ່ວຍເຫຼືອເຊີ່ງກັນ ແລະກັນ, ໄດ້ເຜີຍແຜ່ສີນລະທຳ-ນຳພາຮັກສາສິນ ຟັງທຳມະເທສະໜາ ຊຶ່ງເປັນຫຼັກທຳຄຳສອນຂອງອົງສົມເດັດສຳມາສຳພຸດພະເຈົ້າ, ສັ່ງສອນໃຫ້ມີນໍ້າໃຈຮັກຊາດ-ຮັກບ້ານເກີດເມືອງນອນ, ໄດ້ສົມທົບກັບຄະນະນຳຂັ້ນເມືອງທຸກຂັ້ນ, ອົງການປົກຄອງບ້ານ, ປະທານແນວລາວສ້າງຊາດບ້ານ ແລະ ສີສຸທຳວັດນຳພາພໍ່ແມ່ປະຊາຊົນຮັກສາເອກະລັກວັດທະນະທຳຮີດຄອງປະເພນີໃຫ້ຮັກສາສິນ 5, ສິນ8 ເປັນປະຈຳ ດ້ວຍກາຍວາຈາໃຈໃຫ້ຮູ້ຈັກບາບບຸນຄຸນໂທດ ແລະ ວຽກງານອື່ນໆ. ຈາກນັ້ນ, ໃນກອງປະຊຸມກໍໄດ້ຮັບຟັງການປະກອບຄຳຄິດຄຳເຫັນຈາກບັນດາຫ້ອງການ, ອົງການ, ກົມກອງ ແລະ ບ້ານໃສ່ບົດສະຫຼຸບເພື່ອໃຫ້ມີເນື້ອໃນຄົບຖ້ວນ.
ໃນກອງປະຊຸມ, ຍັງໄດ້ຜ່ານມາດຖານເງື່ອນໄຂຄະນະ ອພສ ເມືອງຊຸດໃໝ່, ຜ່ານລາຍຊື່ຜູ້ສະໝັກເປັນຄະນະອພສ ເມືອງຊຸດໃໝ່. ກອງປະຊຸມຄັ້ງປະຖົມມະລືກໄດ້ເປັນເອກະສັນເລືອກເອົາ ພະອາຈານທອງໄໝ່ ວົງສະໜິດ ເປັນປະທານ, ພະອາຈານ ອານຸສອນ ຈິດຕະວົງ, ພະອາຈານ ຂັນຄຳ ຄູນສະຫວັດ, ພະອາຈານ ໜູນ ສານມະໂນພ,ພະອາຈານສອນ ສົມບູນ ແລະ ພະອາຈານ ຕ໋ອບ ພົມມະລາດ ເປັນຮອງປະທານ ອພສ ເມືອງບໍ່ແຕນ.
(ຂ່າວ-ພາບ: ສາຍຄຳ ບຸນຍາວົງ)
ຄໍາເຫັນ