ກອງປະຊຸມປຶກສາຫາລື ການກະກຽມສະຫຼຸບຂະບວນການແຂ່ງຂັນ ຮັກຊາດ ແລະ ພັດທະນາ ທົ່ວປະເທດ

ໃນໂອກາດນີ້, ທ່ານນາຍົກລັດຖະມົນຕີ ໄດ້ມີຄຳເຫັນສັງລວມເນື້ອໃນຂອງກອງປະຊຸມ, ພ້ອມທັງມີຄຳເຫັນເນັ້ນໜັກ ຕໍ່ຄະນະຊີ້ນຳລະດັບຊາດ ແລະ ພາກສ່ວນກ່ຽວຂ້ອງ ເອົາໃຈໃສ່ຕື່ມບາງດ້ານ ເປັນຕົ້ນຄົ້ນຄວ້າຊອກຫາສາເຫດທີ່ແທ້ຈິງ ທີ່ພາໃຫ້ມີຜົນສຳເລັດ ແລະ ຂໍ້ຄົງຄ້າງຕ່າງໆ, ລວມທັງບົດຮຽນທີ່ຖອດຖອນໄດ້ ໃນການຈັດຕັ້ງປະຕິບັດວຽກງານແຂ່ງຂັນ-ຍ້ອງຍໍ, ຮັກຊາດ ແລະ ພັດທະນາ ໄລຍະຜ່ານມາ, ລວມທັງ ຫາງສຽງສັງຄົມ ຕໍ່ວຽກງານດັ່ງກ່າວ; ໃຫ້ກອງເລຂາຄະນະຊີ້ນຳລະດັບຊາດ ຄົ້ນຄວ້າປັບປຸງເນື້ອໃນ ບັນດາຮ່າງເອກະສານ ທີ່ນຳມາສະເໜີໃນກອງປະຊຸມຄັ້ງນີ້, ລວມທັງ ເອກະສານທີ່ກ່ຽວຂ້ອງ ໃຫ້ສອດຄ່ອງ, ເນື້ອໃນຄົບຖ້ວນສົມບູນ ແລະ ເປັນເອກະພາບໄປລວງດຽວກັນຕື່ມ, ພ້ອມກັນນັ້ນ ກໍກວດກາ ແລະ ຄົ້ນຄວ້າປັບປຸງວັດຖຸພັນຍ້ອງຍໍ ໃຫ້ມີຄວາມທົນທານ, ມີຄຸນນະພາບ, ຮູບຊົງສະຫງ່າງາມ ແລະ ມີລັກສະນະເຄັ່ງຂຶມກວ່າເກົ່າ, ທັງກວດກາຄືນຜະລິດຕະພັນຍ້ອງຍໍ ທີ່ໄດ້ຜະລິດໄວ້ແລ້ວ ເພື່ອຫຼີກລ່ຽງການເຊື່ອມຄຸນນະພາບ; ຮີບຮ້ອນຄົ້ນຄວ້າ ອອກຄຳແນະນໍາ ກ່ຽວກັບການຄັດເລືອກ, ການສະເໜີເປົ້າໝາຍ ບຸກຄົນ ແລະ ການຈັດຕັ້ງທີ່ດີເດັ່ນ ເພື່ອບໍ່ໃຫ້ມີການຍ້ອງຍໍຊໍ້າຊ້ອນ, ຮັບປະກັນຄວາມວ່ອງໄວ, ທັນການ ແລະ ຖືກຕ້ອງຕາມກົດໝາຍ; ສືບຕໍ່ກະກຽມກອງປະຊຸມສະຫຼຸບຕີລາຄາຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ທົ່ວປະເທດ ໄລຍະ 2021-2025ແລະ ທິດທາງແຜນການຮອດປີ 2030 ໂດຍເອົາໃຈໃສ່ດ້ານເນື້ອໃນ, ວັດຖຸພັນ (ຫຼຽນ-ໃບຍ້ອງຍໍ), ງົບປະມານ ແລະ ຄັດເລືອກໄດ້ວຽກດີຄົນເດັ່ນແທ້; ໃຫ້ຈັດຕັ້ງຄົ້ນຄວ້າ, ເຊື່ອມຊຶມບັນດາມະ ຕິ, ຄໍາສັ່ງ, ຄຳແນະນໍາ ແລະ ແຈ້ງການຂອງຂັ້ນເທິງ ກ່ຽວກັບວຽກງານແຂ່ງຂັນ-ຍ້ອງຍໍ, ແລ້ວຄົ້ນຄວ້າຜັນຂະຫຍາຍເປັນນິຕິກໍາຂັ້ນຂອງຕົນ ເພື່ອເປັນບ່ອນອີງໃຫ້ແກ່ການເຄື່ອນໄຫວວຽກງານ ມີປະສິດທິພາບ ແລະ ປະສິດທິຜົນສູງ; ໃຫ້ຄະນະຊີ້ນໍາ ກະຊວງ, ອົງການ ແລະ ທ້ອງຖິ່ນ ກວດກາເປົ້າໝາຍທີ່ໄດ້ຮັບການປະດັບຫຼຽນລະນຶກ 70 ປີ ຂອງພັກ ແຕ່ຍັງບໍ່ໄດ້ຮັບເງິນນະໂຍບາຍ ໂດຍສະເພາະ ພະນັກງານບໍານານ ເພື່ອສະຫຼຸບລາຍງານ ຕໍ່ຂັ້ນເທິງ ໃຫ້ທິດຊີ້ນໍາ ໂດຍໄວ.

ຂ່າວ ແລະ ພາບ: ກົມປະຊາສຳພັນ ຫສນຍ.