ກອງປະຊຸມສໍາມະນາ ເພື່ອຮັບຟັງຄໍາຄິດຄຳເຫັນ ຕໍ່ຮ່າງນິຕິກຳຂອງ ນວ

ສະພາປະຊາຊົນນະຄອນຫຼວງວຽງຈັນ ໄດ້ຈັດກອງປະຊຸມສໍາມະນາ ເພື່ອຮັບຟັງຄຳຄິດ-ຄຳເຫັນຕໍ່ຮ່າງຂໍ້ຕົກລົງ ວ່າດ້ວຍການກໍານົດລາຄາຫົວໜ່ວຍທົດແທນຄ່າເສຍຫາຍ ຂອງໂຄງການກໍ່ສ້າງຕາຝັ່ງ ແລະ ພັດທະນາແຄມຂອງ ໄລຍະ II ໃນວັນທີ 29 ພະຈິກນີ້ທີ່ຫ້ອງວ່າການປົກຄອງນະຄອນຫຼວງວຽງຈັນ. ໂດຍການເປັນປະທານຂອງທ່ານ ນາງ ລໍາພອຍ ສີອັກຄະຈັນກໍາມະການປະຈໍາພັກຮອງປະທານສະພາປະຊາຊົນນະຄອນຫຼວງວຽງຈັນ, ເຂົ້າຮ່ວມມີບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນນະຄອນຫຼວງ, ພະແນກການທີ່ກ່ຽວຂ້ອງ, ອົງການປົກຄອງບ້ານ ພ້ອມດ້ວຍແຂກຖືກເຊີນ.
ກອງປະຊຸມສຳມະນາຄັ້ງນີ້ຈຸດປະສົງເພື່ອສຳມະນາແລກປ່ຽນຄຳຄິດ-ຄຳເຫັນຈາກບັນດາທ່ານສະມາຊິກສະພາ ແລະ ບັນດາພະແນກການ,ອົງການທຽບເທົ່າພະແນກອ້ອມຂ້າງນະຄອນຫຼວງຊຶ່ງຄະນະຮັບຜິດຊອບຮ່າງຂໍ້ຕົກລົງໄດ້ລາຍງານໃຫ້ຊາບວ່າ:ນະຄອນຫຼວງວຽງຈັນໄດ້ຄົ້ນຄວ້າຫົວໜ່ວຍຊົດເຊີຍທົດແທນຄ່າເສຍຫາຍຂອງໂຄງການກໍ່ສ້າງປ້ອງກັນຕາຝັ່ງ ແລະ ພັດທະນາແຄມຂອງ ໄລຍະ II, ແຕ່ບ້ານວັດນາກ ເມືອງສີສັດຕະນາກ ຫາ ບ້ານຫາດດອກແກ້ວ ເມືອງຫາດຊາຍຟອງ ນະຄອນຫຼວງວຽງຈັນ.
ໂຄງການກໍ່ສ້າງປ້ອງກັນຕາຝັ່ງ ແລະ ພັດທະນາແຄມຂອງໄລຍະ IIເປັນໂຄງການສືບຕໍ່ທີ່ໄດ້ຮັບການສະໜັບສະໜູນເງິນກູ້ຍືມດອກເບ້ຍຕໍ່າ ຈາກ ສເກົາຫຼີ ຊຶ່ງໄດ້ຮັບການເຊັນສັນຍາເງິນກູ້ຢືມ ໃນວັນທີ 1 ພະຈິກ 2017, ລະຫວ່າງ ກະຊວງການເງິນ ແຫ່ງ ສປປ ລາວ ແລະ ທະນາຄານນໍາເຂົ້າ ແລະ ສົ່ງອອກ (The EXPORT-IMORT BANK ) ຈາກ ສເກົາຫຼີ ລວມມູນຄ່າກູ້ຍືມທັງໝົດ 57.605.000 ໂດລາແລະ ບ້ວງເງິນສົມທົບຂອງລັດຖະບານລາວ ມີມູນຄ່າ 9.957.000ໂດລາ, ລວມມູນຄ່າທັງໝົດ 67.526.000 ໂດລາ. ໂຄງການແມ່ນເລີ່ມຈາກຈຸດເຊື່ອມຕໍ່ຈາກໂຄງການໄລຍະ Iແຕ່ ບ້ານວັດນາກ ເມືອງສີສັດຕະນາກ ຫາ ບ້ານຫາດດອກແກ້ວ ເມືອງຫາດຊາຍຟອງ ຊຶ່ງມີຄວາມຍາວ 9,3 ກິໂລແມັດ ປະກອບມີໜ້າວຽກຫຼັກ ຄື: 1).ຍົກລະດັບຄູປ້ອງກັນນໍ້າ ແລະ ກໍ່ສ້າງລະບົບປ້ອງກັນຕາຝັ່ງ ແຕ່ຫຼັກ3 ຫາຫຼັກ4 ເມືອງສີສັດຕະນາກ ມີຄວາມຍາວທັງໝົດປະມານ 0,97ກມ   ແລະກໍ່ສ້າງຄູປ້ອງກັນນໍ້າຖ້ວມ ທີ່ສາມາດນໍາໃຊ້ເປັນເສັ້ນທາງລຽບຕາມແຄມຂອງ ແລະ ກໍ່ສ້າງລະບົບປ້ອງກັນຕາຝັ່ງບໍ່ໃຫ້ມີການເຊາະເຈື່ອນ ມີຄວາມຍາວທັງໝົດ 8,36ກມ ຈາກຫຼັກ 4ເມືອງສີສັດຕະນາກ ຫາ ບ້ານຫາດດອກແກ້ວ ເມືອງຫາດຊາຍຟອງ;2).ກໍ່ສ້າງສວນສາທາລະນະ ໃຫ້ເຊື່ອມຕິດຈອດກັນໄດ້ລະຫ່ວາງ ໂຄງການໄລຍະທີ1ແລະ2ຈົນຮອດບ້ານຫາດດອກແກ້ວ ຊຶ່ງປະກອບດ້ວຍ: ເສັ້ນທາງຍ່າງຊົມວິວແຄມຂອງ,ສວນກິລາກາງແຈ້ງ ແລະ ຈຸດທ່ອງທ່ຽວທໍາມະຊາດ ທີ່ເຊື່ອມຈອດກັບຕົວເມືອງໄດ້ ມີເນື້ອທີ່ ປະມານ 5,9ເຮັກຕາ;3).ຍົກລະດັັບເສັ້ນທາງຕາມຄູປ້ອງກັນນໍ້າຖ້ວມໃນໂຄງການໄລຍະທີ1 ແຕ່ ບ້ານອຸບໂມງ ຫາ ບ້ານເກົ້າລ້ຽວມີຄວາມຍາວ 4,4ກມ ລຽບຕາມແຄມຂອງ; 4).ກໍ່ສ້າງເສັ້ນທາງ ຍ່າງຊົມທໍາມະຊາດ ແລະ ອອກກໍາລັງກາຍ ລຽບຕາມແຄມຂອງ ຈາກຫຼັກ3 ຫາ ຫຼັກ 4 ເມືອງສີສັດຕະນາກ ມີຄວາມຍາວທັງໝົດ ປະມານ 0,97ກມ ເພື່ອເຊື່ອມກັບໂຄງການໄລຍະທີ 1.
ຜ່ານການລົງເກັບກຳຂໍ້ມູນຂອງຄະນະວິຊາການຂອງໂຄງການເຫັນວ່າ:ມີ 12 ບ້ານ ທີ່ໄດ້ຮັບຜົນກະທົບ,  ຈໍານວນຕອນດິນທັງໝົດ 95 ຕອນ, ເນື້ອທີ່ດິນ ທີ່ຖືກຜົນກະທົບທັງໝົດ 85.137 ຕາແມັດ ຊຶ່ງແຍກອອກເປັນແຕ່ລະປະເພດສິດໃນການຄຸ້ມຄອງທີ່ດິນຕາມລາຍລະອຽດຄື: ປະເພດກໍາມະສິດນໍາໃຊ້ສ່ວນບຸກຄົນ ມີຈໍານວນ 90 ຕອນ ເນື້ອທີ່ 84.012 ຕາແມັດ, ປະເພດກໍາມະສິດດິນລັດ (ບຸກຄົນນໍາໃຊ້) ມີຈໍານວນ 2 ຕອນ ເນື້ອທີ່ 183 ຕາແມັດ ແລະ ປະເພດກໍາມະສິດດິນລັດ (ລັດຄຸ້ມຄອງ) ມີຈໍານວນ 3 ຕອນ ເນື້ອທີ່ 933 ຕາແມັດ,ສະເພາະຕອນດິນທີ່ຖືກຜົນກະທົບທັງໝົດ 95 ຕອນ ມີ 60 ຕອນດິນ ເນື້ອທີ່ 28.827 ຕາແມັດທີ່ນອນໃນເຂດສະຫງວນແຄມແມ່ນໍ້າຂອງ,ສຳລັບຕອນດິນທີ່ຈະພັດທະນາເປັນສວນສາທາລະນາ ເຂດບ້ານແກ້ງຍາງ ເມືອງຫາດຊາຍຟອງ ມີຈໍານວນ 37 ຕອນ ມີເນື້ອທີ່ 61.875 ຕາແມັດ, ມີ 7 ຕອນທີ່ນອນໃນເຂດສະຫງວນຕາມລໍາແມ່ນໍ້າຂອງ ມີເນື້ອທີ່ 5.127 ຕາແມັດ, (ບັນດາຕອນດິນຈຳນວນ 37 ຕອນ ແມ່ນນອນໃນດິນທີ່ຖືກກະທົບທັງໝົດ 95 ຕອນ); ຂໍ້ມູນດ້ານຜົນລະປູກ:ຜົນລະປູກທີ່ໄດ້ຮັບຜົນກະທົບປະກອບມີ 32 ຊະນິດ ລວມມີ2.213 ຕົ້ນ,  ຂໍ້ມູນດ້ານສິ່ງປຸກສ້າງ:ສິ່ງປຸກສ້າງທີ່ຖືກຜົນກະທົບປະກອບມີປະເພດເຮືອນທີ່ຢູ່ອາໄສ, ຄອກລົດ, ຮ້ານຄ້າ  ແລະ ສາລາ ຈຳນວນ 18 ຫຼັງ,ກໍາແພງກໍ່192ແມັດ, ຮົ້ວໜາມໝາກຈັບ 96ແມັດ, ສະຖານີດູດນ້ຳ 2ຈຸດແລະ ໄດ້ມີການຍົກຍ້າຍໄຟຟ້າ, ນ້ຳປະປາ, ຜ່ານການປະເມີນມູນຄ່າເບື້ອງຕົ້ນທີ່ຈະຊົດເຊີຍໃຫ້ແກ່ປະຊາຊົນທີ່ໄດ້ຮັບຜົນກະທົບ ປະມານ 50,7 ຕື້ກວ່າກີບ.
ສັງລວມແລ້ວຜ່ານການຈັດປະຕິບັດໂຄງການ ໄລຍະIແລະ ໄລຍະII ທີ່ໄດ້ກ່າວມາຂ້າງເທິງນັ້ນເຫັນວ່າ: ງົບປະມານທີ່ສະໜອງໃຫ້ແກ່ການຈັດຕັ້ງປະຕິບັດວຽກງານການຊົດເຊີຍໃຫ້ຜູ້ທີ່ໄດ້ຮັບຜົນກະທົບໃນແຕ່ລະປີມີຈຳນວນໜ້ອຍ ແລະ ບໍ່ພຽງພໍຕາມການຈັດຕັ້ງປະຕິບັດວຽກງານຊົດເຊີຍຕົວຈິງ ສຳລັບໂຄງການປ້ອງກັນຕາຝັ່ງເຈື່ອນ ໄລຍະ 1 ເຖິງວ່າການກໍ່ສ້າງຈະສຳເລັດ ແລະ ມີການມອບ-ຮັບ ມາເປັນເວລາ 9 ປີກວ່າແລ້ວ ແຕ່ວຽກງານການຊົດເຊີຍແມ່ນຍັງບໍ່ທັນສຳເລັດ ຍັງຕ້ອງການງົບປະມານເພື່ອສືບຕໍ່ ຊົດເຊີຍໃຫ້ແກ່ຜູ້ໄດ້ຮັບຜົນກະທົບຈາກໂຄງການປ້ອງກັນຕາຝັ່ງເຈື່ອນ ໄລຍະ 1 ຕື່ມອີກ ຈຳນວນ8.462.009.900 ກີບ. ສະເພາະໂຄງການປ້ອງກັນຕາຝັ່ງ ແລະ ພັດທະນາແຄມຂອງ ໄລຍະ 2 ແມ່ນຕ້ອງການງົບປະມານໃນການຊົດເຊີຍຈຳນວນ ປະມານ 50,7 ຕື້ກວ່າກີບ, ນັບແຕ່ ປີ 2021 ມາຮອດປັດຈຸບັດໄດ້ຮັບງົບປະມານໃນການຊົດເຊີຍຈຳນວນ 650 ລ້ານກີບ ຖ້າທຽບໃສ່ແຜນງົບປະມານທີ່ຈະຕ້ອງຊົດເຊີຍຜົນກະທົບໂຄງການແມ່ນບໍ່ສາມາດກຳນົດໄລຍະເວລາຂອງການຊົດເຊີຍໄດ້ຢ່າງແນ່ນອນ.ໂຄງການໄດ້ເລີ່ມຈັດຕັ້ງປະຕິບັດມາຮອດປັດຈຸບັນນີ້ ມີຄວາມຄືບໜ້າ 34,5% ການປະຕິບັດວຽກງານເຫັນວ່າພວກເຮົາສາມາດເຂົ້າພື້ນທີ່ກໍ່ສ້າງຕາມເຂດລຽບແຄມນ້ຳຂອງ (ໂດຍສະເພາະໃນເຂດສະຫງວນ ). 
(ຂ່າວ-ພາບ: ແສງຈັນ)