ທີ່ທະນາຄານດັ່ງກ່າວ ໂດຍການເປັນປະທານຂອງທ່ານນາງ ວັດທະນາ ດາລາລອຍ ຮັກສາການຜູ້ວ່າການ ທຫລ ປະທານສະພາບໍລິຫານ ທຫລ, ມີບັນດາຮອງປະທານ, ກໍາມະການສະພາບໍລິຫານ, ຮອງຜູ້ວ່າການ ທຫລ, ບັນດາຄະນະກົມ-ທຽບເທົ່າ ພາຍໃນ ທຫລ, ມີບັນດາສະມາຊິກສະພາບໍລິຫານ ທຫລທີ່ກ່ຽວຂ້ອງເຂົ້າຮ່ວມ.
ທ່ານນາງ ວັດທະນາ ດາລາລອຍ ກ່າວວ່າ: ກອງປະຊຸມໃນຄັ້ງນີ້, ຜູ້ເຂົ້າຮ່ວມໄດ້ຮັບຟັງການຜ່ານ 4 ຮ່າງເອກະສານທີ່ສຳຄັນຄື: ສະຫຼຸບ-ຕີລາຄາໝາກຜົນຂອງການຈັດຕັ້ງປະຕິບັດແຜນເງິນຕາ ແລະ ການເຄື່ອນໄຫວວຽກງານພົ້ນເດັ່ນຂອງ ທຫລ ປະຈຳ 9 ເດືອນຕົ້ນປີ ແລະ ທິດທາງແຜນການ 3 ເດືອນທ້າຍປີ 2024; ການຈັດຕັ້ງປະຕິບັດແຜນງົບປະມານລາຍຮັບ-ລາຍຈ່າຍຂອງ ທຫລ ປະຈຳ 9 ເດືອນຕົ້ນປີ ແລະ ຄາດຄະເນປະຕິບັດ 3 ເດືອນທ້າຍປີ 2024; ການຕັດສິນຄະດີຂອງທະນາຄານລາວກໍ່ສ້າງຈໍາກັດ ແລະ ການແກ້ໄຂບັນຫາຂອງສະຖາບັນການເງິນທີ່ບໍ່ແມ່ນທະນາຄານທີ່ມີຄວາມອ່ອນແອ; ການເຄື່ອນໄຫວວຽກງານພົ້ນເດັ່ນຂອງຄະນະກຳມະການກວດກາປະຈຳໄຕມາດ 1 ແລະ 2 ປີ 2024 ແລະ ທິດທາງແຜນການໃນໄຕມາດ 3 ປີ 2024 ແລະ ເອກະສານສຳຄັນອີກຈຳນວນໜຶ່ງ. ຈາກນັ້ນ, ຜູ້ເຂົ້າຮ່ວມຍັງໄດ້ສຸມໃສ່ຄົ້ນຄວ້າປະກອບຄໍາຄິດ-ຄໍາເຫັນໃສ່ເນື້ອໃນເອກະສານດັ່ງກ່າວຢ່າງເລິກເຊິ່ງ ແລະ ກົງໄປກົງມາ ເພື່ອເຮັດໃຫ້ແຕ່ລະບັນຫາທີ່ຍົກຂຶ້ນມາປຶກສາຫາລືກັນນັ້ນມີວິທີທາງອອກທີ່ເໝາະສົມສາມາດນໍາໄປຈັດຕັ້ງປະຕິບັດຕົວຈິງຢ່າງເປັນຮູບປະທຳ.
ທ່ານນາງ ວັດທະນາ ດາລາລອຍ ຍັງກ່າວຕື່ມອີກວ່າ: ຈາກການຈັດຕັ້ງປະຕິບັດວຽກງານດັ່ງກ່າວໃນຜ່ານມາເຮັດໃຫ້ຜົນໄດ້ຮັບມີທ່າອ່ຽງຕັ້ງໜ້າດີຂຶ້ນເຊັ່ນ: ອັດຕາເງິນເຟີ້ ຄ່ອຍໆປັບຕົວຫຼຸດລົງຄື: ໃນເດືອນກັນຍາ 2024 ຫຼຸດລົງມາຢູ່ໃນລະດັບ 21.7% ຈາກ 24.3% ໃນເດືອນສິງຫາ 2024; ອັດຕາແລກປ່ຽນເລີ່ມມີຄວາມສະຫງົບ ແລະ ເໜັງຕີງໃນທິດທາງທີ່ແຂງຄ່າຂຶ້ນ. ໃນນັ້ນ, ອັດຕາແລກປ່ຽນເດືອນກັນຍາ 2024 (ຂໍ້ມູນຮອດວັນທີ 20 ກັນຍາ 2024) ທຽບໃສ່ເດືອນສິງຫາ 2024 ເງິນກີບ/ໂດລາແຂງຄ່າ 0.16% (ຈາກ 22,136.40 ກີບ/ໂດລາ ເປັນ 22,100.00 ກີບ/ໂດລາ) ແລະ ກີບ/ບາດ ແຂງຄ່າ 0.35% (ຈາກ 683.43 ກີບ/ບາດ ເປັນ 681.08 ກີບ/ບາດ). ສ່ວນອັດຕາແລກປ່ຽນລະຫວ່າງທະນາຄານທຸລະກິດ (ທທກ) ກັບຕະຫຼາດຢູ່ໃນລະດັບ 12.14% ສໍາລັບເງິນກີບ/ໂດລາ ແລະ ໃນລະດັບ 1.93% ສໍາລັບເງິນກີບ/ບາດ. ສັງລວມແລ້ວໃນ 9 ເດືອນຕົ້ນປີ 2024 ເງິນກີບຍັງສືບຕໍ່ອ່ອນຄ່າ ແຕ່ເຫັນວ່າເງິນກີບອ່ອນຄ່າໜ້ອຍກວ່າເມື່ອທຽບກັບປີ 2023.
ຂ່າວ-ພາບ: ວັນເພັງ
ຄໍາເຫັນ