 |
ໃນພິທີ, ໄດ້ຫວນຄືນຊີວິດ ແລະ ການເຄື່ອນໄຫວຂອງທ່ານ ປະທານ ສຸພານຸວົງ ໃນແຕ່ລະໄລຍະ ຊຶ່ງໄດ້ຍົກໃຫ້ເຫັນຄຸນສົມບັດ ສີນທຳປະຕິວັດອັນຜ່ອງໃສ, ຄວາມຈົ່ງຮັກພັກດີ ຕໍ່ອຸດົມການປະຕິວັດຢ່າງເດັດຂາດ, ຈິດໃຈຕໍ່ສູ້ຢ່າງພິລະອາດ ແລະ ນ້ຳໃຈສະຫຼະອັນສູງສົ່ງ ຂອງປະທານ ສຸພານຸວົງ ໃນພາລະກິດຕໍ່ສູ້ປົດປ່ອຍຊາດ, ເພື່ອຄວາມເປັນເອກະລາດ, ອະທິປະໄຕ, ເພື່ອຄວາມຢູ່ດີ-ກີນດີ ຂອງປະຊາຊົນບັນດາເຜົ່າ ເພື່ອໃຫ້ພະນັກງານສະມາຊີກພັກ-ນັກຮົບ ພາຍໃນກົມກອງໄດ້ຮັບຮູ້ ແລະ ເຂົ້າໃຈຢ່າງເລີກເຊີງເຖິງຄວາມອົງອາດກ້າຫານ, ຄວາມເດັດດ່ຽວໜຽວແໜ້ນ ແລະ ຄວາມສາມັກຄີ ພ້ອມກັນເສີມຂະຫຍາຍບົດຮຽນອັນລ້ຳຄ່າຂອງທ່ານຜູ້ນຳ ເຂົ້າໃນການເຝີກຝົນຫຼໍ່ຫຼອມຕົນເອງໃຫ້ກາຍເປັນພະນັກງານຮຸ່ນສືບທອດທີ່ມີຄວາມຈົງຮັກພັກດີຕໍ່ປະເທດຊາດ ແລະ ປະຊາຊົນ. ພ້ອມນັ້ນຍັງໄດ້ຍົກໃຫ້ເຫັນເຖິງສະພາບວຽດລ້ອມແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ຊຶ່ງເປັນປະເທດບ້ານໃກ້ເຮືອນຄຽງ, ມີຊາຍແດນຮ່ວມກັນຍາວກວ່າ 2,000 ກິໂລແມັດ, ພ້ອມກັນອີງຫຼັງໃສ່ສາຍພູຫຼວງ, ພ້ອມຮ່ວມຊົມໃຊ້ແມ່ນຳລຳເຊ, ພູຜາປ່າດົງ, ດີນດອນຕອນຫຍ້າເພື່ອດຳລົງຊີວິດ ແລະ ດຳເນີນການຕໍ່ສູ້ຕ້ານສັດຕູຜູ້ຮຸກຮານ, ປະຊາຊົນລາວ-ຫວຽດນາມ ມີມູນເຊື້ອໄປມາຫາສູ່ແລກປ່ຽນສີນຄ້າ, ແລກປ່ຽນວັດທະນາທຳນຳກັນ, ມີອຸດົມຄະຕິ ແລະ ຄວາມມຸ່ງມາດປາຖະໜາອັນດຽວກັນຄື : ຢາກມີຄວາມເປັນເອກະລາດ, ສັນຕິພາບ ແລະ ຮັ່ງມີຜາສຸກ. ປະຊາຊົນ 2 ຊາດ ມີມູນເຊື້ອສາມັກຄີຊ່ວຍເຫຼືອເຊິ່ງກັນ ແລະ ກັນ ມາເປັນພັນໆປີ ໃນການກໍ່ຕັ້ງ ແລະ ປົກປັກຮັກສາປະເທດຊາດຂອງໃຜລາວ, ພິເສດແມ່ນໄລຍະດຳເນີການຕໍ່ສູ້ປະຕິວັດ, ການຮ່ວມມືພົວພັນຮອບດ້ານຂອງສອງຊາດລາວ-ຫວຽດນາມ ໂດຍແມ່ນ ປະທານ ໂຮ່ຈີມີນ ແລະ ປະທານ ໄກສອນ ພົມວິຫານ, ປະທານ ສຸພານຸວົງ ເປັນຜູ້ລິເລີ່ມ ແລະ ຖະນຸຖະໜອມເພີ່ມພູນຄຸນສ້າງ ແລະ ສືບທອດກັນມາຮຸ່ນຕໍ່ຮຸ່ນຈົນເຖິງປັດຈຸບັນ.
ການປາຖະກະຖາໃນຄັ້ງນີ້, ກໍເພື່ອເຮັດໃຫ້ພະນັກງານ-ນັກຮົບໄດ້ຮັບຮູ້ ເຊື່ອມຊືມກ່ຽວກັບມູນເຊື້ອວິລະກຳອັນລ້ຳເລີດ, ຜົນງານ, ຄຸນງາມ ແລະ ຄຸນສົມບັດສິນທຳປະຕິວັດຂອງທ່ານປະທານ ສຸພານຸວົງ ແລະ ຮັບຮູ້ປະຫວັດຄວາມເປັນມາ, ການເຕີບໃຫຍ່ຂະຫຍາຍຕົວຂອງຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມຕະຫຼອດໄລຍະຕໍ່ສູ້ກູ້ຊາດ, ຕ້ານການຮຸກຮານຂອງພວກລ່າເມືອງຂື້ນແບບເກົ່າ ແລະ ແບບໃໝ່ ແລະ ໄລຍະປົກປັກຮັກສາ ແລະ ສ້າງສາພັດທະນາປະເທດຊາດ.
(ພາບ-ຂ່າວ: ຄຳຊາຍ ກວ່າງຄຸນສີ)
ຄໍາເຫັນ