 |
ສະຫາຍ ພັນໂທ ບຸນທັນ ພິພັດເສລີ ຄະນະພັກ ຫົວໜ້າພະແນກບໍລິຫານ-ສັງລວມ ກອງພັນໃຫຍ່ 202 ໄດ້ຂຶ້ນຜ່ານບົດສະຫຼຸບວຽກງານປ້ອງກັນຊາດ ປະຈຳ 6 ເດືອນຕົ້ນປີ 2025 ແລະ ທິດທາງແຜນການ 6 ເດືອນທ້າຍປີ 2025. ກອງພັນໃຫຍ່ 202 ຖືເອົາວຽກງານສຶກສາອົບຮົມການເມືອງນໍາພາແນວຄິດເປັນກົກ, ນຳເອົາມະຕິຄຳສັ່ງ, ມູນເຊື້ອຂອງຊາດ ຂອງພັກ ມາສືກສາອົບຮົມໃຫ້ຖັນແຖວພະນັກງານ, ສະມາຊິກພັກ-ນັກຮົບໄດ້ຮັບຮູ້ເຊື່ອມຊືມກຳແໜ້ນ, ເຮັດໃຫ້ພະນັກງານ-ນັກຮົບ ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດຢ່າງແທ້ຈິງ, ເອົາໃຈໃສ່ຊີ້ນຳວຽກງານກໍ່ສ້າງຮາກຖານການເມືອງສົມທົບກັບຫົວໜ່ວຍກົມກອງລົງກໍ່ສ້າງຮາກຖານເຮັດໃຫ້ພື້ນຖານການເມືອງ-ແນວຄິດຂອງປະຊາຊົນໄດ້ຮັບການປັບປຸງ, ເສດຖະກິດໄດ້ຮັບການພັດທະນາ, ຊີວິດການເປັນຢູ່ດີຂຶ້ນເທື່ອລະກ້າວ. ນອກນີ້, ຍັງໄດ້ປະສານແໜ້ນກັບກອງບັນຊາການ, ອົງການປົກຄອງທ້ອງຖິ່ນເພື່ອຕິດຕາມການເຄື່ອນໄຫວຂອງກຸ່ມຄົນບໍ່ຫວັງດີຢ່າງໃກ້ສິດ, ຈັດຕັ້ງປ້ອງກັນເວນຍາມຢ່າງເຂັ້ມງວດຕາມເສັ້ນທາງ, ຈຸດສຳຄັນຫຼໍ່ແຫຼມ, ປ້ອງກັນວັນບຸນສຳຄັນຕ່າງໆຂອງຊາດ, ຂອງພັກໃຫ້ມີຄວາມສະຫງົບປອດໄພ 100%. ນອກນັ້ນ, ຍັງໄດ້ເອົາໃຈໃສ່ຊີ້ນໍາວຽກງານດ້ານຕ່າງໆເປັນຕົ້ນ: ວຽກງານກຽມພ້ອມສູ້ຮົບ ກອບກູ້ໄພພິບັດ, ວຽກງານກໍ່ສ້າງພັກ-ພະນັກງານ ແລະ ອົງການຈັດຕັ້ງມະຫາຊົນ, ວຽກງານປ້ອງກັນ-ກວດກາ, ວຽກງານນະໂຍບາຍ-ປະກັນສັງຄົມ, ວຽກງານອົບຮົມ-ຫັດແອບ, ປັບປຸງລະບຽບແບບແຜນ ແລະ ວຽກງານພະລາທິການ-ເຕັກນິກ ພ້ອມກັນນີ້ ຍັງໄດ້ສຸມໃສ່ວຽກງານການປູກຝັງ-ລ້ຽງສັດໂດຍໃຊ້ທ່າແຮງບົ່ມຊ້ອມຂອງກົມກອງເພື່ອແກ້ໄຂຊີວິດການເປັນຢູ່ຂອງພະນັກງານ-ນັກຮົບໃຫ້ດີຂຶ້ນ. ໃນໄລຍະຜ່ານມາສາມາດປູກພືດຜັກຊະນິດຕ່າງໆໄດ້ 23,756 ກິໂລ, ປູກໄມ້ໃຫ້ໝາກ ແລະ ໄມ້ປະດັບ 4,812 ຕົ້ນ, ເຮັດສ່ວນມັນຕົ້ນໃນເນື້ອທີ 27,77 ເຮັກຕາ ຜົນໄດ້ຮັບ 278,735 ໂຕນ, ປູກເຂົ້ານາແຊງ ເນື້ອທີ 7,7 ເຮັກຕາ ຜົນໄດ້ຮັບ 30,750 ກິໂລ, ລ້ຽງສັດຊະນິດຕ່າງໆ ຈໍານວນໜຶ່ງ.
ໂອກາດດັ່ງກ່າວ, ສະຫາຍ ພັນເອກ ສົມໝາຍ ດອນພະຈັນ ກໍໄດ້ເນັ້ນໜັກໃຫ້ຄະນະພັກ-ຄະນະບັນຊາແຕ່ລະຂັ້ນຕ້ອງຍຶດໝັ້ນ, ຈັດຕັ້ງຜັນຂະຫຍາຍວຽກດັ່ງກ່າວກາຍເປັນສະຕິ, ຄວາມຮັບຜິດຊອບ, ເອົາໃຈໃສ່ປັບປຸງກໍ່ສ້າງກຳລັງໃຫ້ໜັກແໜ້ນເຂັ້ມແຂງ, ສືບຕໍ່ປົກປັກຮັກສາ, ເສີມຂະຫຍາຍທາດແທ້ມູນເຊື້ອອັນດີງາມຂອງກອງທັບ, ເພີ່ມທະວີຄວາມສາມັກຄີພາຍໃນ, ພາຍນອກໃຫ້ແໜ້ນແຟ້ນ, ຍົກສູງສະຕິລະວັງຕົວ, ເດັດດ່ຽວຕ້ານ ແລະ ສະກັດກັ້ນປາກົດການຫຍໍ້ທໍ້ຕ່າງໆທີ່ຈະເກີດຂຶ້ນໃຫ້ທັນເວລາ, ເພີ່ມທະວີໃນການກຽມພ້ອມສູ້ຮົບໃນພາວະຕ່າງໆ, ສືບຕໍ່ສືກສາອົບຮົມການເມືອງນຳພາແນວຄິດໃຫ້ພະນັກງານ-ນັກຮົບຮັບຮູ້ ແລະ ເຂົ້າໃຈແຈ້ງຕໍ່ທິດຊີ້ນຳ ແລະ ແຜນນະໂຍບາຍຂອງຂັ້ນເທິງວາງອອກ.
(ພາບ-ຂ່າວ: ຄຳຊາຍ ກວ່າງຄຸນສີ)
ຄໍາເຫັນ