ທ່ານ ລັດຖະມົນຕີກະຊວງ ກະສິກຳ ແລະ ສິ່ງແວດລ້ອມກ່າວວ່າ:ການຈັດຕັ້ງປະຕິບັດວຽກງານປູກຝັງຍັງບໍ່ທັນມີຄວາມເປັນເອກະພາບ ແລະ ປະສິດທິພາບເທົ່າທີ່ຄວນ ເນື່ອງຈາກຍັງບໍ່ມີກົດໝາຍ ຫຼື ນິຕິກຳໃຕ້ກົດໝາຍ ທີ່ກຳນົດສະເພາະວຽກງານດັ່ງກ່າວ, ຍັງອີງໃສ່ກົດໝາຍວ່າດ້ວຍກະສິກຳ (ປີ1998) ເປັນພື້ນຖານ ຊຶ່ງຖືກນໍາໃຊ້ມາ 27 ປີແລ້ວ, ຈຶ່ງເຫັນວ່າມີຫຼາຍດ້ານບໍ່ສອດຄ່ອງກັບສະພາບຄວາມເປັນຈິງທາງດ້ານເສດຖະກິດ-ສັງຄົມກໍຄືວຽກງານກະສິກຳ ໃນປັດຈຸບັນ ໂດຍສະເພາະການປະຕິບັດນະໂຍບາຍ ຮັບປະກັນຄວາມໝັ້ນຄົງທາງດ້ານສະບຽງອາຫານ, ໂພຊະນາການ ແລະ ການຜະລິດເປັນສິນຄ້າ ຕິດພັນກັບການຫັນເປັນອຸດສາຫະກຳທີ່ທັນສະໄໝ ຕາມທິດສີຂຽວ, ສະອາດ ແລະ ຍືນຍົງ, ປັບປຸງຊີວິດການເປັນຢູ່ ຂອງປະຊາຊົນລາວບັນດາເຜົ່າໃຫ້ດີຂຶ້ນ ປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ຂອງຊາດຕາມທິດ ສ້າງເສດຖະກິດເອກະລາດເປັນເຈົ້າຕົນເອງ.
ທ່ານ ລັດຖະມົນຕີກະຊວງກະສິກຳ ແລະ ສິ່ງແວດລ້ອມກ່າວຕື່ມວ່າ: ເຫດຜົນ ແລະ ຄວາມຈໍາເປັນ ໃນການສ້າງກົດໝາຍ ວ່າດ້ວຍການປູກຝັງ ເພື່ອຜັນຂະຫຍາຍວຽກງານຂອງກົດໝາຍວ່າດ້ວຍກະສິກຳ ທີ່ໄດ້ປະກາດໃຊ້ ໃນປີ 1998 ສະບັບເລກທີ 01/98 ສພຊ ລົງວັນທີ 10 ຕຸລາ 1998 ອອກເປັນອັນສະເພາະ ຊຶ່ງໄລຍະຜ່ານມາພວກເຮົາໄດ້ຜັນຂະຫຍາຍອອກເປັນວຽກງານລ້ຽງສັດ, ການປະມົງ ແລະ ຊົນລະປະທານ ແລ້ວ ແຕ່ຍັງບໍ່ມີກົດໝາຍວ່າດ້ວຍການປູກຝັງເປັນອັນສະເພາະ ທີ່ເປັນລະບົບຄົບຊຸດເພື່ອຄຸ້ມຄອງວຽກງານປູກຝັງ ເປັນຕົ້ນ ທີ່ດິນປູກຝັງ, ປັດໄຈການຜະລິດ, ການຜະລິດ, ການປຸງແຕ່ງ ແລະ ຕະຫຼາດ, ການນໍາເຂົ້າ-ສົ່ງອອກ, ການຄົ້ນຄວ້າທົດລອງດ້ານການປູກຝັງ ລວມທັງການກຳນົດນະໂຍບາຍ ສົ່ງເສີມວຽກງານດັ່ງກ່າວ,ປະຕິບັດແນວທາງປ່ຽນແປງໃໝ່ທີ່ມີຫຼັການຂອງພັກ ໂດຍສະເພາະທິດນໍາໃນການສ້າງເສດຖະກິດເອກະລາດ ເປັນເຈົ້າຕົນເອງ ກໍຄືການເສີມຂະຫຍາຍຄວາມເປັນເຈົ້າໃນການຜະລິດສະບຽງອາຫານ ແລະ ຜະລິດເປັນສິນຄ້າ,ເພື່ອຮັບປະກັນການຜະລິດກະສິກຳ ໃຫ້ມີຄວາມຍືນຍົງ ແລະ ປົກປັກຮັກສາສິ່ງແວດລ້ອມ, ຮັບປະກັນ ສະບຽງອາຫານໃຫ້ພຽງພໍ, ສະອາດ, ປອດໄພ ຕໍ່ສຸຂະພາບຂອງຜູ້ບໍລິໂພກ ແລະ ຜູ້ຜະລິດ,ເພື່ອເຮັດໃຫ້ການແບ່ງຂັ້ນຄຸ້ມຄອງ ແລະ ກວດກາວຽກງານປູກຝັງ ແຕ່ສູນກາງຮອດທ້ອງຖິ່ນ ໃຫ້ລະອຽດ ແລະ ຈະແຈ້ງຂຶ້ນກວ່າເກົ່າ ຊຶ່ງຈະເຮັດໃຫ້ການຈັດຕັ້ງປະຕິບັດວຽກງານປູກຝັງ ມີປະສິດທິພາບກວ່າເກົ່າ.
ກົດໝາຍສະບັບນີ້ ປະກອບມີ 9 ພາກ, 10ໝວດ ແລະ 100 ມາດຕາ,ຄາດຄະເນຜົນໄດ້ຮັບຈາກການສ້າງກົດໝາຍສະບັບນີ້ ຖືກຮອງຮັບ ແລະ ປະກາດໃຊ້ ແມ່ນຈະສາມາດຄຸ້ມຄອງວຽກງານປູກຝັງ ເຂົ້າສູ່ລະບົບ ແລະ ແທດເໝາະກັບສະພາບຄວາມຮຽກຮ້ອງຕົວຈິງ ຂອງ ສປປ ລາວ ສອດຄ່ອງກັບ ກົດໝາຍທີ່ຖືກຮັບຮອງໃໝ່ ເປັນຕົ້ນ ກົດໝາຍວ່າດ້ວຍການລ້ຽງສັດ ແລະ ສັດຕະວະແພດ (ສະບັບປັບປຸງ), ກົດໝາຍວ່າດ້ວຍການປ້ອງກັນ ແລະ ກັກກັນພືດ (ສະບັບປັບປຸງ), ກົດໝາຍວ່າດ້ວຍຊົນລະປະທານ ແລະ ກົດໝາຍວ່າດ້ວຍສັດນໍ້າ ແລະ ການປະມົງ, ກົດໝາຍວ່າດ້ວຍທີ່ດິນ (ສະບັບປັບປຸງ), ກົດໝາຍວ່າດ້ວຍການປົກປ້ອງຜູ້ຊົມໃຊ້, ກົດໝາຍ ວ່າດ້ວຍການປົກປັກຮັກສາສິ່ງແວດລ້ອມ ແລະ ກົດໝາຍວ່າດ້ວຍການສົ່ງເສີມການລົງທຶນ,ເພີ່ມປະສິດທິພາບ ແລະ ຄວາມເຂັ້ມງວດໃນການການຄຸ້ມຄອງ ແລະ ນໍາໃຊ້ດິນກະສິກຳ ຊຶ່ງກໍາລັງເປັນບັນຫາຂອງສັງຄົມທີ່ຕິດພັນກັບວຽກງານກະສິກຳໃນປັດຈຸບັນ, ວຽກງານປູກຝັງ ໄດ້ຮັບການພັດທະນາຢ່າງເປັນລະບົບ ຜ່ານການສໍາຫຼວດສະຖິຕິ ແລະ ກຳນົດແຜນຍຸດທະສາດ ໃນການພັດທະນາກະສິກຳລວມທັງມີການຄົ້ນຄວ້າການປູກຝັງ,ການປູກຝັງໄດ້ຮັບການສົ່ງເສີມຢ່າງຮອບດ້ານ ເພາະມີນະໂຍບາຍສົ່ງເສີມການປູກຝັງ ທີ່ຫຼາກຫຼາຍ ນອກນີ້, ການຜະລິດ ແມ່ນຈະຫັນໄປສູ່ການຜະລິດແບບກະສິກຳສະອາດ ໂດຍການສົ່ງເສີມທາງດ້ານເຕັກໂນໂລຊີ ແລະ ວິຊາການ, ສ້າງຄວາມເຊື່ອໝັ້ນໃຫ້ແກ່ຜູ້ດຳເນີນທຸລະກິດ ແລະ ຍາດແຍ່ງການຊ່ວຍເຫຼືອ, ກູ້ຢືມເງິນຕ່າງປະເທດ, ອົງການຈັດຕັ້ງສາກົນຕ່າງໆ ເຂົ້າໃນວຽກງານດັ່ງກ່າວ,ການແບ່ງຂັ້ນຄຸ້ມຄອງ ແລະ ກວດກາກິດຈະການ ການປູກຝັງ ແຕ່ສູນກາງ ຮອດທ້ອງຖິ່ນ ແມ່ນລະອຽດ ແລະ ຈະແຈ້ງຂຶ້ນກວ່າເກົ່າ ຊຶ່ງຈະເຮັດໃຫ້ ການຈັດຕັ້ງປະຕິບັດວຽກງານປູກຝັງ ມີປະສິດທິພາບກວ່າເກົ່າ(ຂ່າວ-ພາບ:ສຳນານ)
ຄໍາເຫັນ