ທ່ານ ວຽງທະວີສອນ ເທບພະຈັນ ກ່າວວ່າ: ໃນປີ 2026 ຜ່ານການຕິດຕາມ, ຊຸກຍູ້ ແລະ ກວດສອບຄືນການແກ້ໄຂຜົນການກວດສອບໃນຂົງເຂດທະນາຄານ ບັນຫາໄດ້ຮັບການແກ້ໄຂ: ທະນາຄານສົ່ງເສີມກະສິກຳ ຈຳກັດ ສາມາດເກັບຄືນເງິນກູ້ທີ່ປ່ອຍໃຫ້ບໍລິສັດເກີນທຶນຊັ້ນໜຶ່ງທັງໝົດ ຈໍານວນ 115.32 ຕື້ກີບ ເທົ່າກັບ 100% ຂອງແຜນການ; ທະນາຄານ 2 ແຫ່ງ (ທະນາຄານພັດທະນາລາວ, ຮ່ວມທຸລະກິດ ລາວ-ຫວຽດ) ໄດ້ແກ້ໄຂເງິນປ່ອຍກູ້ເກີນ 25% ຂອງທຶນຊັ້ນໜຶ່ງ ຈໍານວນ 6,841.35 ຕື້ກີບ. ດ້ວຍຮູບການເພີ່ມທຶນຊັ້ນໜຶ່ງຈາກ 3,066.83 ຕື້ກີບ ມາເປັນຈໍານວນ 4,475.15 ຕື້ກີບ, ເກັບກູ້ຄືນໄດ້ຈຳນວນ 3,204.40 ຕື້ກີບ, ຍັງມີຕົວເລກຍອດເຫຼືອຈໍານວນ 2,691.66 ຕື້ກີບ, ເຮັດໃຫ້ຕົວເລກຍອດເຫຼືອການປ່ອຍກູ້ຂອງແຕ່ລະສັນຍາຢູ່ໃນລະດັບບໍ່ເກີນ 25% ຂອງທຶນຊັ້ນໜຶ່ງ; ທະນາຄານ 3 ແຫ່ງ (ທະນາຄານສົ່ງເສີມກະສິກໍາ ຈໍາກັດ, ທະນາຄານການຄ້າຕ່າງປະເທດລາວ ມະຫາຊົນ ແລະ ທະນາຄານພັດທະນາຊົນນະບົດ ຫຼື ທະນາຄານນະໂຍບາຍ) ຈໍານວນ 72.25 ຕື້ກີບ, ຕົວເລກຫຼຸດລົງເປັນ 72.06 ຕື້ກີບ (ຫຼຸດລົງເນື່ອງຈາກອັດຕາແລກປ່ຽນ), ເກີດຂຶ້ນໃນປີ 852 ລ້ານກີບ ລວມເປັນເງິນຕ້ອງແກ້ໄຂ 72.90 ຕື້ກີບ, ໄດ້ແກ້ໄຂໄດ້ດ້ວຍຮູບການ: ເກັບໄດ້ຄືນຈໍານວນ 538 ລ້ານກີບ, ສານໄດ້ມີຄໍາຕັດສິນທີ່ໃຊ້ໄດ້ຢ່າງເດັດຂາດ ຈໍານວນ 58.07 ຕື້ກີບ; ຢູ່ໃນຂັ້ນຕອນຂະບວນການຍຸຕິທໍາ ຈໍານວນ 6.83 ຕື້ກີບ, ໄກ່ເກ່ຍ ທາງດ້ານເສດຖະກິດ ຈໍານວນ 7.04 ຕື້ກີບ ແລະ ຍັງຄ້າງ ຈໍານວນ 432 ລ້ານກີບ, ທະນາຄານສົ່ງເສີມກະສິກຳ ຈຳກັດ ໄດ້ມອບເງິນອາກອນກຳໄລ ຈໍານວນ 1.16 ຕື້ກີບ ເຂົ້າງົບປະມານແຫ່ງລັດຄົບຖ້ວນຕາມກົດໝາຍກໍານົດໄວ້.
ທ່ານ ວຽງທະວີສອນ ເທບພະຈັນ ກ່າວຕື່ມວ່າ: ສຳລັບບັນຫາທີ່ບໍ່ໄດ້ຮັບການແກ້ໄຂ: ທະນາຄານແຫ່ງ ສປປ ລາວ ແລະ ທະນາຄານທຸລະກິດ ຍັງບໍ່ໄດ້ເກັບກູ້ຄືນເງິນຕົ້ນທຶນ ແລະ ດອກເບ້ຍຕາມສັນຍາເງິນກູ້ຂອງລູກຄ້າທີ່ທະນາຄານປ່ອຍກູ້ເກີນທຶນຊັ້ນໜຶ່ງ, ຍັງບໍ່ໄດ້ເກັບເງິນຄືນຈາກການລັກໂລບຊຶ່ງລາຍລະອຽດມີດັ່ງນີ້: ທະນາ ຄານ 2 ແຫ່ງ (ທະນາຄານການຄ້າຕ່າງປະເທດລາວມະຫາຊົນ, ທະນາຄານສົ່ງເສີມກະສິກຳ ຈຳກັດ) ເງິນປ່ອຍກູ້ເກີນ 25% ຂອງທຶນຊັ້ນໜຶ່ງຈໍານວນ 4,738.05 ຕື້ກີບ, ປ່ອຍກູ້ເພີ່ມໃນປີ 2025 ຈໍານວນ 5,635.59 ຕື້ກີບ, ເກີນ 25% ຂອງທຶນຊັ້ນໜຶ່ງ ຈໍານວນ 5,501.77 ຕື້ກີບ, ເກັບກູ້ຄືນໄດ້ຈຳນວນ 272.27 ຕື້ກີບ, ຍັງມີຕົວເລກເກີນທຶນຊັ້ນໜຶ່ງ ຈໍານວນ 5,229.50 ຕື້ກີບ; ທະນາຄານແຫ່ງ ສປປ ລາວ ຍັງບໍ່ທັນສາມາດເລັ່ງທວງເອົາເງິນຄືນທີ່ຕົນ ໄດ້ຈ່າຍແທນບໍລິສັດພອນສັກ ໃນຖານະເປັນຜູ້ຄໍ້າປະກັນເງິນກູ້ ຈໍານວນ 2,177.90 ຕື້ກີບ; ບັນດາທະນາ ຄານບໍ່ໄດ້ກວດກາຄືນການຈັດຊື້-ຈັດຈ້າງວັດຖຸອຸປະກອນ, ເຄື່ອງຮັບໃຊ້, ພາຫະນະ ຈຳນວນ 7.98 ຕື້ກີບ ເພື່ອຢັ້ງຢືນຄວາມສົມເຫດສົມຜົນຂອງມູນຄ່າການຈັດຊື້-ຈັດຈ້າງ, ກວດກາຄວາມຮັບຜິດຊອບຂອງຄະນະຮັບຜິດຊອບວຽກງານດັ່ງກ່າວ ເພື່ອພິຈາລະນາມາດຕະການທາງດ້ານລົງວິໄນຕາມແຕ່ລະກໍລະນີ; ທະນາຄານ 2 ແຫ່ງ ແລະ 1 ສະຖາບັນ (ທະນາຄານແຫ່ງ ສປປລາວ, ທະນາຄານພັດທະນາຊົນນະບົດ, ສະຖາບັນການທະນາຄານ) ບໍ່ໄດ້ມອບເງິນອາກອນມູນຄ່າເພີ່ມ 10% ຈາກການຊື້ສິນຄ້າ ແລະ ການບໍລິການຈາກທາງນອກ ທີ່ບໍ່ໄດ້ນໍາໃຊ້ໃບບິນອາກອນຖືກຕ້ອງຕາມກົດໝາຍ ແລະ ລະບຽບການ ຈໍານວນ 656 ລ້ານກີບ ເຂົ້າງົບປະມານແຫ່ງລັດ; ທະນາ ຄານ 2 ແຫ່ງ (ທະນາຄານພັດທະນາລາວ ຈໍາກັດ ແລະ ທະນາຄານສົ່ງເສີມກະສິກໍາ ຈໍາກັດ) ບໍ່ໄດ້ຕິດຕາມ, ກວດກາສະພາບການປະຕິບັດເງື່ອນໄຂສັນຍາເງິນກູ້ຈໍານວນ 5 ສັນຍາ ທີ່ປ່ອຍເກີນ 25% ຂອງທຶນຊັ້ນໜຶ່ງມູນຄ່າ 2,301.11 ຕື້ກີບ ແລະ ປ່ອຍເກີນຫຼັກຊັບຄໍ້າປະກັນຈຳນວນ 4 ສັນຍາ ມູນຄ່າ 392.37 ຕື້ກີບ ເຮັດໃຫ້ບໍ່ສາມາດຈໍາແນກໄດ້ປະສິດທິພາບ, ປະສິດທິຜົນຂອງການນໍາໃຊ້ເງິນກູ້ດັ່ງກ່າວ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ