ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ຊີ້ແຈງຕໍ່ຄຳຊັກຖາມຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 7 ຕຸລານີ້, ທີ່ສະພາແຫ່ງຊາດ ໂດຍການເປັນປະທານຂອງທ່ານ ສອນໄຊ ສີພັນດອນ ປະທານສະພາແຫ່ງຊາດ.
ທ່ານລັດຖະມົນຕີກະຊວງ ອຄ ໄດ້ຊີ້ແຈງບາງຄຳຊັກຖາມຂອງ ສສຊ ໂດຍສະເພາະການຊຸກຍູ້ສົ່ງເສີມການຜະລິດ, ປຸງແຕ່ງແຮ່ທາດມູນຄ່າເພີ່ມ ແລະ ຮັບໃຊ້ພາຍໃນຕາມທິດເສດຖະກິດເອກກະລາດ ເປັນເຈົ້າຕົນເອງ(ສອຈ) ຕໍ່ບັນຫາດັ່ງກ່າວ ໃນໄລຍະຜ່ານມາ ໄດ້ມີນະໂຍບາຍສົ່ງເສີມການປຸງແຕ່ງແຮ່ທາດ ເພື່ອສ້າງມູນຄ່າເພີ່ມ, ແຕ່ໃນພາກປະຕິບັດ ການພັດທະນາແຮ່ທາດໃນໄລຍະຜ່ານມາ ຍັງມີທ່າອ່ຽງເນັ້ນການສົ່ງອອກວັດຖຸດິບເປັນຕົ້ນຕໍ ເພື່ອສ້າງລາຍຮັບມາແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເຮັດໃຫ້ການນໍາໃຊ້ຊັບພະຍາກອນບໍ່ທັນຄຸ້ມຄ່າ, ເພື່ອປະຕິບັດຕາມມະຕິ 04/ກມສພ ວ່າດ້ວຍການສ້າງເສດຖະກິດເອກະລາດ ເປັນເຈົ້າຕົນເອງ (ສອຈ), ລັດຖະບານໄດ້ວາງທິດທາງຫຼຸດຜ່ອນ ແລະ ກ້າວໄປສູ່ການຍຸດຕິ ການສົ່ງອອກແຮ່ດິບ, ໃນຂະນະດຽວກັນ ໃນໄລຍະ 1 ປີຜ່ານມາ ພາຍຫຼັງໂຮມກະຊວງ ອຄ ແລະ ກພບ ເຂົ້າກັນ, ກະຊວງ ອຄ ກໍພະຍາຍາມສືບຕໍ່ ຫັນທິດການພັດທະນາແຮ່ທາດໃຫ້ໄປຕາມວິໄສທັດທີ່ຍຸດທະສາດ ປີ 2023 ໄດ້ກຳນົດຄື: “ພັດທະນາວຽກງານທໍລະນີສາດ ແລະ ບໍ່ແຮ່ ຕາມທິດຫັນເປັນອຸດສາຫະກຳທັນສະໄໝ ແລະ ນໍາໃຊ້ທ່າແຮງຊັບພະຍາກອນແຮ່ທາດ ຢ່າງໂປ່ງໃສ, ເປັນມືອາຊີບ, ປະຢັດ, ມີປະສິດທິພາບ ແລະ ປະສິດທິຜົນສູງ, ຕາມເປົ້າໝາຍການພັດທະນາສີຂຽວ ແລະ ຍືນຍົງ” ຊຶ່ງຄວາມຄືບໜ້າທີ່ສໍາຄັນ ກໍລວມເຖິງ: ການສ້າງດໍາລັດ ເລກທີ 314/ນຍ ວ່າດ້ວຍນິຄົມອຸດສາຫະກຳອາຊີໂປຕາສ ເພື່ອເປັນຕົ້ນແບບການສ້າງຕ່ອງໂສ້ມູນຄ່າອຸດສາຫະກຳແຮ່ທາດຄົບວົງຈອນ; ປັບປຸງກົດໝາຍວ່າດ້ວຍແຮ່ທາດ ສະບັບ ປີ 2017 ທີ່ຈະນໍາສະເໜີຕໍ່ສະພາແຫ່ງຊາດໃນຕົ້ນປີ 2027 ນີ້; ສ້າງຮ່າງຄໍາສັ່ງນາຍົກລັດຖະມົນຕີ ວ່າດ້ວຍການປັບປຸງນະໂຍບາຍ ແລະ ເພີ່ມທະວີການຄຸ້ມຄອງການພັດທະນາແຮ່ທາດໃນໄລຍະໃໝ່ ຊຶ່ງໄດ້ກຳນົດນະໂຍບາຍບັງຄັບໃຫ້ໂຄງການໃໝ່ທຸກໂຄງການຕ້ອງສ້າງໂຮງງານປຸງແຕ່ງ ແລະ ຫ້າມສົ່ງອອກແຮ່ດິບຢ່າງເດັດຂາດ ຊຶ່ງຄໍາສັ່ງດັ່ງກ່າວຄາດວ່າຈະອອກມາໃນເດືອນນີ້ ພາຍຫຼັງໄດ້ສົ່ງຮັບຄໍາເຫັນຈາກຄະນະປະຈຳສະພາແຫ່ງຊາດ ແລະ ກອງປະຊຸມສູນກາງຄົບຄະນະວິສາມັນໃນອາທິດຜ່ານມາ.
ທ່ານ ລັດຖະມົນຕີ ກະຊວງ ອຄ ໄດ້ເນັ້ນວ່າ: ເພື່ອສ້າງບາດກ້າວບຸກທະລຸ ແລະ ແກ້ໄຂສິ່ງທ້າທາຍດັ່ງກ່າວ, ກະຊວງ ອຄ ໄດ້ສະເໜີນະໂຍບາຍ ຊຶ່ງໄດ້ກຳນົດໃນຮ່າງຄໍາສັ່ງວ່າດ້ວຍການປັບປຸງນະໂຍບາຍ ແລະ ເພີ່ມທະວີ ການຄຸ້ມຄອງການພັດທະນາແຮ່ທາດໃນໄລຍະໄໝ່ ດັ່ງນີ້: ກຳນົດມາດຕະຖານ 10 ຂໍ້ ທີ່ເຂັ້ມງວດໃນການຄັດເລືອກນັກລົງທຶນ: ຕ້ອງເປັນມືອາຊີບ, ມີຖານະການເງິນເຂັ້ມແຂງ, ມີເງື່ອນໄຂ, ຕ້ອງປຸງແຕ່ງ, ຕ້ອງເປີດເຜີຍເຈົ້າຂອງກຳມະສິດທີ່ແທ້ຈິງ (UBO) ໂດຍຫ້າມນໍາໃຊ້ຕົວແທນບັງໜ້າຢ່າງເດັດຂາດ. ປະມູນໂຄງການຢ່າງໂປ່ງໃສ 100%, ດໍາເນີນການປະມູນໃນ 3 ເຂດພື້ນທີ່ຄື: ເຂດທີ່ມີຂໍ້ມູນແຮ່, ເຂດສົ່ງເນື້ອທີ່ຄືນ ແລະ ເຂດທີ່ລັດຖະບານຖອນໃບອະນຸ ຍາດ (ຫ້າມບໍລິສັດກຸ່ມ C ແລະ C+ ເຂົ້າຮ່ວມປະມູນເດັດຂາດ), ວາງແຜນຢຸດຕິການສົ່ງອອກແຮ່ດິບຢ່າງຊັດເຈນ,ແຮ່ທາດຫາຍາກ (Rare Earth), ຢຸດຕິການອະນຸຍາດໂຄງການໃໝ່ຢ່າງເດັດຂາດ, ຫີນກາວ, ບາຣິດ, ອັງຕີມອນ, ໂກບານ, ຕັ້ງສະເຕນ, ນິແກນ, ຢຸດຕິການອະນຸຍາດໃໝ່ ແລະ ວາງແຜນຢຸດຕິ ການສົ່ງອອກແຮ່ດິບທັງໝົດພາຍໃນປີ 2030, ໂຄງການທີ່ອະນຸມັດຜ່ານມາ ກະຊວງ ອຄ ຈະສ້າງແຜນຫຼຸດຜ່ອນການສົ່ງອອກແຮ່ດິບສະເໜີລັດຖະບານພາຍໃນທ້າຍປີ 2026. (ຂ່າວ-ພາບ: ສຳນານ)
ຄໍາເຫັນ