ກອງປະຊຸມຄັ້ງນີ້, ເພື່ອປະເມີນຜົນສຳເລັດຂອງປີ 2024 ແລະ ວາງຍຸດທະສາດການຈັດຕັ້ງປະຕິບັດກິດຈະກຳຕ່າງໆໃຫ້ມີປະສິດທິພາບ ແລະ ປະສິດທິຜົນໃນປີ 2025 ແລະ 2026; ແຜນງານການຮ່ວມມື ຄັ້ງທີ 7 (2022-2026) ແມ່ນໄດ້ຮັບການຈັດຕັ້ງປະຕິບັດໂດຍຜ່ານແຜນການເຮັດວຽກປະຈໍາປີ ຊຶ່ງໄດ້ຖືກພັດທະນາຂຶ້ນໂດຍຜ່ານຂະບວນການປຶກສາຫາລື ເພື່ອຮັບປະກັນການນຳໃຊ້ຊັບພະຍາກອນຢ່າງມີປະສິດທິພາບ ແລະ ບັນລຸຜົນສຳເລັດ. ແຜນງານການຮ່ວມມືເຫຼົ່ານີ້, ໄດ້ຜ່ານການທົບທວນຢ່າງເຂັ້ມງວດໂດຍຜ່ານກົນໄກການທົບທວນຄືນຈາກພາກສ່ວນກ່ຽວຂ້ອງ ແລະ ການຕິດຕາມເປັນລາຍໄຕມາດ, ກາງປີ ແລະ ປະຈໍາປີ. ໃນຂະນະທີ່ການທົບທວນຄືນສອງຝ່າຍກັບຄູ່ຮ່ວມງານຈັດຕັ້ງປະຕິບັດ (IPs) ໃຫ້ຄວາມເຂົ້າໃຈຢ່າງເລິກເຊິ່ງກ່ຽວກັບຜົນສຳເລັດ, ການທົບທວນປະຈໍາປີຮ່ວມກັນນີ້ແມ່ນໃຫ້ພາບລວມຂອງຜົນຂອງໂຄງການ, ສິ່ງທ້າທາຍ, ແລະ ໂອກາດຕ່າງໆ ຊຶ່ງສົ່ງເສີມການຈັດຕັ້ງປະຕິບັດ ແລະ ການຮ່ວມມືທີ່ດີຂຶ້ນ.
ກອງປະຊຸມໄດ້ທົບທວນການຈັດຕັ້ງປະຕິບັດແຜນງານການຮ່ວມມື ປີ 2024 ແລະ ຄວາມຄືບໜ້າໃນການບັນລຸຜົນສໍາເລັດ, ນໍາສະເໜີຜົນການຄົ້ນພົບ ແລະ ຂໍ້ສະເໜີແນະທີ່ສໍາຄັນຈາກການທົບທວນກາງສະໄໝ (MTR) ຂອງກອບແຜນງານການຮ່ວມມື (CPF) 2022-2026 ເພື່ອນໍາພາການວາງແຜນໃນອະນາຄົດ ແລະ ເປັນຂໍ້ມູນສໍາລັບການພັດທະນາແຜນງານການຮ່ວມມື ຄັ້ງທີ 8. ການປຶກສາຫາລືຍັງໄດ້ສະຫຼຸບກິດຈະກໍາທີ່ມີຜົນກະທົບສູງສໍາລັບແຜນການເຮັດວຽກປີ 2025, ປຶກສາຫາລືກ່ຽວກັບສິ່ງທ້າທາຍ ແລະ ຄວາມສ່ຽງຕ່າງໆ ເພື່ອກໍານົດມາດຕະການຫຼຸດຜ່ອນ, ກໍານົດໂອກາດ ແລະ ຂໍ້ປະຕິບັດທີ່ດີ ແລະ ທົບທວນຜົນການກວດສອບ HACT ທົ່ວໄປ ແລະ ຜົນການກວດກາສະເພາະຈຸດພ້ອມບົດຮຽນທີ່ໄດ້ຮັບ ຊຶ່ງນຳໄປສູ່ການຕົກລົງຍຸດທະສາດທີ່ເໝາະສົມເພື່ອປັບປຸງການຈັດຕັ້ງປະຕິບັດໂຄງການ.
ທ່ານນາງ ພອນວັນ ອຸທະວົງ ໄດ້ກ່າວວ່າ: “ການເຕົ້າໂຮມກັນຂອງພວກເຮົາໃນມື້ນີ້ມີຄວາມສໍາຄັນຢ່າງຍິ່ງ ເພາະພວກເຮົາຈະປະເມີນຜົນສໍາເລັດຂອງປີທີ 3 ຂອງໂຄງການຮ່ວມມືທີ 7 ລະຫວ່າງລັດຖະບານລາວ ແລະ ອົງການ FAO (2022-2026)”. ພ້ອມນີ້, ກໍໄດ້ສະແດງຄວາມຂອບໃຈຕໍ່ອົງການ FAO ສໍາລັບ “ການຮ່ວມມື ແລະ ການສະໜັບສະໜູນອັນມີຄ່າໃນການປັບປຸງຂະແໜງກະສິກໍາ, ຄວາມໝັ້ນຄົງທາງດ້ານສະບຽງອາຫານ, ໂພຊະນາການ ແລະ ການຄຸ້ມຄອງຊັບພະຍາກອນທໍາມະຊາດແບບຍືນຍົງໃນ ສປປ ລາວ”. ນອກນີ້, ກໍໄດ້ເນັ້ນໜັກເຖິງຄວາມຄືບໜ້າທີ່ສໍາຄັນໃນ 3 ບຸລິມະສິດຫຼັກຂອງແຜນງານການຮ່ວມມື (CPF): ຊີວິດການເປັນຢູ່ຂອງປະຊາຊົນ, ຄວາມຈະເລີນຮຸ່ງເຮືອງແບບລວມສູນ ແລະ ສິ່ງແວດລ້ອມ, ການປ່ຽນແປງດິນຟ້າອາກາດ ແລະ ຄວາມທົນທານຕໍ່ໄພພິບັດ, ເຖິງວ່າຈະມີສິ່ງທ້າທາຍທາງດ້ານເສດຖະກິດທີ່ຫຍຸ້ງຍາກໃນໄລຍະຜ່ານມາ. ໃນການເບິ່ງໄປຂ້າງໜ້າ, ທ່ານໄດ້ກ່າວວ່າ: “ກອງປະຊຸມໃນມື້ນີ້ຈະເປັນໂອກາດສໍາຄັນທີ່ຈະທົບທວນຜົນສໍາເລັດທີ່ຜ່ານມາ, ແລກປ່ຽນບົດຮຽນທີ່ໄດ້ຮັບ ແລະ ກໍານົດສິ່ງທ້າທາຍທີ່ຍັງເຫຼືອ ແລະ ບຸລິມະສິດສໍາລັບແຜນການເຮັດວຽກປີ 2025”.
ທ່ານນາງ ຄະຢອງ ມີ ຄິມ ໄດ້ກ່າວຍ້ອງຍໍຊົມເຊີຍຜົນສໍາເລັດທີ່ສໍາຄັນໃນຂະແໜງກະສິກໍາໃນຊຸມປີທີ່ຜ່ານມາຊຶ່ງລວມເຖິງອັດຕາການເຕີບໂຕຂອງຂະແໜງກະສິກໍາ ແລະ ປ່າໄມ້ທີ່ 4.1% ໃນປີຜ່ານມາ (ສູງກວ່າເປົ້າໝາຍລະດັບຊາດທີ່ 2.6%), ແລະ ປະກອບສ່ວນ 18.9% ຕໍ່ GDP ຂອງຊາດ. ທ່ານນາງ ຄິມ ຍັງໄດ້ຮັບຮູ້ເຖິງສິ່ງທ້າທາຍທີ່ຍັງຄົງຄ້າງເຊັ່ນ: ການຜະລິດກະສິກໍາໂດຍທົ່ວໄປແມ່ນອີງໃສ່ປັດໄຈທໍາມະຊາດ ຊຶ່ງເຮັດໃຫ້ຜົນຜະລິດໂດຍລວມຕໍ່າ, ຜົນກະທົບຂອງການປ່ຽນແປງດິນຟ້າອາກາດ, ພື້ນຖານໂຄງລ່າງຊົນລະປະທານທີ່ບໍ່ມີປະສິດທິພາບ, ການຫັນປ່ຽນຈາກການກະສິກໍາເພື່ອການດໍາລົງຊີວິດໄປສູ່ການປະຕິບັດກະສິກໍາທີ່ທັນສະໄໝຊ້າ ແລະ ການຫຼຸດລົງຂອງຄວາມອຸດົມສົມບູນຂອງດິນ. ໃນການຢັ້ງຢືນຄືນຄວາມມຸ່ງໝັ້ນຂອງ ອົງການ FAO, ທ່ານກ່າວວ່າ: “ອົງການ FAO ມຸ່ງໝັ້ນທີ່ຈະສະໜັບສະໜູນລັດຖະບານໃນການບັນລຸວາລະແຫ່ງຊາດດ້ານກະສິກໍານີ້”. ພ້ອມນີ້, ຍັງສົ່ງຂ່າວດີຂອງອົງການ FAO ແລະ ອົງການສະຫະປະຊາຊາດອື່ນໆສາມາດເຂົ້າເຖິງກອງທຶນຮ່ວມ SDG ຂອງສະຫະປະຊາຊາດສໍາລັບການຫັນປ່ຽນລະບົບອາຫານ, ໂດຍກ່າວວ່າ: “ພວກເຮົາຫວັງວ່າໂອກາດນີ້, ຈະເປັນຈຸດເລີ່ມຕົ້ນທີ່ດີທີ່ຈະຂະຫຍາຍຄວາມພະຍາຍາມຂອງ ສປປ ລາວ ເພື່ອລະບົບອາຫານ ແລະ ກະສິກໍາທີ່ຍືນຍົງ ແລະ ມີຄວາມທົນທານຫຼາຍຂຶ້ນ”.
(ຂ່າວ: ສຸກສະຫວັນ, ພາບ: FAO)
ຄໍາເຫັນ