 |
ຜູ້ແທນກອງປະຊຸມເຂົ້າຮ່ວມ ປະກອບມີ: ສະພາແຫ່ງຊາດ, ບັນດາກະຊວງຂະແໜງການ, ອົງການທຽບເທົ່າລວມທັງ 17 ແຂວງ ແລະ ນະຄອນຫຼວງວຽງຈັນ, ບັນດາຜູ້ແທນລະດັບສູງ ຈາກປະເທດເພື່ອນມິດ, ຄູ່ຮ່ວມພັດທະນາ ແລະ ອົງການຈັດຕັ້ງສາກົນ ທັງທີ່ມີສໍານັກງານ/ອົງການຕັ້ງຢູ່ ສປປ ລາວ ແລະ ບໍ່ໄດ້ຕັ້ງຢູ່ ສປປ ລາວ, ອົງການຈັດຕັ້ງທາງສັງຄົມ, ພາກເອກະຊົນ, ສະມາຄົມບໍ່ຫວັງຜົນກຳໄລ ແລະ ພາກສ່ວນທີ່ກ່ຽວຂ້ອງອື່ນໆເຂົ້າຮ່ວມ.
ທ່ານ ສັນຕິພາບ ພົມວິຫານ ໄດ້ກ່າວຕື່ມວ່າ: ປີ 2025 ເປັນປີທີ່ມີຄວາມໝາຍຄວາມສໍາຄັນຢ່າງຍິ່ງ, ເນື່ອງຈາກເປັນປີມ້ວນທ້າຍຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ແລະ ເປັນປີສ້າງຄວາມພ້ອມໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງ ທີ X ປີ 2026-2030. ພ້ອມດຽວກັນນີ້, ໄດ້ສຸມໃສ່ຈັດຕັ້ງປະຕິບັດປີມ້ວນທ້າຍຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ຄ່ຽງຄູ່ກັນນີ້, ລັດຖະບານ ສປປ ລາວ ກໍຍັງສືບຕໍ່ເອົາໃຈໃສ່ຈັດຕັ້ງຜັນຂະຫຍາຍບັນດາເປົ້າໝາຍຕ່າງໆ ຂອງການພັດທະນາແບບຍືນຍົງ (SDGs) ໂດຍສະເພາະການຈັດຕັ້ງປະຕິບັດເປົ້າໝາຍຕິດພັນກັບການປັບປຸງສະພາບເສດຖະກິດໃຫ້ມີຄວາມໝັ້ນທ່ຽງ-ຍືນຍົງ ແລະ ຊັບສິນດ້ານມະນຸດທີ່ເຫັນວ່າເປັນສິ່ງທ້າຍໃນການພັດທະນາປະເທດ, ລວມທັງການຈັດຕັ້ງປະຕິບັດແຜນຍຸດທະສາດການຂ້າມຜ່ານ ຂອງ ສປປ ລາວ ເພື່ອອອກຈາກສະຖານະພາບດ້ອຍພັດທະນາ (LDC) ໃນປີ 2026 ແລະ ຫຼັງປີ 2026 ທີ່ເປັນວຽກບຸລິມະສິດສໍາຄັນທີ່ພວກເຮົາຕ້ອງໄດ້ເອົາໃຈໃສ່.
ທ່ານ ບັກໂຄເດັຍ ເປີຄະນ໋ອຟ ຜູ້ປະສານງານອົງການສະຫະປະຊາຊາດ ປະຈຳ ສປປ ລາວ ໄດ້ກ່າວວ່າ: ກອງປະຊຸມແມ່ນວາລະທີ່ສໍາຄັນເປັນພິເສດ ໃນຂະນະທີ່ພວກເຮົາສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ສຳເລັດການສ້າງແຜນຄັ້ງທີ 10 ແລະ ກະກຽມການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ (LDC) ຂອງ ສປປ ລາວ ໃນປີ 2026. ແຜນພັດທະນາເສດຖະກິດ-ສັງຄົມ ແຫ່ງຊາດຄັ້ງທີ 10 ໄດ້ຜ່ານຂະບວນການສ້າງແຜນທີ່ຄົບຖ້ວນ, ໂດຍຮ່າງທີ 5 ໄດ້ຖືກນໍາສະເໜີໃນຕົ້ນເດືອນນີ້. ວິໄສທັດຂອງແຜນຄັ້ງທີ 10 ແມ່ນການສ້າງ ສປປ ລາວ ໃຫ້ມີຄວາມຍືດຍຸ່ນ, ເປັນເຈົ້າຕົນເອງ ແລະ ຍືນຍົງ ຊຶ່ງຄວາມມຸ່ງມາດປາຖະໜານີ້ ຖືກສະໜັບສະໜູນໂດຍເອກະສານປະກອບສອງສະບັບ ຄື: ກອບການຕິດຕາມ ແລະ ປະເມີນຜົນ ແລະ ຍຸດທະສາດດ້ານການເງິນ. ກອບການຕິດຕາມ ແລະ ປະເມີນຜົນ (M&E), ສໍາລັບແຜນຄັ້ງທີ 10 ຈະສ້າງຄວາມເຂັ້ມແຂງໃຫ້ແກ່ການນໍາໃຊ້ການວັດແທກທີ່ອີງໃສ່ຜົນໄດ້ຮັບ ແລະ ສົ່ງເສີມການເຂົ້າເຖິງຂໍ້ມູນຂ່າວສານ ແລະ ຄວາມໂປ່ງໃສຂອງຂະບວນການພັດທະນາແຫ່ງຊາດ. ກະດານຕິດຕາມການຕິດຕາມ ແລະ ປະເມີນຜົນ (Dashboard M&E) ເພື່ອຕິດຕາມຄວາມຄືບໜ້າຂອງ NSEDP ປັດຈຸບັນກໍາລັງຖືກອອກແບບ. ຍຸດທະສາດດ້ານການເງິນ ເປັນເຄື່ອງມືເພື່ອຮັບປະກັນວ່າບຸລິມະສິດຂອງແຜນຄັ້ງທີ 10 ໄດ້ຮັບການຈັດສັນຊັບພະຍາກອນ ແລະ ການຄາດຄະເນຄ່າໃຊ້ຈາຍຢ່າງເໝາະສົມ, ການຄາດຄະເນເບື້ອງຕົ້ນຊີ້ໃຫ້ເຫັນວ່າ ຊ່ອງວ່າງການສະໜອງທຶນສໍາລັບ NSEDP ຄັ້ງທີ 10 ແມ່ນຢູ່ລະຫວ່າງ 8-11 ໂດລາ ຕໍ່ກັບສະພາບການດັ່ງກ່າວນີ້, ຍຸດທະສາດ້ານການເງິນມີເປົ້າໝາຍເພື່ອຮັບປະກັນການສະໜອງທຶນກວ້າງຂວາງກວ່າເກົ່າ ຊຶ່ງມີຈຸດປະສົງເພື່ອເສີມຂະຫຍາຍການຮ່ວມມືລະຫວ່າງລັດຖະບານ ແຫ່ງ ສປປ ລາວ ແລະ ບັນດາຄູ່ຮ່ວມພັດທະນາ ເພື່ອສະໜັບສະໜູນການພັດທະນາແບບຍືນຍົງ ແລະ ມີສ່ວນຮ່ວມ. ເນັ້ນໜັກໃຫ້ມີການລະດົມທຶນພາຍໃນ, ການລົງທຶນຈາກຕ່າງປະເທດ, ການຖ່າຍທອດຄວາມຮູ້ ແລະ ເຕັກໂນໂລຊີ ແລະ ການມີສ່ວນຮ່ວມຂອງພາກເອກະຊົນ ແລະ ການຈັດຕັ້ງທາງສັງຄົມໃນຖານະຄູ່ຮ່ວມພັດທະນາ ຖະແຫຼງການສະບັບໃໝ່ນີ້ຈະສະແດງໃຫ້ເຫັນເຖິງຄໍາໝັ້ນໝາຍຮ່ວມໃນການເພີ່ມທະວີການຮ່ວມມືເພື່ອການພັດທະນາ ເພື່ອຜົນສໍາເລັດດ້ານການພັດທະນາທີ່ດີຂຶ້ນໃນ ສປປ ລາວ.
ຂ່າວ-ພາບ: ບຸນອູ້ມ
ຄໍາເຫັນ