ປະຊາຊົນແຂວງຫຼວງພະບາງໄດ້ຮັບການຜ່າຕັດແກ່ນຕາຂຸ້ນໂດຍບໍເສຍຄ່າ

ທ່ານ ພູວະນາ ອານຸລັກຄຳ ອຳນວຍການໂຮງໝໍແຂວງຫຼວພະບາງກ່າວວ່າ: ໃນລະຫວ່າງວັນທີ 21-23 ຕຸລາ 2025ຜ່ານມາ ໄດ້ມີການກວດວັດສາຍຕາ ແລະ ແຈກແວ່ນຕາ ໃຫ້ປະຊາຊົນແຂວງຫຼວງພະບາງ 3,000 ອັນ ແລະ ໄດ້ກວດພົບປະຊາຊົນເປັນພະຍາດແກ່ນຕາຂຸ້ນຈໍານວນ 116 ຄົນ ໂດຍແມ່ນ ທິມງານແພດໝໍຜ່າຕັດແກ່ນຕາຂຸ້ນ ຈາກສູນປີ່ນປົວຕາແຫ່ງຊາດ ປະເທດສິງຫະໂປ ໄດ້ລົງມາກວດ ແລະສ້ອມແປງເຄື່ອງຜ່າຕັດແກ່ນຕາຢູ່ໂຮງໝໍແຂວງຫຼວງພະບາງ ພ້ອມທັງໄດ້ສອນວິທີການສ້ອມແປງ ອຸປະກອນປີ່ນປົວ ໃຫ້ໂຮງໝໍແຂວງ. ສ່ວນວັນທີ 24-25 ໄດ້ກວດກຸ່ມເປົ້າໝາຍທີ່ເປັນພະຍາດແກ່ນຕາຂຸ້ນຄືນ ແລະ ລົງທະບຽນ ເຂົ້າຮັບການຜ່າຕັດ ຊຶ່ງມີທັງໝົດ 140 ຄົນ.

ມາຮອດວັນທີ 26 ຕຸລາ ທິມງານແພດໝໍ ຜ່າຕັດແກ່ນຕາຂຸນ ຈາກສູນປິ່ນປົວຕາແຫ່ງຊາດປະເທດສິງຫະໂປ ໄດ້ເລີ່ມການຜ່າຕັດແກ່ນຕາຂຸ້ນໃຫ້ປະຊາຊົນ ແລະ ການຜ່າຕັດຈະດຳເນີນໄປເຖິງວັນທີ 30 ຕຸລາຈິ່ງຈະສໍາເລັດ ພ້ອມທັງກວດເຊັກ ສາຍຕາໃຫ້ປະຊາຊົນຄືນ ຕື່ມອີກ. ທັງໝົດນີ້ ກໍເພື່ອໃຫ້ປະຊາຊົນສາມາເຂົ້າເຖິງລະບົບການຮັກສາສຸຂະພາບຕາ ທີ່ມີຄວາມສະເໝີພາບ ແລະ ຍືນຍົງ, ປັບປຸງຄຸນນະພາບ ການຮັກສາສຸຂະພາບຕາຂອງປະຊາຊົນ ໃນທົ່ວປະເທດລາວ ໂດຍສະເພາະແມ່ນການສຶກສາ, ປັບປຸງ ແລະ ພັດມທະນາພື້ນຖານໂຄງລ່າງຢູ່ທ້ອງຖິ່ນ ເພື່ອໃຫ້ການຮັກສາສຸຂະພາບຕາ ທີ່ດີສາມາດເຂົ້າເຖີງໄດ້ທຸກຄົນ.

(ພາບ-ຂ່າວໂດຍ: ດາວອນ ມະນີວັນ)