 |
ພະຍາດອະຫິວາໝູອາຟຣິກກາແມ່ນພະຍາດທີ່ເກີດຈາກເຊື້ອໄວຣັສ ຊຶ່ງສາມາດຕິດເຊື້ອໃນໝູ ລ້ຽງ ແລະ ໝູປ່າ. ພະຍາດນີ້ ສາມາດແຜ່ລາມໄດ້ຢ່າງໄວວາໃນກຸ່ມປະຊາກອນໝູ ແລະ ສາມາດເຮັດໃຫ້ໝູຕາຍເປັນຈໍານວນຫຼາຍ. ພ້ອມນີ້, ຍັງສົ່ງຜົນກະທົບຢ່າງໜັກຕໍ່ຜູ້ລ້ຽງໝູ, ຂະແໜງລ້ຽງສັດ ແລະ ເສດຖະກິດໂດຍລວມ. ພະຍາດອະທິວາໝູອາຟຣິກກາ ຍັງເປັນພະຍາດທີ່ຕິດຕໍ່ຈາກສັດສູ່ສັດ ແລະ ບໍ່ສາມາດຕິດຕໍ່ຈາກສັດສູ່ຄົນໄດ້. ໝາຍຄວາມວ່າປະຊາຊົນບໍ່ສາມາດຕິດເຊື້ອພະຍາດນີ້ຈາກການສໍາຜັດໝູ, ກິນຊີ້ນໝູ ຫຼື ຜະລິດຕະພັນຈາກໝູໄດ້. ໝູທີ່ເປັນພະຍາດອະຫິວາໝູອາຟຣິກກາ ຈະມີອາການຖອກທ້ອງ, ເປັນຕຸ່ມ, ມີຜື່ນແດງຕາມຕົນໂຕ, ຫູ, ທ້ອງ, ຜີວໜັງໝູ, ໝູບໍ່ກິນອາຫານ, ບໍ່ກິນນໍ້າ ແລ້ວຈະຕາຍແບບກະທັນຫັນ ໃນທີ່ສຸດ.
 |
ດັ່ງນັ້ນ, ຖ້າຫາກຮູ້ວ່າໝູຂອງທ່ານ ມີການຕິດເຊື້ອພະຍາດດັ່ງກ່າວບໍ່ຄວນຂ້າ, ຄົວ, ບໍ່ໃຫ້ມີການເຄື່ອນຍ້າຍເດັດຂາດ, ເຖິງແມ່ນວ່າພະຍາດດັ່ງກ່າວບໍ່ສາມາດຕິດເຊື້ອສູ່ຄົນໄດ້ ແຕ່ຄົນເຮົາກໍບໍ່ຄວນກິນຊີ້ນໝູ ທີ່ເປັນພະຍາດດັ່ງກ່າວແບບສຸກໆດິບໆເດັດຂາດ ເພາະຈະເປັນພະຍາດອື່ນສູ່ຄົນເຮົາໄດ້ ໂດຍສະເພາະພະຍາດແມ່ທ້ອງທີ່ຮ້າຍແຮງ ຈະນໍາໄປສູ່ກະແສເລືອດຂອງຄົນເຮົາ, ໄຫຼເຂົ້າສູ່ສະໝອງ ກາຍເປັນເນື້ອງອກໃນສະໝອງ ຈະເຮັດໃຫ້ເສຍຊີວິດໄດ້. ສະນັ້ນ, ຈະກິນຊີ້ນໝູ ຕ້ອງເຮັດໃຫ້ສຸກດີ 100% ໃນຄວາມຮ້ອນ 70 ອົງສາຂຶ້ນໄປ ຫຼື ໃຊ້ເວລາຫຼາຍກວ່າ 30 ນາທີ ເຊື້ອພະຍາດກໍຈະຕາຍ. ໃນນັ້ນ, ເມື່ອທ່ານສໍາຜັດໝູ ຕ້ອງລ້າງມືໃຫ້ສະອາດທຸກຄັ້ງ. ສິ່ງສໍາຄັນຄອບຄົວໃດລ້ຽງໝູເປັນຄອກ, ເປັນຟາມ, ກໍຄວນລ້າງຄອກສັດໃຫ້ສະອາດເປັນປະຈໍາ, ຂ້າເຊື້ອພະຍາດໃນຄອກ, ຟາມ ເປັນປະຈໍາ, ຖ້າໝູຂອງທ່ານຜິດປົກກະຕິກໍຄວນໄປປຶກສາຫາລືນໍາສັດຕະວະແພດ ຫຼື ກະຊວງກະສິກໍາ ແລະ ສິງແວດລ້ອມ ເພື່ອກວດເບິ່ງຄວາມຜິດປົກກະຕິຂອງໝູ, ຄອກໝູ, ຟາມໝູຂອງທ່ານ ເພື່ອໃຫ້ໝູ, ຄົນເຮົາມີຄວາມປອດໄພ ຈາກພະຍາດອະຫິວາໝູອາຟຣິກກາ, ພະຍາດທີ່ມາກັບໝູ.
(ຂໍ້ມູນ: ກະຊວງສາທາລະນະສຸກ)
ຄໍາເຫັນ