 |
ທ່ານ ສອນໄຊ ລາດຊະວົງ ຜູ້ອໍານວຍການໂຮງໝໍມິດຕະພາບ (150 ຕຽງ) ກະຊວງສາທາລະນະສຸກ ຕາງໜ້າຄະນະຮັບຜິດຊອບທີມແພດຮັບໃຊ້ກອງປະຊຸມ 3RC-CCM ໄດ້ໃຫ້ສໍາພາດຕໍ່ສື່ມວນຊົນໃນວັນທີ 16 ກັນຍານີ້ ທີ່ຫໍປະຊຸມແຫ່ງຊາດວ່າ: ການປະສານງານ ແລະ ການກຽມຄວາມພ້ອມຮັບໃຊ້ກອງປະຊຸມໃນຄັ້ງນີ້ເລີ່ມແຕ່ວັນທີ 12 ຫາ18ກັນຍາ 2026 ໂດຍໄດ້ຮັບການປະສານງານຢ່າງໃກ້ຊິດຈາກກະຊວງການຕ່າງປະເທດ. ໃນນັ້ນ, ໄດ້ຈັດກຳລັງທີມແພດໝໍສຸກເສີນຈາກໂຮງໝໍສູນກາງ 4 ແຫ່ງຄື: ໂຮງໝໍມິດຕະພາບ, ໂຮງໝໍມະໂຫສົດ, ໂຮງໝໍເສດຖາທິຣາດ ແລະ ໂຮງໝໍ 103 ກອງທັບ ລົງຕິດຕາມຂະບວນຜູ້ແທນທີ່ໄປເກັບກຳຂໍ້ມູນ ແລະ ລົງຢ້ຽມຢາມພາກສະໜາມເກັບກູ້ລະເບີດບໍ່ທັນແຕກຢູ່ແຂວງຫຼວງພະບາງ ເພື່ອຮອງຮັບເຫດການສຸກເສີນທີ່ອາດຈະເກີດຂຶ້ນແບບບໍ່ຄາດຄິດ.ສຳລັບການປະຈຳການຢູ່ທີ່ນະຄອນຫຼວງວຽງຈັນໄດ້ມີການແບ່ງກຳລັງປະຈຳຢູ່ 14 ໂຮງແຮມ ໂດຍແມ່ນກໍາລັງແພດໝໍຈາກໂຮງໝໍມິດຕະພາບ, ໂຮງໝໍມະໂຫສົດ, ໂຮງໝໍເສດຖາທິຣາດ ແລະ ໂຮງໝໍ 103 ກອງທັບ. ນອກຈາກນີ້, ຢູ່ທີ່ໂຮງໝໍສູນກາງທັງ 4 ແຫ່ງ ກໍໄດ້ຈັດທີມແພດສຸກເສີນປະຈໍາການ 24 ຊົ່ວໂມງ ໂຮງໝໍລະ 6 ທ່ານ ລວມບຸກຄະລາກອນການແພດຮັບໃຊ້ກອງປະຊຸມໃນຄັ້ງນີ້ ມີທັງໝົດເກືອບ 100 ທ່ານ ເພື່ອຮອງຮັບການປິ່ນປົວສຸກເສີນໄດ້ທັນເວລາ. ພ້ອມນັ້ນ, ຍັງໄດ້ກະກຽມໝວດເລືອດທຸກໝວດ ເພື່ອຮອງຮັບກໍລະນີສຸກເສີນຕື່ມອີກ. ນອກນັ້ນ, ກໍໄດ້ມີການປະສົມປະສານການແພດເຄື່ອນທີ່ພ້ອມອຸປະກອນ ແລະ ຢາສຸກເສີນຕິດຕາມຂະບວນຜູ້ແທນໃນເວລາເດີນທາງໄປຕ່າງແຂວງອີກດ້ວຍ.
 |
ຜູ້ອໍານວຍການໂຮງໝໍມິດຕະພາບ ຍັງໃຫ້ຮູ້ຕື່ມວ່າ: ກ່ຽວກັບການເຝົ້າລະວັງພະຍາດ, ເນື່ອງຈາກເປັນໄລຍະລະດູຝົນຫາລະດູໜາວ ຊຶ່ງອາດມີການລະບາດຂອງພະຍາດໄຂ້ຫວັດໃຫຍ່ ຫຼື ໄຂ້ຫວັດປະຈຳລະດູ, ທາງທີມງານໄດ້ມີການເຝົ້າລະວັງ ແລະ ຄັດກອງຢ່າງເຂັ້ມງວດ. ຖ້າຫາກຜູ້ແທນ ຫຼື ແຂກຕ່າງປະເທດມີອາການໄຂ້ ຫຼື ໄອ ແມ່ນໃຫ້ຮີບຮ້ອນແຈ້ງຫາທີມແພດ ຫຼື ຜູ້ປະສານງານປະຈຳ ເພື່ອໃຫ້ທີມແພດເຂົ້າຄັດກອງ, ແຍກປິ່ນປົວ ແລະ ອຳນວຍຄວາມສະດວກໃຫ້ສາມາດເຂົ້າຮ່ວມກອງປະຊຸມໄດ້ຢ່າງປອດໄພ.ຕະຫຼອດໄລຍະການດຳເນີນກອງປະຊຸມເຫັນວ່າສຸຂະພາບຂອງບັນດາແຂກ ແລະ ຜູ້ແທນມີຄວາມແຂງແຮງດີ ແລະ ບໍ່ມີອາການເຈັບປ່ວຍຮ້າຍແຮງມີພຽງແຕ່ການປິ່ນປົວ ແລະ ໃຫ້ການບໍລິການອາການເບົາບາງທົ່ວໄປເທົ່ານັ້ນ. ແນວໃດກໍຕາມຂະແໜງສາທາລະນະສຸກ ຍັງຄົງຮັກສາຄວາມພ້ອມຢ່າງເຕັມຮ້ອຍຮັກສາສຸຂະພາບຂອງແຂກ ແລະ ຜູ້ແທນຕ່າງປະເທດ ເພື່ອໃຫ້ກອງປະຊຸມດຳເນີນໄປຢ່າງມີປະສິດທິພາບ ແລະ ປອດໄພສູງສຸດ.
 |
ຄໍາເຫັນ