 |
ທ່ານ ນາງ ຈັນທະໜອມ ມະນີທິບໄດ້ກ່າວວ່າ: ສໍາລັບປີນີ້ ວັນປະຖົມພະຍາ ບານໂລກ ໄດ້ຈັດຂຶ້ນພາຍໃຕ້ຫົວຂໍ້ “ການປະຖົມພະຍາບານໃນບໍລິບົດການຍົກຍ້າຍຖິ່ນຖານ” ໂດຍມີຄຳຂວັນ “ເຖິງຈະຢູ່ໃນການເດີນທາງ ແຕ່ບໍ່ໄດ້ຢູ່ຢ່າງໂດດດ່ຽວ” ໃນປັດຈຸບັນ ຜູ້ຄົນຈຳນວນຫຼາຍໄດ້ເດີນທາງ ຫຼື ຍົກຍ້າຍຖິ່ນຖານດ້ວຍຫຼາກຫຼາຍເຫດຜົນ ເຊັ່ນ: ເພື່ອການເຮັດວຽກ, ສຶກສາຮ່ຳຮຽນ, ການຢູ່ຮ່ວມກັບຄອບຄົວ, ການຫຼີກໜີຈາກສະພາບການທີ່ຫຍຸ້ງຍາກ ແລະ ສາເຫດອື່ນໆ ເມື່ອຢູ່ຫ່າງໄກຈາກບ້ານ ຫຼື ຊຸມຊົນຂອງຕົນ ການເຂົ້າເຖິງການຊ່ວຍເຫຼືອໃນເວລາສຸກເສີນ ອາດຈະປະສົບຄວາມຫຍຸ້ງຍາກຫຼາຍຂຶ້ນ ດ້ວຍເຫດນັ້ນ ການປະຖົມພະຍາບານຈຶ່ງເປັນທັກສະທີ່ມີຄຸນຄ່າ ແລະ ຈຳເປັນສຳລັບທຸກຄົນ ການປະຖົມ ພະຍາບານບໍ່ແມ່ນໜ້າທີ່ຂອງບຸກຄະລາກອນທາງການແພດເທົ່ານັ້ນ ແຕ່ປະຊາຊົນທຸກຄົນກໍສາມາດຮຽນຮູ້ ແລະ ນຳໃຊ້ທັກສະນີ້ເພື່ອຊ່ວຍເຫຼືອຜູ້ອື່ນໄດ້.
 |
ທ່ານຮອງປະທານອົງການກາແດງແຫ່ງຊາດລາວ ກ່າວຕື່ມວ່າ: ມີຄວາມປິຕິຍິນດີເປັນພິເສດທີ່ໄດ້ເຫັນນັກຮຽນຈຳນວນຫຼາຍເຂົ້າຮ່ວມກິດຈະກຳໃນວັນນີ້ ໃນເຫດການສຸກເສີນ ຜູ້ທີ່ສາມາດໃຫ້ການຊ່ວຍເຫຼືອເບື້ອງຕົ້ນໄດ້ທັນທີ ອາດເປັນເພື່ອນ ຄູ-ອາຈານ ສະມາຊິກໃນຄອບຄົວ ຫຼື ຕົວທ່ານເອງ ແລະ ຫວັງເປັນຢ່າງຍິ່ງວ່າ ທຸກທ່ານຈະໄດ້ຮັບຄວາມຮູ້ ມີຄວາມສຸກກັບກິດຈະກຳໃນຄັ້ງນີ້ ໄດ້ຝຶກຝົນທັກສະປະຖົມພະຍາ ບານ ແລະ ນຳຄວາມຮູ້ທີ່ໄດ້ຮັບໄປເຜີຍແຜ່ໃຫ້ແກ່ໝູ່ເພື່ອນ ແລະ ສະມາຊິກໃນຄອບຄົວ ດ້ວຍຄວາມຮ່ວມມືຂອງພວກເຮົາທຸກຄົນ ພວກເຮົາສາມາດສ້າງສັງຄົມ ແລະ ຊຸມຊົນໃຫ້ມີຄວາມປອດໄພຫຼາຍຂຶ້ນ ພ້ອມທັງສ້າງຫຼັກປະກັນວ່າ ຈະບໍ່ມີຜູ້ໃດຖືກປະໄວ້ຢ່າງໂດດດ່ຽວ ເມື່ອຕ້ອງການຄວາມຊ່ວຍເຫຼືອ.
ໂອກາດດຽວກັນ, ທ່ານ ນາງ ຍູມິ ມາເອຊາວະ ໄດ້ກ່າວວ່າ: ມີຄວາມຕື້ນຕັນໃຈຫຼາຍທີ່ໄດ້ເຮັດວຽກ ແລະ ປະສານງານຢ່າງໃກ້ຊິດກັບອົງການກາແດງແຫ່ງຊາດລາວ ໃນສະໜັບສະໜູນວຽກງານປະຖົມພະຍາ ບານ ແລະ ການສົ່ງເສີມສຸຂະພາບ ແລະ ພ້ອມຈະສືບຕໍ່ໃຫ້ການຮ່ວມມື ປະກອບສ່ວນຢ່າງຕັ້ງໜ້າ ເຂົ້າໃນວຽກງານນີ້ໃຫ້ມີຜົນສໍາເລັດຕາມຈຸດປະສົງເປົ້າໝາຍ.
ຂ່າວ:ອົງການກາແດງແຫ່ງຊາດລາວ
ຄໍາເຫັນ