 |
ການພົບປະກັນຄັ້ງນີ້, ສອງຝ່າຍໄດ້ທົບທວນຄືນການຮ່ວມມືດ້ານວຽກງານຖະແຫຼງຂ່າວ-ສື່ມວນຊົນແຕ່ປີ 2021-2025 ຜ່ານມາ ແລະ ແຜນການຮ່ວມມືໃນຕໍ່ໜ້າປີ 2026-2030. ໃນນັ້ນ, ສອງຝ່າຍໄດ້ມີຄໍາຄິດຄໍາເຫັນແລກປ່ຽນ ແລະ ຄົ້ນຄວ້າ, ປຶກສາຫາລືລົງເລິກລາຍລະອຽດໃນແຕ່ລະວຽກງານເພື່ອເຮັດໃຫ້ແຜນການ ແລະ ການຈັດຕັ້ງປະຕິບັດໃນຕໍ່ໜ້າໃຫ້ມີປະສິດທິພາບ ແລະ ປະສິດທິຜົນ, ໂດຍສະເພາະວຽກງານດີຈີຕອນທີ່ທັນສະໄໝ, ວຽກງານການນຳໃຊ້ AI ເຂົ້າໃນວຽກງານສື່ມວນຊົນ ແລະ ວຽກງານຕອບຕ້ານຂ່າວປອມ ແລະ ອື່ນໆ.
ສະຫາຍນາງ ວິລະວອນ ພັນທະວົງ ກ່າວວ່າ: ບົນພື້ນຖານການຈັດຕັ້ງປະຕິບັດເນື້ອໃນຈິດໃຈບົດບັນທຶກຄວາມເຂົ້າໃຈ (MOU) ວຽກງານຮ່ວມມືດ້ານຖະແຫຼງຂ່າວ - ສື່ມວນຊົນໃນປີ 2021-2025 ລະຫວ່າງລາວ-ຫວຽດນາມ, ຫວຽດນາມ-ລາວ ຜ່ານມາ, ບັນດາຜົນສໍາເລັດທີ່ພົ້ນເດັ່ນວຽກງານການຮ່ວມມືຜ່ານມານັ້ນ, ຄະນະນໍາຂົງເຂດຖະແຫຼງຂ່າວ-ສື່ມວນສອງປະເທດໄດ້ຢ້ຽມຢາມ ແລະ ພົບປະແລກປ່ຽນບົດຮຽນຊຶ່ງກັນ ແລະ ກັນ, ໄດ້ຈັດຕັ້ງປະຕິບັດຕາມວຽກງານຮ່ວມມືແລກປ່ຽນຂໍ້ມູນຂ່າວສານ ຊຶ່ງກັນ ແລະ ກັນຢ່າງຕໍ່ເນື່ອງ ໂດຍສະເພາະສື່ມວນຊົນລາວ ແມ່ນໄດ້ເອົາແຫຼ່ງຂໍ້ມູນຂ່າວສານຈາກສື່ມວນຊົນຫວຽດນາມ ກ່ຽວກັບຂ່າວເຫດການສໍາຄັນຕ່າງໆ ທີ່ເກີດຂຶ້ນຢູ່ພາກພື້ນ ແລະ ສາກົນມາໂຄສະນາ, ສື່ມວນຊົນລາວໄດ້ຮັບການຊ່ວຍເຫຼືອທາງດ້ານອຸປະກອນ-ເຕັກນິກເປັນຕົ້ນການກໍ່ສ້າງສະຖານີວິທະຍຸ-ໂທລະພາບຢູ່ບັນດາແຂວງຂອງ ສປປ ລາວ, ການຊ່ວຍເຫຼືອທາງດ້ານເຄື່ອງມືສື່ມວນຊົນ, ໂດຍສະເພາະແມ່ນການກໍ່ສ້າງພັດທະນາບຸກຄະລາກອນສື່ມວນຊົນລາວ (ການຈັດຝຶກອົບຮົມໄລຍະສັ້ນຢູ່ ສສ ຫວຽດນາມ ແລະ ຢູ່ລາວ). ປັດຈຸບັນກໍາລັງໄດ້ຮັບການຝຶກອົບຮົມວຽກງານນໍາພາຄຸ້ມຄອງ-ສື່ມວນຊົນໄລຍະສອງເດືອນ ຊຸດທີ 4 ທີ່ສະຖາບັນສື່ມວນຊົນ ແລະ ໂຄສະນາ ສສ ຫວຽດນາມ, ສື່ມວນຊົນສອງປະເທດໄດ້ເອົາໃຈໃສ່ໂຄສະນາຜ່ານສື່ມວນຊົນກ່ຽວກັບເຫດການສໍາຄັນຕ່າງໆຂອງພັກ, ຂອງຊາດຢູ່ ສປປ ລາວ ແລະ ຢູ່ ສສຫວຽດນາມ ຢ່າງເປັນລະບົບ, ຕໍ່ເນື່ອງ, ເປັນຕົ້ນການຢ້ຽມຢາມຂອງການນໍາຂັ້ນສູງລະຫວ່າງສອງປະເທດ, ການພົວພັນການທູດ, ອອກບົດສ່ອງແສງມູນເຊື້ອ ແລະ ຜົນງານການຮ່ວມມື ຄວາມສາມັກຄີພິເສດ ລາວ-ຫວຽດນາມ, ຫວຽດນາມ-ລາວ ໃຫ້ແກ່ສັງຄົມ ກໍຄືປະຊາຊົນສອງຊາດຮັບຮູ້, ເຂົ້າໃຈພ້ອມທັງໂຄສະນາປຸກລະດົມການເຊື່ອມຊຶມແນວຄິດທິດສະດີຂອງການນໍາພາ, ຊີ້ນໍາຂອງສອງພັກ, ສອງລັດໂດຍສະເພາະແມ່ນແນວຄິດ, ທິດສະດີຂອງປະທານ ໂຮ່ຈິມິນ ແລະ ປະທານ ໄກສອນ ພົມວິຫານ ທີ່ແສນຄົບລົບຮັກຂອງພວກເຮົາ; ລວມທັງການຕອບໂຕ້ຖອຍທໍານອງບິດເບືອນແນວທາງນະໂຍບາຍຂອງພັກ-ລັດແລະ ການກ່າວໃສ່ຮ້າຍປ້າຍສີຂອງກຸ່ມຄົນບໍ່ດີ ຢ່າງເປັນລະບົບ, ຕໍ່ເນື່ອງ ແລະ ໃນໂອກາດ ທີ່ ສປປ ລາວ ຈະສະເຫຼີມສະຫຼອງ 3 ວັນປະຫວັດສາດນີ້, ຢາກສະເໜີໃຫ້ສະຫາຍຫວຽດນາມຊ່ວຍເຫຼືອທາງດ້ານອຸປະກອນ, ບຸກຄະລາກອນແລະ ອື່ນໆໃຫ້ແກ່ ສປປລາວ.
 |
ໂອກາດດັ່ງກ່າວ, ສະຫາຍ ນາງ ວິລະວອນ ພັນທະວົງ ກໍໄດ້ກ່າວສະແດງຄວາມຂອບໃຈຕໍ່ສະຫາຍຮອງລັດຖະມົນຕີກະຊວງວັດທະນະທຳ, ກິລາ ແລະ ການທ່ອງທ່ຽວທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມນີ້ຍັງໄດ້ລາຍງານຈຸດປະສົງໃນການມາເຄື່ອນໄຫວຢ້ຽມແລະ ເຮັດວຽກຢູ່ ສສ ຫວຽດນາມ ໃຫ້ທ່ານຮັບຊາບຕື່ມອີກ.
(ຂ່າວ-ພາບ: ສຳນານ)
ຄໍາເຫັນ