 |
ສະຫາຍ ພັນໂທ ນາງ ຄຳວິໄລສິນ ພຸດດາວົງ ຮອງຫົວໜ້າສະຫະພັນກຳມະບານລັດວິສະຫະກິດລາວເດີນອາກາດ ໄດ້ລາຍງານການເຄື່ອນໄຫວວຽກງານ 1 ປີຜ່ານມາ ຊຶ່ງຕະຫຼອດໄລຍະຜ່ານມາ, ລັດວິສາຫະກິດລາວເດີນອາກາດມີສະມາຊິກທັງໝົດ 168 ສະຫາຍ ຍິງ 59 ສະຫາຍ. ໃນນັ້ນ, ມີຄະນະບໍລິຫານງານສະຫະພັນກຳມະບານ 7 ສະຫາຍ, ໄດ້ຈັດຕັ້ງເປັນ 3 ໜ່ວຍຄື: ໜ່ວຍກຳມະບານຮາກຖານ ບໍລິຫານ, ໜ່ວຍກຳມະບານຮາກຖານ ປະຕິບັດການບິນ ແລະ ໜ່ວຍກຳມະບານຮາກຖານ ເຕັກນິກການບິນ ປະກອບມີ 23 ຈຸ ເຮັດໜ້າທີ່ສຶກສາອົບຮົມການເມືອງແນວຄິດ, ເຕົ້າໂຮມຄວາມສາມັກຄີ, ເສີມຂະຫຍາຍປະຊາທິໄຕ, ປົກປ້ອງຜົນປະໂຫຍດຂອງຜູ້ອອກແຮງງານ, ນໍາພາສະມາຊິກກຳມະບານຈັດຕັ້ງຂະບວນການແຂ່ງຂັນ ແລະ ມີສ່ວນຮ່ວມໃນການປະກອບຄໍາຄິດເຫັນ, ປະຕິບັດຂະບວນການຂໍ້ແຂ່ງຂັນ 5 ເປັນເຈົ້າເຂົ້າໃນທຸກຂົງເຂດວຽກງານຂອງບໍລິສັດ, ປຸກລະດົມບັນດາສະມາຊິກໃຫ້ກຳໄດ້ສິດ, ພັນທະຕ່າງໆ ຂອງຕົນເພື່ອກໍ່ສ້າງ, ພັດທະນາໜ່ວຍກຳມະ ບານໃຫ້ມີຄວາມເຂັ້ມແຂງ ແລະ ຕິດຕາມວຽກນະໂຍບາຍຢ່າງໃກ້ຊິດ ໂດຍສົມທົບກັບພະແນກຈັດຕັ້ງພັກ-ພະ ນັກງານ ເພື່ອໃຫ້ສະມາຊິກທຸກສະຫາຍໄດ້ເຂົ້າປະກັນສັງຄົມ, ຮັບສິດທິເທົ່າທຽມກັນໃນການກວດກາສຸຂະພາບປະຈໍາປີ ບໍ່ວ່າຈະເປັນນັກບິນ, ນາຍຊ່າງ ແລະ ພະນັກງານບໍລິຫານທົ່ວໄປ, ໄດ້ຮັບນະໂຍບາຍເພື່ອພັກຜ່ອນປິ່ນປົວໃນກໍລະນີເຈັບປ່ວຍຈາກບໍລິສັດ ແລະ ຈາກສະຫະພັນກຳມະບານຕື່ມອີກ. ໃນພິທີໄດ້ມອບທຸງໄຊແຂ່ງ ຂັນ 5 ເປັນເຈົ້າ, ມອບຫຼຽນກາສະຫະພັນກຳມະບານລາວເດີນອາກາດ, ມອບໃບຮັບຮອງ ແລະ ໃບຢັ້ງຢືນກຳມະບານ 5 ເປັນເຈົ້າ, ມອບໃບຍ້ອງຍໍໃຫ້ສະມາຊິກກຳມະບານລາວເດີນອາກາດຕື່ມອີກ.
 |
ໂອກາດນີ້, ສະຫາຍ ພັນເອກ ສຸວັນນີ ດວງປະເສີດ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ສະຫະພັນກຳມະບານ ລັດວິສະຫະກິດລາວເດີນອາກາດຍາດມາໄດ້ໃນໄລຍະຜ່ານມາ ພ້ອມທັງຮຽກຮ້ອງໃຫ້ສືບຕໍ່ກຳແໜ້ນແນວທາງນະໂນບາຍຂອງພັກ, ຮັບຜິດຊອບຕໍ່ໜ້າທີ່ການເມືອງຂອງຕົນໃຫ້ສູງຂຶ້ນ, ປັບປຸງແບບແຜນວິທີການເຮັດວຽກໃຫ້ທັນສະໄໝ, ເຊື່ອໝັ້ນການນໍາພາຂອງພັກ, ປັບປຸງກໍ່ສ້າງຕົນເອງ, ຍົກສູງຄວາມຮູ້ຄວາມສາມາດ, ເປັນເຈົ້າການຝຶກຝົນຫຼໍ່ຫຼອມຕົນເອງໃນທຸກດ້ານ ເປັນຕົ້ນ ທາງດ້ານແນວຄິດການເມືອງໃຫ້ໜັກແໜ້ນເຂັ້ມແຂງ, ມີຄຸນສົມບັດສິນທຳປະຕິວັດ, ມີສະຕິລະວັງຕົວຕໍ່ການຈຳແນກມິດສັດຕູ ເພື່ອເຮັດໃຫ້ຕົນເອງກາຍເປັນພະນັກງານທີ່ດີເດັ່ນໃຫ້ອົງການ, ກົມກອງຂອງຕົນ, ປັບປຸງຄືນລະບອບແບບແຜນວິທີເຮັດວຽກ ເຮັດວຽກເປັນໝູ່ຄະນະ ແບ່ງຄວາມຮັບຜິດຊອບໃຫ້ບຸກຄົນຢ່າງລະອຽດຈະແຈ້ງ, ສ້າງຄວາມສາມັກຄີພາຍໃນໃຫ້ເປັນເອກະພາບ ເພື່ອເຮັດສຳເລັດໜ້າທີ່ ທີ່ຂັ້ນເທິງມອບໝາຍໃຫ້.
 |
ຂ່າວ: ວັນນະລັກ ວົງພົມ
ຄໍາເຫັນ