 |
ທ່ານ ທອງສະລິດ ມັງໜໍ່ເມກ ກ່າວວ່າ: ຕໍ່ວຽກງານດັ່ງກ່າວ ສິ່ງທ້າທາຍທີ່ຈະຕ້ອງໄດ້ສືບຕໍ່ປັບປຸງ ແລະ ແກ້ໄຂຄື: ພື້ນຖານໂຄງລ່າງຂອງໂຮງຮຽນ ໃນຂອບເຂດທົ່ວປະເທດແມ່ນເກົ່າແກ່, ຊຸດໂຊມ. ໃນນັ້ນ, ຍັງມີຫຼາຍໂຮງຮຽນ ທີ່ພື້ນຖານໂຄງລ່າງບໍ່ທັນໄດ້ມາດຕະຖານ ແລະ ຕ້ອງການງົບປະມານເປັນຈຳນວນຫຼາຍ ເພື່ອປັບປຸງ, ບູລະນະ ແລະ ກໍ່ສ້າງໃໝ່, ປັດຈຸບັນ, ບັນດາໂຮງຮຽນທີ່ບໍ່ໄດ້ມາດຕະຖານນັ້ນ ກະຊວງ ສສກ ໄດ້ຂຶ້ນແຜນ ແລະ ຂໍງົບປະມານຈາກຄະນະຮັບຜິດຊອບວຽກງານ ກໍ່ສ້າງຮາກຖານການເມືອງ ແລະ ພັດທະນາຊົນນະບົດ-ແກ້ໄຂຄວາມທຸກຍາກ; ເພື່ອຮອງຮັບໃຫ້ຫຼັກສູດໃໝ່ ແມ່ນມີຄວາມຕ້ອງການຝຶກອົບຮົມຄູໃນຂອບເຂດທົ່ວປະເທດ ໃຫ້ທັນຕາມກຳນົດເວລາ ແລະ ສະໜອງຄູໃຫ້ພຽງພໍກັບຄວາມຕ້ອງການຂອງບັນດາໂຮງຮຽນໃນທ້ອງຖິ່ນຕ່າງໆ ຊຶ່ງກະຊວງ ສສກ ຈະໄດ້ສືບຕໍ່ຄົ້ນຄວ້າຊອກຫາແຫຼ່ງງົບປະມານຈາກແຫຼ່ງຕ່າງໆ ໂດຍສົມທົບກັບງົບປະມານຂອງລັດຖະບານ ແລະ ການຊ່ວຍເຫຼືອຈາກບັນດາຄູ່ຮ່ວມພັດທະນາ.
ສິ່ງທີ່ພວກເຮົາຢາກໄດ້ເທື່ອນີ້ ແມ່ນຫຼັກສູດທີ່ມີຄວາມເປັນເອກະພາບ ແລະ ເທົ່າທຽມ. ແຕ່ໃນຕົວຈິງແລ້ວຄວາມແຕກໂຕນກັນທາງດ້ານການພັດທະນາຍັງສູງ, ມີບາງບ່ອນລູກ-ຫຼານນັກຮຽນ ຍັງບໍ່ທັນສາມາດເຂົ້າເຖິງການສຶກສາເທື່ອ. ຕໍ່ບັນຫາດັ່ງກ່າວ ໃນການສ້າງຫຼັກສູດ ແລະ ການສ້າງພື້ນຖານໂຄງລ່າງ ຕ້ອງຄໍານຶງເຖິງຄວາມເປັນຈິງດັ່ງກ່າວ ແລະ ຊອກຫາວິທີແກ້ໄຂທີ່ສອດຄ່ອງເໝາະສົມ; ສິ່ງທ້າທາຍດ້ານພື້ນຖານໂຄງລ່າງ ເປັນຕົ້ນເສັ້ນທາງ, ໄຟຟ້າ, ນໍ້າປະປາ, ອິນເຕີເນັດ ຍັງເປັນປັດໄຈກະທົບຕໍ່ກັບຄຸນນະພາບຂອງການສຶກສາ; ຫຼັກສູດດີແຕ່ຜູ້ປົກຄອງ, ອຳນາດການປົກຄອງ, ການນໍາແຕ່ລະຂັ້ນ ຕ້ອງໄດ້ໃຫ້ການສະໜັບໜູນ ແລະ ເຂົ້າໃຈເປັນເອກະພາບແຕ່ຫົວທີ ຈຶ່ງຈະສາມາດຮັບປະກັນເຮັດສຳເລັດຕາມແຜນການທີ່ວາງໄວ້. (ຂ່າວ: ວັນເພັງ, ພາບ: ບຸນຕອມ)
ຄໍາເຫັນ