ລັດຖະບານ ຈັດສັນງົບປະມານອີງໃສ່ການຈັດເກັບລາຍຮັບ-ລາຍຈ່າຍ ທີ່ເປັນບຸລິມະສິດ

ທ່ານ ສັນຕິພາບ ພົມວິຫານ ກ່າວວ່າ: ການຈັດສັນງົບປະມານມີຫຼັກການ ແລະ ກົນໄກຈັດລຽງບຸລິມະ ສິດລໍາດັບຄວາມສໍາຄັນ ໂດຍອີງໃສ່ດຳລັດ ວ່າດ້ວຍການສ້າງແຜນງົບປະມານ ສະບັບເລກທີ 254/ລບ, ລົງວັນທີ 18 ສິງຫາ 2023 ແລະ ຄໍາສັ່ງຂອງນາຍົກລັດຖະມົນຕີ ວ່າດ້ວຍການສ້າງແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປະຈໍາປີ 2026 ສະບັບເລກທີ 17/ນຍ, ລົງວັນທີ 10 ກໍລະກົດ 2025, ກະຊວງການເງິນໄດ້ຈັດສັນໂດຍອີງໃສ່ຄວາມອາດສາມາດໃນການຈັດເກັບລາຍຮັບ ໂດຍຈັດສັນເຂົ້າໃສ່ບັນດາລາຍຈ່າຍທີ່ເປັນບຸລິມະສິດ ເປັນຕົ້ນການເພີ່ມເງິນເດືອນ, ເງິນນະໂຍບາຍໃຫ້ພະນັກງານ-ລັດຖະກອນ, ທະຫະຫານ-ຕໍາຫຼວດ ພະນັກງານບໍານານ ໂດຍເຮັດໃຫ້ເງິນເດືອນຂັ້ນຕໍ່າບໍ່ຫຼຸດ 3 ລ້ານກີບ, ລາຍຈ່າຍຊໍາລະໜີ້ສິນພາຍໃນ ແລະ ຕ່າງ ປະເທດຕາມສັນຍາ ນຳໃຊ້ລາຍຮັບພາຍໃນ ໂດຍຈັດສັນໃຫ້ມີສ່ວນເຫຼືອ ເພື່ອໄປຊໍາລະຕົ້ນທຶນເງິນກູ້ຢືມຈາກຕ່າງປະເທດ ທີ່ເປັນການຫຼຸດຜ່ອນການກູ້ຢືມໃໝ່ທີ່ເປັນການສ້າງໜີ້ເພີ່ມ ແນໃສ່ຮັບປະກັນເຮັດໃຫ້ໜີ້ສິນຫຼຸດລົງ ຄາດໝາຍຮອດປີ 2030 ໃຫ້ຫຼຸດລົງເຫຼືອ 70% ຂອງ GDP. ພ້ອມນີ້, ລັດຖະບານໄດ້ເອົາໃຈໃສ່ຈັດສັນງົບ ປະມານເພີ່ມໃຫ້ຂະແໜງສຶກສາ ແລະ ສາທາໃນແຕ່ລະປີ ເພື່ອເປັນການພັດທະນາຊັບພະຍາກອນມະນຸດ ແລະ ສົ່ງເສີມດ້ານສຸຂະອະນາໄມ ສະແດງອອກດັ່ງນີ້: ຂະແໜງສຶກສາທິການ ແລະ ກິລາເພີ່ມຂຶ້ນ 35% ທຽບປີ 2025, ໂດຍສະເພາະ 4 ຄາດໝາຍແຜນວຽກຈຸດສຸມຄື: 1) ເພີ່ມງົບປະມານ 256.72 ຕື້ກີບ ເພື່ອເພີ່ມອັດຕາກິນອາຫານທ່ຽງໃຫ້ນັກຮຽນປະຖົມຢູ່ເຂດຫ່າງໄກສອກຫຼີກຈາກ 5,000 ກີບ/ຄົນ/ມື້ ມາເປັນ 10,000 ກີບ/ຄົນ/ມື້ ເພື່ອເສີມສ້າງໃຫ້ນັກຮຽນໄດ້ຮັບໂພຊະນາການທີ່ດີ ແລະ ການພັດທະນາການຈະເລີນໄວຕາມເກນອາຍຸແຕ່ລະໄລຍະ; 2) ເພີ່ມງົບປະມານຈໍານວນ 91.54 ຕື້ກີບ ເພື່ອເພີ່ມເບ້ຍລ້ຽງນັກຮຽນສາມັນ, ເພື່ອຫຼຸດຜ່ອນການປະລະການຮຽນ ແລະ ຊຸກຍູ້ໃຫ້ນັກຮຽນສືບຕໍ່ສຶກສາຮ່ຳຮຽນໃຫ້ມີວິຊາຊີບຕາມເປົ້າໝາຍແຜນຍຸດທະສາດຂອງຂະແໜງສຶກສາ; 3) ເພີ່ມງົບປະມານ 40 ຕື້ກີບເພື່ອພິມປຶ້ມຫຼັກສູດນັກຮຽນ ແລະ ອຸປະກອນການຮຽນ-ການສອນເພື່ອຮັບໃຊ້ຫຼັກສູດການຮຽນ-ການສອນໃໝ່ ແລະ ທົດແທນປຶ້ມທີ່ເສຍຫາຍ; 4) ເພີ່ມງົບປະມານ 125.80 ຕື້ກີບ ເພື່ອສົມທົບຕາມເງື່ອນໄຂການຊ່ວຍເຫຼືອຂອງອົງການຈັດຕັ້ງສາກົນ ໃນການແກ້ໄຂບັນຫາຂາດແຄນຄູ ຊຶ່ງຈະໄດ້ຮັບການຊ່ວຍເຫຼືອຈຳນວນ 4 ລ້ານເອີໂລ ຫຼື ປະມານ 101.71 ຕື້ກີບ ແລະ ບັນດາໜ້າວຽກທີ່ປະກອບສົມທົບ.

ທ່ານ ສັນຕິພາບ ພົມວິຫານ ກ່າວຕື່ມວ່າ: ສໍາລັບຂະແໜງສາທາລະນະສຸກ ເພີ່ມຂຶ້ນ 13% ທຽບປີ 2025, ໂດຍໄດ້ເພີ່ມເງິນສົມທົບຈໍານວນ 144.18 ຕື້ກີບເຂົ້າໃນ 5 ແຜນງານຕາມເງື່ອນໄຂຂອງສາກົນຄື: 1) ແຜນງານຊ່ວຍເຫຼືອດ້ານສັກຢາກັນພະຍາດແມ່ ແລະ ເດັກ; 2) ແຜນງານສະໜັບສະໜູນວຽກງານເອດໄອວີ ແລະ ວັນນະໂລກ; 3) ແຜນງານສະໜັບສະໜູນວຽກງານໄຂ້ຍຸງ; 4) ແຜນງານຊ່ວຍເຫຼືອດ້ານສຸຂະພາບຈະເລີນພັນ; 5) ແຜນງານກໍ່ສ້າງໂຮງໝໍມະຫາວິທະຍາໄລຂະໜາດ 400 ຕຽງ ທີ່ດົງໂພສີ. ນອກນີ້, ຍັງໄດ້ເພີ່ມລາຍຈ່າຍບໍລິຫານປົກກະຕິຕາມຄວາມສາມາດຂອງງົບປະມານ ເພື່ອຮັບປະກັນການເຄື່ອນໄຫວຂອງກົງຈັກພັກ-ລັດໃຫ້ເປັນປົກກະຕິ ໂດຍໃຫ້ບັນດາຫົວໜ່ວຍງົບປະມານຕ້ອງໄດ້ສ້າງແຜນວຽກ-ແຜນງານກິດຈະກຳຂອງຂະແໜງການຕົນໃຫ້ສອດ ຄ່ອງ ແຜນພັດທະນາເສດຖະກິດ-ສັງຄົມແຫ່ງຊາດທີ່ກຳນົດໄວ້. ໃນຕໍ່ໜ້າ, ກະຊວງການເງິນຈະໄດ້ຄົ້ນຄວ້າຈັດສັນງົບປະມານເພີ່ມຕື່ມໃຫ້ຂະແໜງວັດທະນະທໍາ-ສັງຄົມ ຕາມສັດສ່ວນການຫຼຸດລົງຂອງການຊ່ວຍເຫຼືອຈາກສາກົນ ພາຍຫຼັງທີ່ອອກຈາກປະເທດດ້ອຍພັດທະນາ. (ຂ່າວ: ວັນເພັງ, ພາບ: ສໍານານ)