ໂດຍ: ວັນເພັງ
ບັນຫາວຽກງານແກ້ໄຂລະເບີດບໍ່ທັນແຕກ (ລບຕ) ຢູ່ສປປ ລາວ ແມ່ນເປັນບັນຫາສຳຄັນຫຼາຍທີ່ພັກ-ລັດຖະບານ ຖືເປັນບຸລິມະສິດໜຶ່ງຕ້ອງໄດ້ສືບຕໍ່ແກ້ໄຂໃນຕໍ່ໜ້າ. ວຽກງານດັ່ງກ່າວຍັງຢູ່ໃນເປົ້າໝາຍສະຫັດສະວັດທີ 18ຂອງ ສປປ ລາວເພື່ອເຮັດແນວໃດໃຫ້ສັງຄົມ, ປະຊາຊົນມີຄວາມປອດໄພຕໍ່ ລບຕ. ສະນັ້ນ, ລັດຖະບານຍັງມີຄວາມຕ້ອງການຫຼາຍຢ່າງເພື່ອແກ້ໄຂວຽກງານດັ່ງກ່າວໃນຕໍ່ໜ້າ.
ທ່ານ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ ໃຫ້ສໍາພາດຕໍ່ສື່ມວນຊົນໃນໂອກາດນຳພາຄະນະຜູ້ແທນ, ບັນດາປະເທດຜູ້ໃຫ້ທຶນ, ຄູ່ຮ່ວມພັດທະນາ ແລະ ສື່ມວນຊົນລົງເຄື່ອນໄຫວຢ້ຽມຢາມ ພາກສະໜາມກວດກູ້ລະເບີດທີ່ຍັງຕົກຄ້າງ(ບໍ່ທັນແຕກ) ຢູ່ບ້ານດ່ອງ ເມືອງແປກ ແຂວງຊຽງຂວາງ ເມືອບໍ່ດົນມານີ້ວ່າ: ປັດຈຸບັນການແກ້ໄຂວຽກງານ ລບຕ ຍັງເປັນສິ່ງທ້າທາຍຫຼາຍ ເປັນຕົ້ນທຶນຮອນ, ງົບປະມານຍັງມີຄວາມຕ້ອງການຫຼາຍໃນການແກ້ໄຂວຽກງານລບຕເນື່ອງຈາກວຽກງານດັ່ງກ່າວຍັງມີຫຼາຍວຽກທີ່ຕ້ອງສືບຕໍ່ປະຕິບັດໂດຍສະເພາະຕ້ອງມີການໂຄສະນາບັນຫາຄວາມສ່ຽງຂອງລະເບີດທີ່ຍັງບໍ່ທັນແຕກ ພ້ອມມີການສິດສອນໃຫ້ເດັກນ້ອຍ, ນັກຮຽນ, ຜູ້ທີ່ດຳລົງຊີວິດຢູ່ເຂດທີ່ມີຄວາມສ່ຽງ (ມີລູກລະເບີດບໍ່ທັນແຕກ) ໃຫ້ມີຄວາມເຂົ້າໃຈຕໍ່ຄວາມສ່ຽງຂອງບັນຫາ ລບຕ. ນອກນັ້ນ, ຕ້ອງມີການໂຄສະນາໃຫ້ບັນດາປະເທດຕ່າງໆໃຫ້ຮູ້ເຖິງຜົນສະທ້ອນທີ່ເກີດຈາກລບຕ ແລະ ເຫດຜົນຕ່າງໆ. ພ້ອມນັ້ນ, ພາຍຫຼັງທີ່ມີການໂຄສະນາບັນຫາດັ່ງກ່າວ, ມີການຂົນຂວາຍລະດົມທຶນຮອນຕ່າງໆແລ້ວ ແມ່ນຕ້ອງໄດ້ແກ້ໄຂ, ຊ່ວຍເຫຼືອຜູ້ທີ່ໄດ້ຮັບຜົນກະທົບ ຫຼືໄດ້ຮັບເຄາະຮ້າຍຈາກລະເບີດທີ່ຍັງບໍ່ທັນແຕກ ຫຼືຜູ້ທີ່ຮັບເຄາະຮ້າຍແລ້ວຈະຕ້ອງໄດ້ມີການປິ່ນປົວ, ຊອກວຽກເຮັດງານທຳໃຫ້ເຂົາເຈົ້າສາມາດເຂົ້າຮ່ວມ ຫຼືດຳລົງຊີວິດຢູ່ກັບທຸກຄົນໃນສັງຄົມດ້ວຍການມີຄວາມຫວັງ. ນອກຈາກນັ້ນ, ຈະຕ້ອງໄດ້ສຸມໃສ່ວຽກການສໍາຫຼວດຈຸດຕ່າງໆທີ່ມີລະເບີດບໍ່ທັນແຕກຢູ່ ສປປ ລາວມີຫຼາຍ-ໜ້ອຍສໍ່າໃດ ໂດຍສະເພາະສປປລາວໃນສະໄໝສົງຄາມມີລະເບີດທີ່ຖິ້ມລົງມາໃສ່ປະມານ 2ລ້ານກວ່າໂຕນ ຈະຖືກ 1 ໂຕນ/ຄົນ ໃນປະຊາກອນສປປ ລາວມີ 3 ລ້ານຄົນ ເຫັນວ່າລະເບີດມີເປັນຈໍານວນຫຼາຍ. ສະນັ້ນ, ຈຶ່ງເຮັດໃຫ້ພາກສ່ວນທີ່ກ່ຽວຂ້ອງຕ້ອງເລັ່ງດໍາເນີນການສຳຫຼວດເພື່ອຊອກຮູ້ຈຸດລະເບີດຕ່າງໆມີຢູ່ບ່ອນໃດແດ່ເພື່ອຈະມອບໃຫ້ໜ່ວຍງານກ່ຽວຂ້ອງໄດ້ດຳເນີນການກວດກູ້ ແລະ ທຳລາຍ ໃຫ້ໝົດລົງເທື່ອລະໜ້ອຍ. ໃນນັ້ນ, ລັດຖະບານຍັງມີຄວາມຕ້ອງການອຸປະກອນ, ເຕັກໂນໂລຊີ, ບຸກຄະລາກອນຕ່າງໆເພື່ອຊ່ວຍໃຫ້ສາມາດແກ້ໄຂດັ່ງກ່າວໃຫ້ສຳເລັດໃນຕໍ່ໜ້າຕື່ມອີກ.
ທ່ານໂພໄຊໄຂຄຳພິທູນ ກ່າວຕື່ມວ່າ: ວຽກງານເກັກູ້ລະເບີດທີ່ຍັງບໍ່ທັນແຕກ ຫຼືແກ້ໄຂບັນຫາ ລບຕ ແມ່ນເປັນບັນຫາສໍາຄັນຫຼາຍຈຶ່ງຮຽກຮ້ອງໃຫ້ບັນດາປະເທດຕ່າງໆຜູ້ໃຫ້ທຶນ ກໍຄືຜູ້ໃຫ້ການຊ່ວຍເຫຼືອ ໃຫ້ສືບຕໍ່ຊ່ວຍເຫຼືອດ້ານຕ່າງໆຕື່ມອີກ ເພື່ອໃຫ້ການແກ້ໄຂວຽກງານດັ່ງກ່າວມີຄວາມສຳເລັດໃນຕໍ່ໜ້າ ຍ້ອນວ່າຍັງອີກຫຼາຍສິບປີ.
ຄໍາເຫັນ