ໂດຍການຕ້ອນຮັບຂອງທ່ານ ສົມຄິດ ແກ້ວນວນລາ ຮອງຫົວໜ້າກອງວິຊາການວິທະຍຸ-ໂທລະພາບແຂວງ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ທ່ານ ອ່ອນຄໍາ ອິນແສງ ຫົວໜ້າພະແນກ ຖວທ ແຂວງ ໄດ້ລາຍງານໃຫ້ຮູ້ວ່າ: ສະຖານີວິທະຍຸ-ໂທລະ ພາບແຂວງຜົ້ງສາລີສ້າງຕັ້ງຂຶ້ນໃນປີ 1996, ມາເຖິງປັດຈຸບັນມີພະນັກງານທັງໝົດ 9 ຄົນ ຍິງ 3 ຄົນ, ກະຈາຍດ້ວຍຄື້ນລະບົບ FM 100.8 Mkz ກວມພື້ນທີ່ 14 ບ້ານເທດສະເມືອງຜົ້ງສາລີ 2.7% ຂອງພື້ນທີ່ທົ່ວແຂວງ, ກະຈາຍອອກອາກາດ 4 ຊົ່ວໂມງຕໍ່ວັນ ນັບແຕ່ວັນຈັນ-ວັນເສົາ, ມີ 11 ລາຍການວິທະຍຸ, ສ່ວນໂທລະພາບເປ່ເພບໍ່ໄດ້ກະຈາຍ ພ້ອມທັງກະຈາຍຜ່ານສື່ອອນລາຍ. ປີ 2024 ສາມາດເຄື່ອນໄຫວເກັບກໍາຂໍ້ມູນຂຽນຂ່າວໄດ້ 362 ຂ່າວ, ຂຽນບົດ 23 ບົດ, ຮັບຂ່າວເມືອງ 924 ຂ່າວ, ຮັບຈາກພະແນກການ, ກົມກອງອ້ອມຂ້າງ 297 ຂ່າວ, ສົ່ງຂ່າວໃຫ້ສື່ຕ່າງໆຂອງສູນກາງ 345 ຂ່າວ, 20 ບົດ, ກະຈາຍວິທະຍຸໄດ້ 1,483 ຊົ່ວໂມງ, ອອກຂ່າວຜ່ານສື່ອອນລາຍຂອງສະຖານີ 688 ຂ່າວ, 23 ບົດ, ມີຜູ້ເຂົ້າຊົມ-ອ່ານຜ່ານສື່ອອນລາຍ 4,199,421 ເທື່ອຄົນ. ປັດຈຸບັນການອອກຂ່າວແມ່ນຍັງບໍ່ທັນຕອບສະໜອງຕາມຄວາມຮຽກຮ້ອງຕ້ອງການ ເນື່ອງຈາກພະແນກການຕ່າງໆອ້ອມຂ້າງແຂວງແມ່ນໄດ້ຍົກຍ້າຍມາເທດສະບານແຂວງໃໝ່ທີ່ເມືອງບຸນເໜືອ, ການເຄື່ອນໄຫວວຽກງານພົບຄວາມຫຍຸ້ງຍາກ ບຸກຄະລາກອນບໍ່ພຽງພໍ, ອຸປະກອນຍັງຈຳກັດ.
ໂອກາດນີ້, ທ່ານ ລມຕ ໄດ້ສະແດງຄວາມເປັນຫວ່ງເປັນໃຍ ແລະ ໃຫ້ກຳລັງໃຈພະນັກງານຂໍໃຫ້ອົດທົນຜ່ານຜ່າຄວາມຫຍຸ້ງຍາກ ພ້ອມກັນປະຕິບັດໜ້າທີ່ດ້ວຍຄວາມຮັບຜິດຊອບສູງ, ພ້ອມນີ້, ທ່ານຈະນຳເອົາບັນຫາຕ່າງໆໄປຄົ້ນຄວ້າເພື່ອຊອກຫາວິທີທາງແກ້ໄຂ.
ຈາກນັ້ນ, ທ່ານ ລັດຖະມົນຕີ ພ້ອມດ້ວຍຄະນະໄດ້ໄປຢ້ຽມຢາມສວນຊາຫຼາຍກວ່າ 400 ປີ ຢູ່ບ້ານກໍແມນ ເມືອງ ແລະ ແຂວງຜົ້ງສາລີ ເປັນບ້ານທີ່ມີປະຫວັດການປູກຊາລ້ຽງຊີບມາແຕ່ດຶກດໍາບັນ. ຊຶ່ງມີທັງໜົດ 32 ກວ່າເຮັກຕາ ລວມມີ 48,373 ຕົ້ນ. ການປູກຊາ, ຂາຍຊາ ຖືເປັນອາຊີບຕົ້ນຕໍທີ່ສ້າງລາຍຮັບໃຫ້ກັບປະຊາຊົນພາຍໃນບ້ານໄດ້ເປັນຢ່າງດີ. ຈາກນັ້ນ, ທ່ຽວຊົມພູຟ້າ ຊຶ່ງເປັນຈຸດຊົມວິວຂອງເມືອງຜົ້ງສາລີ ເປັນພູທີ່ສວຍສົດງົດງາມ, ຕັ້ງຢູ່ທິດຕາເວັນອອກສຽງເໜືອຂອງຕົວເມືອງຜົ້ງສາລີ; ພູຟ້າມີຄວາມສູງ 1,625 ແມັດ ທຽບຈາກໜ້ານ້ຳທະເລ, ມີຂັ້ນໄດຂຶ້ນ 863 ຂັ້ນ, ມີເນື້ອທີ່ທັງໜົດ 200 ເຮັກຕາ. ເປັນພູທີ່ອຸດົມສົມບູນເຕັມໄປດ້ວຍປ່າໄມ້ ແລະ ກາບໄຫວ້ ພະທາດມິ່ງຂວັນພູຟ້າ ພ້ອມນີ້ຍັງໄດ້ໄປທ່ຽວຊົມບ້ານ, ເຮືອນເກົ່າແກ່ທີ່ສ້າງມາແຕ່ປີ 1961 ຢູ່ເຂດເທດສະບານເກົ່າຂອງເມືອງຜົ້ງສາລີຕື່ມອີກ.
ຂ່າວ: ພູວັນ, ພາບ: ແສງຄຳ
ຄໍາເຫັນ