ລັດວິສາຫະກິດລາວເດີນອາກາດ ດຳເນີນທຸລະກິດມີຜົນສຳເລັດຫຼາຍດ້ານ

ສະຫາຍ ພັນເອກ ປັນທະວີ ສີສົງຄາມ ໄດ້ຍົກໃຫ້ເຫັນມູນເຊື້ອການສ້າງສາພັດທະນາປະເທດແຕ່ລະໄລຍະ, ພາຍຫຼັງປະເທດຊາດໄດ້ຮັບການປົດປ່ອຍກ້າວເຂົ້າສູ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເສດຖະກິດ-ສັງຄົມ ກໍໄດ້ຮັບການປັບປຸງດີຂຶ້ນເປັນກ້າວໆ. ເພື່ອຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃນໄລຍະໃໝ່ ໂດຍສະເພາະການຈັດຕັ້ງປະຕິບັດໜ້າທີ່ການເມືອງຂອງຕົນ ໃນການພັດທະນາເສດຖະກິດແບບເກົ່າເຂົ້າສູ່ການພັດທະນາເສດຖະກິດແບບໃໝ່ໃຫ້ທັນສະໄໝ ແລະ ມີວິທະຍາສາດໃຫ້ໄດ້ຮັບຜົນສຳເລັດຕາມຄາດໝາຍຕາມວາລະເສດຖະກິດຂອງຊາດ ເປັນຕົ້ນການຄົມມະນາຄົມຂົນສົ່ງບົກ-ທາງອາກາດ, ການແລກປ່ຽນຮ່ວມມືກັບພາຍນອກ, ການພັດທະນາເຄື່ອງມື ຕະຫຼອດຮອດການຄຸ້ມຄອງການເຂົ້າອອກຂອງປະຊາຊົນລາວບັນດາເຜົ່າ.

ໄປຄຽງຄູ່ກັນນັ້ນ, ລັດວິສາຫະກິດລາວເດີນອາກາດ ແມ່ນສ່ວນໜຶ່ງທີ່ໄດ້ປະກອບສ່ວນເຂົ້າໃນການພັດທະນາເສດຖະກິດຂອງຊາດ ເປັນຕົ້ນການຄົມມະນາຄົມທັງພາຍໃນ ແລະ ຕ່າງປະເທດ. ນອກນີ້ຍັງໄດ້ຂົນສົ່ງບັນດາສິນຄ້າຕ່າງໆ. ຜ່ານການຈັດຕັ້ງປະຕິບັດໄລຍະຜ່ານມາຈົນເຖິງປັດຈຸບັນ ເຫັນວ່າໄດ້ມີການຂະຫຍາຍຕົວ ແລະ ມີຜົນສຳເລັດຫຼາຍດ້ານໃນການດຳເນີນທຸລະກິດຢ່າງຕໍ່ເນື່ອງ ສາມາດສ້າງລາຍຮັບເພີ່ມຂຶ້ນ 25%, ມີຈຳນວນຜູ້ໂດຍສານເພີ່ມຂຶ້ນ 7%, ການບັນທຸກສິນຄ້າເພີ່ມຂຶ້ນ 12% ຖ້າທຽບໃສ່ປີຜ່າມມາ. ນອກນີ້ຍັງໄດ້ສໍາເລັດການປັບປຸງການຈັດຕັ້ງສະພາບໍລິຫານ ແລະ ການປັບປຸງໂຄງຮ່າງການຈັດຕັ້ງ, ດ້ານການຕະຫຼາດໄດ້ສຳ ເລັດການຮ່ວມມືເຊັນສັນຍາເອົາເຮືອບິນໄປໃຊ້ຢູ່ພາຍນອກ ກໍຄືປະເທດອິນເດຍ, ນອກນີ້, ຍັງໄດ້ເຊັນຍາກັບບໍລິສັດເອກະຊົນໃຫ້ບໍລິການເຮຶອບິນຂຶ້ນຊື່ໃນ ສປປ ລາວ, ດ້ານຄວາມປອດໄພສາມາດຮັບປະກັນໄດ້ 100%, ດ້ານນະໂຍບາຍໄດ້ປັບປຸງດ້ານສະຫວັດດີການຂອງພະນັກງານໂດຍອີງໃສ່ລາຍຮັບເພີ່ມຂຶ້ນ.

ສຳລັບທິດທາງໃນຕໍ່ໜ້າ ລັດວິສາຫະກິດລາວເດີນອາກາດຈະສືບຕໍ່ຂະຫຍາຍທຸລະກິດປິ່ນອ້ອມຈຳນວນໜຶ່ງທີ່ຕິດພັນກັບສາຍການບິນ ໂດຍຜ່ານກອງປະຊຸມຄົ້ນຄວ້າຂອງສະພາບໍລິຫານ ແລະ ຂະຫຍາຍຖານລາຍຮັບເພີ່ມຕື່ມ ເພື່ອພັດທະນາເສດຖະກິດຕາມວາລະແຫ່ງຊາດ ກໍຄືຂອງພັກ-ລັດໄດ້ມອບໝາຍໃຫ້ມີທ່າກ້າວເພີ່ມຂຶ້ນ.

ໃນໂອກາດວັນສະຖາປະນາ ສປປ ລາວ ຄົບຮອບ 50 ປີທີ່ຈະມາເຖິງນີ້, ສະຫາຍ ພັນເອກ ປັນທະວີ ສີສົງຄາມ ຕາງໜ້າໃຫ້ຄະນະອຳນວຍການ, ພະນັກງານທົ່ວລັດວິສາຫະກິດລາວເດີນອາກາດ ຂໍສະແດງຄວາມຮູ້ບຸນຄຸນມາຍັງພັກປະຊາຊົນປະຕິວັດລາວທີ່ໄດ້ກໍ່ຕັ້ງ, ສຶກສາອົບຮົມ ແລະ ນໍາພາ-ຊີ້ນໍາເຮັດໃຫ້ປະເທດຊາດໄດ້ຮັບການພັດທະນາເຕີບໃຫຍ່ເຂັ້ມແຂງ, ຂໍອວຍພອນໄຊອັນປະເສີດມາຍັງການນໍາພັກ-ລັດ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ, ສືບຕໍ່ນໍາພາ-ຊີ້ນໍາປະເທດຊາດກ້າວຂຶ້ນສູ່ສັງຄົມນິຍົມຢ່າງບໍ່ຢຸດຢັ້ງ, ອວຍພອນຄະນະນໍາກະຊວງປ້ອງກັນປະເທດ ຈົ່ງມີສຸຂະພາບເຂັ້ມແຂງ ສືບຕໍ່ຊີ້ນໍາກອງທັບໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ ກາຍເປັນກອງທັບປະຕິວັດທີ່ມີແບບແຜນທັນສະໄໝຢ່າງບໍ່ຢຸດຢັ້ງ, ອວຍພອນມາຍັງນາຍ ແລະ ພົນທະຫານ, ປະຊາຊົນບັນດາເຜົ່າ ຈົ່ງມີສຸຂະພາບແຂງແຮງ ພ້ອມກັນສະເຫຼີມສະຫຼອງວັນຊາດທີ 2 ທັນວາຢ່າງເປັນຂະບວນ ຟົດຟື້ນມ່ວນຊື່ນ.