ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ ຊຸດທີ X ໃນວັນທີ 8 ຕຸລານີ້ວ່າ: ບັນຫາທີ່ໄດ້ຮັບການແກ້ໄຂໃນຂົງເຂດວິຫາຫະກິດລັດ ມີ 2 ລັດວິສາຫະກິດໄດ້ບັນທຶກລາຍຮັບ-ໜີ້ຕ້ອງຮັບ ເຂົ້າໃນເອກະສານລາຍງານການເງິນ 39.43 ຕື້ກີບ, ມີ 6 ລັດວິສາຫະກິດໄດ້ມອບອາກອນລາຍໄດ້ຈາກຜົນປະໂຫຍດເປັນເງິນ ແລະ ວັດຖຸ 750 ລ້ານກີບ ເຂົ້າງົບປະມານແຫ່ງລັດ, ການແກ້ໄຂໜີ້ຕ້ອງຮັບຄ່າໄຟຟ້າຈາກບໍລິສັດທາງລົດໄຟ ລາວ-ຈີນ 258.18 ຕື້ກີບ, ລັດຖະບານໄດ້ເອົາໃຈໃສ່ຊີ້ນໍາ ແລະ ໄດ້ອອກແຈ້ງການ ສະບັບເລກທີ 1250/ຫສນຍ, ລົງວັນທີ 18 ກໍລະກົດ 2025 ບົນພື້ນຖານການປຶກສາຫາລື ແລະ ຄວາມເປັນເອກະພາບ ໂດຍໃຫ້ບໍລິສັດທາງລົດໄຟລາວ-ຈີນ ຈຳກັດ, ຈ່າຍໜີ້ຄ້າງຄ່າໄຟຟ້າຄືນຫຼັງ ນັບແຕ່ເດືອນກັນຍາ 2021 ຫາ ເດືອນມັງກອນ 2023 ໂດຍນໍາໃຊ້ອັດຕາ 728 ກີບ/kWh ແລະ ນັບແຕ່ເດືອນກຸມພາ 2023 ຫາ ເດືອນທັນວາ 2024 ໃຫ້ບໍລິສັດທາງລົດໄຟລາວ-ຈີນ ຈໍາກັດ ຈ່າຍໜີ້ຄ້າງໄຟຟ້າຄືນຫຼັງ ໂດຍນໍາໃຊ້ອັດຕາການນໍາໃຊ້ຕາມແຈ້ງການສະບັບເລກທີ 394/ຫສນຍ, ລົງວັນທີ 13 ມີນາ 2020 ແລະ ບວກເພີ່ມ 50% ຂອງອັດຕາດັ່ງກ່າວລວມເປັນເງິນຈໍານວນ 113.62 ຕື້ກີບ ແລະ ລັດວິສາ ຫະກິດໂຮງພິມແຫ່ງຊາດເກັບຄືນໜີ້ຕ້ອງຮັບໄດ້ 420 ລ້ານກີບ, ບໍລິສັດລາວ-ຍີ່ປຸ່ນ ບໍລິການອາຄານສະໜາມບິນ ຈໍາກັດ ໄດ້ມອບອາກອນກຳໄລ 10.65 ຕື້ກີບ ເຂົ້າງົບປະມານແຫ່ງລັດຄົບຖ້ວນຕາມກົດໝາຍກໍານົດໄວ້. ລັດວິສາຫະກິດໄຟຟ້າລາວ ໄດ້ສັງລວມມູນຄ່າຕົ້ນທຶນການກໍ່ສ້າງເຂື່ອນໄຟຟ້າຕົ້ນທຶນຊັບສົມບັດຄົງທີ່ອື່ນໆ ລວມມູນຄ່າ 1,595.71 ຕື້ກີບ ແລະ ໄດ້ຄິດໄລ່ຫັກຄ່າຫຼຸ່ຍຫ້ຽນຕາມລະບຽບການ ເພື່ອສັງລວມເຂົ້າໃນເອກະສານລາຍງານການເງິນຕາມກົດໝາຍບັນຊີໄດ້ກຳນົດໄວ້. ລັດວິສາຫະກິດກໍ່ສ້າງ ແລະ ຕິດຕັ້ງໄຟຟ້າຈົດລາຍຮັບຈາກເງິນຂາຍຮຸ້ນຈາກ 2 ເຂື່ອນໄຟຟ້າ 1.09 ຕື້ກີບ ແລະ ຄິດໄລ່ເງິນປັນຜົນຄືນໃໝ່ 2% ເປັນເງິນ 21.8 ລ້ານກີບມອບເຂົ້າງົບປະມານແຫ່ງລັດ.
ບັນຫາບໍ່ໄດ້ຮັບການແກ້ໄຂມີ 2 ລັດວິສາຫະກິດ (ລັດວິສາຫະກິດກໍ່ສ້າງຄົມມະນາຄົມ, ລັດວິສາຫະກິດພັດທະບັນນາແຮ່ທາດລາວ) ຍັງບໍ່ໄດ້ບັນທຶກລາຍຮັບ-ໜີ້ຕ້ອງຮັບເຂົ້າໃນເອກະສານລາຍງານການເງິນ 153.26 ຕື້ກີບ ມີ 2 ລັດວິສາຫະກິດ (ລັດວິສາຫະກິດພັດທະນາກະສິກຳ-ອຸດສາຫະກຳການບໍລິການຂາອອກ-ຂາເຂົ້າ ແລະ ລັດວິສາຫະກິດນໍ້າປະປາແຂວງອັດຕະປື) ບໍ່ໄດ້ມອບອາກອນມູນຄ່າເພີ່ມ 3.07 ຕື້ກີບ ເຂົ້າງົບປະມານແຫ່ງລັດມີ 2 ລັດວິສາຫະກິດ (ລັດວິສາຫະກິດພັດທະນາແຮ່ທາດລາວ ແລະ ລັດວິສາຫະກິດວິສະວະກຳ ຄົມມະນາຄົມ) ຕ້ອງມອບອາກອນລາຍໄດ້ຈາກຜົນປະໂຫຍດເປັນເງິນ, ເປັນວັດຖຸ 170 ລ້ານກີບເຂົ້າງົບປະມານແຫ່ງລັດ. ລັດວິສາຫະກິດການບິນລາວຍັງບໍ່ໄດ້ຊໍາລະໜີ້ຕ້ອງສົ່ງ (ຄ່າຜ່ານເດີ່ນ) ໃຫ້ກອງຄຸ້ມຄອງສະໜາມບິນ 12.94 ຕື້ກີບ, ມີ 1 ລັດວິສາຫະກິດ (ລັດວິສາຫະກິດການບິນລາວ) ມີໜີ້ຕ້ອງຮັບຈາກຄ່າເຊົ່າຍົນເໝົາລໍາທີ່ເກັບຄືນບໍ່ໄດ້ແກ່ຍາວມາຫຼາຍປີຍັງຄ້າງ 21.25 ຕື້ກີບ ມີ 5 ກະຊວງ ແລະ 2 ແຂວງ (ກະຊວງສຶກສາທິການ ແລະ ກິລາ, ກະຊວງໂຍທາທິການ ແລະ ຂົນສົ່ງ, ກະຊວງສາທາລະນະສຸກ, ກະຊວງອຸດສະຫະກຳ ແລະ ການຄ້າ, ກະຊວງປ້ອງກັນປະເທດ, ແຂວງບໍ່ແກ້ວ ແລະ ແຂວງເຊກອງ) ຍັງບໍ່ໄດ້ກວດກາຄືນການຈັດຊື້-ຈັດຈ້າງຂອງ 10 ລັດວິສາຫະກິດ 90.18 ຕື້ກີບ ເພື່ອຢັ້ງຢືນຄວາມສົມເຫດສົມຜົນຂອງມູນຄ່າການຈັດຊື້-ຈັດຈ້າງ, ຍັງບໍ່ທັນກວດກາຄວາມຮັບຜິດຊອບຂອງຄະນະຮັບຜິດຊອບເພື່ອພິຈາລະນາມາດຕະການທາງດ້ານລົງວິໄນຕາມແຕ່ລະກໍລະນີ, ມີ 8 ລັດວິສາຫະກິດຍັງບໍ່ໄດ້ມອບເງິນອາກອນມູນຄ່າເພີ່ມ 8.81 ຕື້ກີບ (ຈາກການບໍ່ນໍາໃຊ້ໃບບິນອາກອນ) ເຂົ້າງົບປະມານແຫ່ງລັດ ບໍລິສັດ ເບສ ເທເລຄອມ ຈຳກັດ ຍັງບໍ່ໄດ້ມອບເງິນອາກອນມູນຄ່າເພີ່ມ (ຈາກການຂາຍ) 142 ລ້ານກີບເຂົ້າງົບປະມານແຫ່ງລັດ, ມີ 1 ກະຊວງ (ກະຊວງປ້ອງກັນປະເທດ) ຍັງບໍ່ໄດ້ກວດກາຄວາມຮັບຜິດຊອບທາງດ້ານວິໄນແຜນການ-ການເງິນຕໍ່ບຸກຄົນຂອງບໍລິສັດ ເບສ ເທເລຄອມ ຈຳກັດ, ກ່ຽວກັບການຊຳລະໜີ້ຕ້ອງສົ່ງທີ່ບໍ່ໄດ້ສ້າງສັນຍາການບໍລິການ ແລະ ບໍ່ໄດ້ຖືກຮັບຮອງຈາກສະພາບໍລິຫານ 175,000 ໂດລາ ແລະ ການສ້າງສັນຍາກູ້ຢືມເງິນບໍ່ໄດ້ຜ່ານການເຫັນດີຈາກສະພາບໍລິຫານ 26 ສັນຍາ ມູນຄ່າ 2.48 ຕື້ກີບ ແລະ 195,000 ໂດລາ,ບໍລິສັດຜະລິດ-ໄຟຟ້າລາວ ຍັງບໍ່ສາມາດເກັບຄືນເງິນເດືອນ 13 ທີ່ເບີກຈ່າຍໃຫ້ພະນັກງານ 2.91 ຕື້ກີບ.
(ຂ່າວ: ວັນເພັງ, ພາບ: ບຸນຕອມ)
ຄໍາເຫັນ