ເລຂາພັກແຂວງບັນຍາຍເອກະສານ ຊຸດຝຶກອົບຮົມທິດສະດີການເມືອງໃຫ້ການນຳຂັ້ນເມືອງ-ນະຄອນ

ໃນໂອກາດນີ້, ສະຫາຍເລຂາພັກແຂວງ ບຸນໂຈມ ອຸບົນປະເສີດ ໄດ້ໃຫ້ກຽດບັນຍາຍເອກະສານມູນເຊື້ອ ແລະ ທາດແທ້ຂອງພັກ, ຊຶ່ງເປັນເອກະສານສຳຄັນຕົ້ນຕໍຂອງການຈັດຊຸດຝຶກອົບຮົມຄັ້ງນີ້, ຈຸດປະສົງຂອງການຝຶກອົບຮົບຮົມເພື່ອເຮັດໃຫ້ແຜນພັດທະນາຊັບພະຍາກອນມະນຸດຂອງພັກ-ລັດ ກໍຄືຂອງແຂວງກ່ຽວກັບການຍົກລະດັບທິດສະດີການເມືອງ-ການປົກຄອງທັງໃຫ້ສອດຄ່ອງກັບສະຖານະການສະພາບຄວາມເປັນຈິງ, ເປັນການສ້າງເງື່ອນໄຂໃຫ້ພະນັກງານນຳພາ-ຄຸ້ມຄອງຢູ່ບັນດາເມືອງ-ນະຄອນ, ທີ່ໄດ້ດຳລົງຕຳແໜ່ງຢູ່ອົງການຈັດຕັ້ງຂອງພັກ-ລັດໄດ້ຍົກລະດັບທິດສະດີການເມືອງ-ການປົກຄອງໄປຄຽງຄູ່ກັບການປະຕິບັດໜ້າທີ່ວິຊາສະເພາະ ແລະ ໜ້າທີ່ຄວາມຮັບຜິດຊອບຂອງຕົນ, ເພື່ອເຮັດໃຫ້ບັນດາຄະນະບໍລິຫານງານພັກເມືອງ ແລະ ນະຄອນໃນທົ່ວແຂວງສະຫວັນນະເຂດ ທີ່ໄດ້ເຂົ້າຝຶກອົບຮົມ, ຮັບຮູ້ ແລະ ກຳໄດ້ຫຼັກມູນພື້ນຖານທິດສະດີມາກ-ເລນິນ, ກໍຄືແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຮັບຮູ້ໄດ້ລະບົບການຄຸ້ມຄອງ, ການບໍລິຫານ, ກໍຄືຫຼັກການກໍ່ສ້າງພັກ-ພະນັກງານ ແລະ ບັນດາຄວາມຮັບຮູ້ວິທະຍາສາດດ້ານຕ່າງໆ, ສາມາດນຳເອົາໄປໝູນໃຊ້ຕົວຈິງໄດ້.

ທັງເປັນການຍົກສູງທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ວິໄສທັດໃນການເບິ່ງບັນຫາ, ຄົ້ນຄວ້າບັນຫາ ແລະ ແກ້ໄຂບັນຫາໄດ້ຢ່າງຖືກຕ້ອງ, ຜູ້ເຂົ້າຮ່ວມຝຶກອົບຮົມຄັ້ງນີ້ ມີບັນດາສະຫາຍເລຂາພັກເມືອງ, ຄະນະປະຈຳພັກເມືອງ ແລະ ກຳມະການພັກເມືອງໃນ 14 ຕົວເມືອງ 1 ນະຄອນທົ່ວແຂວງ ເຂົ້າຮ່ວມທັງໝົດຈຳນວນ 375 ສະຫາຍ ແລະ ແບ່ງອອກເປັນ 8 ຊຸດ, ຊຸດລະ 46-47 ສະຫາຍ, ສະເລ່ຍຖືກເມືອງລະ 3-4 ສະຫາຍຕໍ່ຊຸດ, ແຕ່ລະຊຸດແມ່ນກຳນົດເວລາ 5 ວັນໃຫ້ສໍາເລັດ.

ສ່ວນເນື້ອໃນຫົວຂໍ້ຝຶກອົບຮົມເພື່ອໃຫ້ສອດຄ່ອງໃນການຈັດຕັ້ງປະຕິບັດໂຕຈິງໃນແຕ່ລະທ້ອງຖິ່ນໂດຍສະເພາະ ສອດຄ່ອງກັບເວລາ, ງົບປະມານ ແລະ ສອດຄ່ອງກັບຄວາມຕ້ອງການຂອງທ້ອງຖິ່ນ, ຜ່ານການຄົ້ນຄວ້າ ແລະ ປຶກສາຫາລືກັນຢ່າງກົງໄປກົງມາຂອງສະພາຄູໂຮງຮຽນການເມືອງ ແລະ ການປົກຄອງແຂວງ ກັບ ການນຳຂອງແຂວງສະຫວັນນະເຂດ, ເພື່ອເຮັດໃຫ້ບົດຮຽນສອດຄ່ອງກັບສະພາບວຽກງານຕົວຈິງຂອງທ້ອງຖິ່ນກໍຄືສອດຄ່ອງກັບສະພາບຂອງແຂວງສະຫວັນນະເຂດ.

ດັ່ງນັ້ນ, ກອງປະຊຸມສະພາຄູຈິ່ງໄດ້ມີຄວາມເປັນເອກະພາບກັນກຳນົດເອົາຫົວຂໍ້ສະເພາະທີ່ຈະຈັດຝຶກອົບຮົມໃຫ້ແກ່ເລຂາພັກເມືອງ, ຄະນະປະຈຳພັກເມືອງ ແລະ ກຳມະການພັກເມືອງ, ປະກອບມີ 10 ບົດເປັນຕົ້ນ: ພື້ນຖານທິດສະດີ ແລະ ແນວທາງກໍ່ສ້າງສັງຄົມນິຍົມຢູ່ປະເທດເຮົາ, ທັກສະການເປັນຜູ້ນຳແບບໃໝ່ ແລະ ຄຸນທາດການເມືອງ, ຄຸນສົມບັດສິນທຳປະຕິວັດຂອງຄະນະພັກເມືອງ, ການຊີ້ນໍາ-ນໍາພາຂອງເລຂາພັກເມືອງຕໍ່ວຽກງານຮອບດ້ານຢູ່ຂັ້ນເມືອງ, ສ້າງພັກໃຫ້ປອດໃສເຂັ້ມແຂງ ແລະ ໜັກແໜ້ນ, ພັດທະນາເສດຖະກິດ ປະຕິບັດຕາມມະຕິ 04, ມະຕິ 05, ມະຕິ 3 ສ້າງ, ຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ແລະ ວິທີການເຈລະຈາລະຫວ່າງສອງຝ່າຍ ຫຼື ຫຼາຍຝ່າຍ, ວິທີແກ້ໄຂຂໍ້ຂັດແຍ້ງຢູ່ຂັ້ນເມືອງ, ລາຍງານບົດຮຽນການແກ້ໄຂຈຸດຮ້ອນ ດ້ານເສດຖະກິດ-ສັງຄົມ ແລະ ການບໍລິຫານພາວະໄພພິບັດທາງທໍາມະຊາດຢູ່ຂັ້ນເມືອງ, ການແກ້ໄຂບັນຫາຊົນເຜົ່າ ແລະ ສາສະໜາຢູ່ ສປປ ລາວ, ວຽກງານປ້ອງກັນຊາດ ແລະ ປ້ອງກັນຄວາມສະຫງົບໃນໄລຍະໃໝ່.

(ແຫຼ່ງຂ່າວ: ແຂວງສະຫວັນະເຂດ)