ລົງນາມຮ່ວມມື ພັດທະນາແຫຼ່ງທ່ອງທ່ຽວທຳມະຊາດ ເຂດຜາກະຕ່າຍ ເມືອງອະນຸວົງ 

ພິທີເຊັນສັນຍາສໍາປະທານ (CA) ໂຄງການພັດທະນາແຫຼ່ງທ່ອງທ່ຽວທຳມະຊາດ ເຂດຜາກະຕ່າຍ ບ້ານຜາສະຫງົບ ເມືອງອະນຸວົງ ແຂວງໄຊສົມບູນ ລະຫວ່າງ ອົງການປົກຄອງ ແຂວງໄຊສົມບູນ ແລະ ບໍລິສັດ ວຽງວອນ ພັດທະນາກະສິກຳຄົບວົງຈອນ ຈຳກັດຜູ້ດຽວ ໄດ້ຈັດຂຶ້ນເມື່ອບໍ່ດົນມານີ້. ຮ່ວມລົງນາມລະຫວ່າງທ່ານ ໄຊຍະເດດ ວົງສາຣະວັນ ຫົວໜ້າພະແນກແຜນການ ແລະ ການລົງທຶນ ແລະ ທ່ານ ພູວອນ ຈັນມາລາ ປະທານບໍລິສັດ ວຽງວອນ ພັດທະນາກະສິກຳຄົບວົງຈອນ ຈຳກັດຜູ້ດຽວ ໂດຍມີທ່ານ ພອຍຄຳ ຮຸ່ງບຸນຍວງ ເຈົ້າແຂວງໄຊສົມບູນ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ. 
ໂຄງການດັ່ງກ່າວ ມີເນື້ອທີ່ທັງໝົດ 878 ເຮັກຕາ ໃນນັ້ນ, ເຂດພັດທະນາການທ່ອງທ່ຽວ 150 ເຮັກຕາ, ເຂດພັດທະນາກະສິກຳ 471 ເຮັກຕາ ແລະ ເຂດອະນຸລັກ (ຜາສູງຊັນ) 257 ເຮັກຕາ ໄລຍະໃນການສຳປະທານ 50 ປີ ລວມມູນຄ່າທັງໝົດ 50 ລ້ານໂດລາ.
ໂອກາດນີ້, ທ່ານ ພອຍຄຳ ຮຸ່ງບຸນຍວງ ໄດ້ສະແດງຄວາມຍ້ອງຍໍຊົມເຊີຍຕໍ່ ບໍລິສັດ ທີ່ໄດ້ເສຍສະຫຼະທຶນຮອນ ເພື່ອປະກອບສ່ວນອັນສຳຄັນ ເຂົ້າໃນການພັດທະນາແຂວງໄຊສົມບູນ ຊຶ່ງໂຄງການດັ່ງກ່າວຈະຊ່ວຍໃຫ້ເສດຖະກິດ-ສັງຄົມ ຂອງແຂວງມີການຂະຫຍາຍຕົວ,ຊີວິດການເປັນຢູ່ຂອງປະຊາຊົນຈະໄດ້ຮັບການປັບປຸງທີ່ດີຂຶ້ນ.ພ້ອມທັງຮຽກຮ້ອງໃຫ້ທາງບໍລິສັດ ຈົ່ງຍົກສູງຄວາມຮັບຜິດຊອບ ໃນການຈັດຕັ້ງປະຕິບັດຕາມພັນທະຕ່າງໆ ທີ່ໄດ້ກໍານົດໄວ້ໃນສັນຍາ, ຮຽກຮ້ອງໃຫ້ພາກສ່ວນທີ່ກ່ຽວຂ້ອງ ຈົ່ງເປັນເຈົ້າການໃນການຕິດຕາມ, ກວດກາຢ່າງໃກ້ຊິດຕິດແທດ ພ້ອມທັງອໍານວຍຄວາມສະດວກດ້ານຕ່າງໆ ເພື່ອຮັບປະກັນໃຫ້ໂຄງການດໍາເນີນໄປຢ່າງຖືກຕ້ອງຕາມລະບຽບ, ຫຼັກການ ແລະ ມີຜົນສຳເລັດຕາມແຜນການທີ່ວາງໄວ້. 
(ຂ່າວ-ພາບ: ສີລິພອນ ສົງຄຳ)