ຫຼວງພະບາງ ສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ແລະ ວັນສິ່ງແວດລ້ອມໂລກ

ພິທີ ທ່ານ ບຸນເຫຼືອ ສິນໄຊວໍຣະວົງ ໄດ້ຍົກໃຫ້ເຫັນປະຫວັດຄວາມເປັນມາ ຂອງວັນປູກຕົ້ນໄມ້ ແຫ່ງຊາດ ແລະ ຜົນການຈັດຕັ້ງປະຕິບັດ ການປູກໄມ້ ໃນໄລຍະຜ່ານມາ ຊຶ່ງພັກ ແລະ ລັດຖະບານ ໄດ້ກຳນົດເອົາ ວັນທີ 1 ມິຖຸນາ ເປັນວັນປູກຕົ້ນໄມ້ແຫ່ງຊາດ ນັບແຕ່ 1980 ເປັນຕົ້ນ ຊຶ່ງກົງກັບວັນເດັກນ້ອຍສາກົນ ເພື່ອປູກຈິດສໍານຶກໃຫ້ອະນຸຊົນ ແລະ ເຍົາວະຊົນ ກໍຄື ທົ່ວສັງຄົມ ເຫັນໄດ້ເຖິງ ຄວາມສໍາຄັນຂອງປ່າໄມ້, ເປັນການປຸກລະດົມທົ່ວປວງຊົນ ເຂົ້າຮ່ວມການຄຸ້ມຄອງ, ປົກປັກຮັກສາ ແລະພັດທະນາປ່າໄມ້ ເຮັດໃຫ້ປ່າໄມ້ ມີຄວາມອຸດົມສົມບູນ ກາຍເປັນທ່າແຮງການພັດທະນາ ເສດຖະກິດ-ສັງຄົມ ແຫ່ງຊາດ ຕາມທິດສີຂຽວ ແລະຍືນຍົງ.

ທ່ານ ສົມແວວເພັດ ດວງປະສິດ ຫົວໜ້າພະແນກກະສິກໍາ ແລະ ສິ່ງແວດລ້ອມແຂວງ ໄດ້ລາຍງານກ່ຽວກັບການກະກຽມສະເຫຼີມສະຫຼອງ ວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ແລະ ວັນສິ່ງແວດລ້ອມໂລກ, ວັນສິ່ງແວດລ້ອມແຫ່ງຊາດ ວັນທີ 5 ມິຖຸນາ, ພ້ອມນັ້ນ ວິຊາການ ໄດ້ມີການແນະນຳວິທີປູກຕົ້ນໄມ້ ເພື່ອໃຫ້ປູກຖືກຕ້ອງຕາມເຕັກນິກວິຊາການ.

ໃນພິທີ ໄດ້ມີກິດຈະກໍາວາງສະແດງສິນຄ້າ, ມອບໃບຢັ້ງຢືນຂຽວສະອາດງາມຕາ ໃຫ້ກັບບັນດາສະຖານທີ່ບໍລິການ ແລະ ສຳນັກງານຫ້ອງການ, ມອບທຸງເຈົ້າພາບສະຫຼອງວັນສິ່ງແວດລ້ອມຄັ້ງຕໍ່ໄປໃຫ້ກັບແຂວງອຸດົມໄຊ ແລະ ຮັບຊົມລະຄອນເວທີ ກ່ຽວກັບການປ່ຽນແປງດິນຟ້າອາກາດ ແລະ ການປົກປັກຮັກສາຊັບພະຍາກອນທຳມະຊາດ ແລະ ສິ່ງແວດລ້ອມ ຈາກນັກຮຽນຂອງສູນວັດທະນະທຳເດັກແຂວງຫຼວງພະບາງ ຕື່ມອີກ.

ຂ່າວ-ພາບ: ທະນູສິນ ອິດທິພົນ