 |
ທ່ານ ຄຳພັນ ແກ້ວກັນຍາ ຮອງຜູ້ອຳນວຍການຝ່າຍຄຸ້ມຄອງສາຂາ ຫົວໜ້າສາຂາພາກທະນາຄານ ພັດທະນາລາວ ປະຈໍາແຂວງຫຼວງພະບາງ, ໄດ້ມີຄຳເຫັນກ່າວມອບເສື້ອ ຈໍານວນ 2,000 ຜືນ ມູນຄ່າ 120,000,000 ກີບ ໃຫ້ກັບອົງການກາແດງແຂວງຫຼວງພະບາງ ເພື່ອນຳໃຊ້ເຂົ້າໃນການຊຸກຍູ້ຂະບວນການຈັດຫາເລືອດໃຫ້ບັນລຸຕາມແຜນການ.
ທ່ານ ຄຳພັນ ແກ້ວກັນຍາ ກ່າວວ່າ: ການມອບເສື້ອຄັ້ງນີ້ ເພື່ອແບ່ງເບົາພາລະການນຳໃຊ້ງົບປະມານຂອງພາກລັດ ຕໍ່ ການຊຸກຍູ້ຂະບວນຈັດຫາເລືອດ ເຊິ່ງໄລຍະຜ່ານມາLDB ປະຈໍາແຂວງຫຼວງພະບາງ ໄດ້ເປັນສ່ວນໜຶ່ງໃນການປະກອບສ່ວນວຽກງານຈັດຫາເລືອດ ຢູ່ແຂວງຫຼວງພະບາງມາໂດຍຕະຫຼອດ ແລະຈະສືບຕໍ່ໃນການຊຸກຍູ້ຕື່ມ ໂດຍການຮ່ວມມືກັບອົງການຈັດຕັ້ງຊາວໜຸ່ມ ແລະອົງການກາແດງແຂວງ.
ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງແຂວງຫຼວງພະາງ ໄດ້ກ່າວສະແດງຄວາວຂອບໃຈຕໍ່ ທະນາຄານພັດທະນາລາວປະຈໍາແຂວງຫຼວງພະບາງ ທີ່ໄດ້ສະໜັບສູໜູນເສື້ອໃນຄັ້ງນີ້ ແລະຊຸກຍູ້ວຽກງານຈັດຫາເລືອດໃນໄລຍະຜ່ານມາ, ພ້ອມນັ້ນ ທ່ານໄດ້ລາຍງານສະພາບການເຄື່ອນໄຫວຽກງານຈັດຫາເລືອດໂດຍຫຍໍ້, ເຊິ່ງແຜນປີ 2026 ຈະປຸກລະດົມການບໍລິຈາກເລືອດໃຫ້ໄດ້ 6,000 ຖົງໃນທົ່ວແຂວງ, ມາຮອດປັດຈຸບັນ ຈັດຫາໄດ້ແລ້ວ 3,412 ຖົງ ເທົ່າກັບ 56,8% ແລະຈະສືບຕໍ່ຈັດຫາຕື່ມ 2,588 ຖົງ, ສໍາລັບປີ 2027 ຕ້ອງໃຫ້ໄດ້ 6,500 ຖົງ, ເນື່ອງຈາກຄວາມຕ້ອງການນຳໃຊ້ເລືອດເຂົ້າໃນການປີ່ນປົວຄົນເຈັບນັບມື້ສູງຂຶ້ນ, ເຊິ່ງການປຸກລະດົມຂະບວນການໄດ້ມີການຮັບການບໍລິຈາກກັບທີ່, ເຄື່ອນທີ່ລົງບັນດາເມືອງ-ໂຮງຮຽນ-ສະຖາບັນການສຶກສາ ແລະບັນດາກົມກອງ, ຈັດຂະບວນການຮ່ວມກັບບັນດາອົງການຈັດຕັ້ງ.
 |
ໂອກາດນີ້ ທ່ານ ບຸນເຫຼືອ ສີນໄຊວໍລະວົງ ໄດ້ມີຄຳເຫັນວ່າ: ການມອບເສື້ອ ເຂົ້າໃນຂະບວນການຊຸກຍູ້ການຈັດຫາເລືອດ ຢູ່ແຂວງຫຼວງພະບາງຄັ້ງນີ້ ຈະເປັນການປະກອບສ່ວນເຮັດໃຫ້ສັງຄົມ ເຫັນໄດ້ຄວາມສຳຄັນຂອງການບໍລິຈາກເລືອດ ທັງຫັນມາມີສ່ວນຮ່ວມຕໍ່ການບໍລິຈາກເລືອດ ເພື່ອຊ່ວຍເຫຼືອສັງຄົມໃຫ້ຫຼາຍຂື້ນ.
ການມອບ-ຮັບຄັ້ງນີ້, ນອກຈາກເສື້ອຈຳນວນ 2,000 ຜືນແລ້ວ, ຄະນະກຳມະການປົກຄອງແຂວງຫຼວງພະບາງຍັງໄດ້ມອບອຸປະກອນແສງອິນຟາເຣດ ຫຼື ອຸປະກອນເຍືອງຊອກຫາເສັ້ນເລືອດ 1 ຊຸດ, ມູນຄ່າ 49 ລ້ານກວ່າກີບ. ພ້ອມນັ້ນໄດ້ມີການມອບໃບຍ້ອງຍໍຂອງແຂວງ ແລະໃບກຽດຕິຄຸນ ຂອງອົງການກາແດງແຂວງ ໃຫ້ກັບທະນາຄານພັດທະນາລາວ ປະຈໍາແຂວງຫຼວງພະບາງຕື່ມອີກ.
ຂ່າວ-ພາບ: ອາພຸດເດດ ບຸບຜາ
ຄໍາເຫັນ