ຈາກມູນເຊື້ອຂອງແມ່ຍິງລາວ ໄດ້ສ່ອງແສງອອກມາຢ່າງຄົບຖ້ວນ ເຖິງຈິດໃຈຮັກຊາດ, ຮັກບ້ານເກີດເມືອງນອນ, ຄວາມອົດທົນກ້າແກ່ນ, ຄວາມເສຍສະຫຼະບໍ່ຍ່ອມຈໍານົນ.ຈາກຄຸນງາມຄວາມດີຂອງແມ່ຍິງລາວ ປະຫວັດສາດຂອງຊາດຂອງພັກໄດ້ຈາລຶກຜົນງານ ຂອງບັນດາແມ່ປ້ານ້າອາຫຼາຍຮຸ່ນຄົນ ທີ່ໄດ້ອຸທິດຕົນຄຽງບ່າຄຽງໄຫຼ່ກັບເພດຊາຍ ທັງຢູ່ແນວໜ້າ ແລະ ແນວຫຼັງເພື່ອພາລະກິດລວມຂອງຊາດ, ປະທານ ໄກສອນ ພົມວິຫານ ໂອ້ລົມຕໍ່ກອງປະຊຸມໃຫຍ່ແມ່ຍິງລາວທົ່ວປະເທດ ຄັ້ງທີ I ໃນເດືອນມີນາ ປີ 1984 ວ່າ: ຜ່ານຂະບວນວິວັດແຫ່ງການຕໍ່ສູ້ເພື່ອດໍາລົງຄົງຕົວ ແລະ ຂະຫຍາຍຕົວຂອງຊາດລາວ ແມ່ຍິງລາວໄດ້ອຸທິດຢ່າງໃຫຍ່ຫຼວງເຂົ້າໃນການສ້າງໜ້າປະຫວັດສາດລາວອັນສະຫວ່າງສະໄຫວຂອງຊາດ ຊຶ່ງໄດ້ກາຍເປັນຄຸນລັກສະນະທີ່ເປັນມູນເຊື້ອຂອງແມ່ຍິງລາວເຊັ່ນ: ຄວາມດຸໝັ່ນຂະຫຍັນພຽນ, ມີນໍ້າໃຈຮັກເຊື້ອແພງຊາດ, ເອື້ອເຟື້ອເຜື່ອແຜ່, ມີຄວາມສຸພາບອ່ອນໂຍນ, ມີບົດບາດໃນການອະນຸລັກຮັກສາ ແລະ ເສີມຂະຫຍາຍມູນເຊື້ອວັດທະນະທໍາອັນດີງາມຂອງຊາດ; ພ້ອມກັນນີ້ ແມ່ຍິງຍັງມີບົດບາດສໍາຄັນໃນຄອບຄົວ ໃນການລ້ຽງດູ ແລະ ສຶກສາອົບຮົມລູກເຕົ້າ... ສະນັ້ນ ໃນພຶດຕິກໍາຕົວຈິງຂອງປະຫວັດສາດລາວແມ່ຍິງຫຼາຍທ່ານໄດ້ຮັບນາມມະຍົດເປັນແມ່ວິລະຊົນ ແລະ ນັກຮົບແຂ່ງຂັນຂອງຊາດ.
ນັບແຕ່ພັກໄດ້ຮັບການສ້າງຕັ້ງມາ ໃນວັນທີ 22 ມີນາ 1955 ພັກຍິ່ງໃຫ້ຄວາມສໍາຄັນຕໍ່ບົດບາດຂອງແມ່ຍິງລາວບັນດາເຜົ່າ ເຂົ້າຮ່ວມພາລະກິດຕໍ່ສູ້ປົດປ່ອຍຊາດ ແລະ ພາຍຫຼັງປະເທດຊາດໄດ້ຮັບການປົດປ່ອຍ ໃນວັນທີ 2 ທັນວາ 1975 ເປັນຕົ້ນມາ, ພັກໄດ້ວາງແນວທາງນະໂຍບາຍແຕ່ລະໄລຍະໃນການພັດທະນາປະເທດຊາດ ໃນນັ້ນ, ນະໂຍບາຍໃນການອອກນິຕິກໍາກ່ຽວກັບແມ່ຍິງລາວກໍຖືກຮັບຮອງຫຼາຍສະບັບເພື່ອປົກປ້ອງສິດຜົນປະໂຫຍດອັນຊອບທໍາຂອງແມ່ຍິງ ແລະ ເດັກນ້ອຍ. ແມ່ຍິງລາວມີສິດສະເໝີພາບກັບເພດຊາຍ ຕາມລັດຖະທໍາມະນູນລາວໄດ້ກໍານົດໄວ້.
ສໍາລັບແມ່ຍິງຢູ່ສູນກາງແນວລາວສ້າງຊາດ (ສນຊ) ກໍໄດ້ຕັ້ງໜ້າປະກອບສ່ວນເຂົ້າໃນໜ້າທີ່ການເມືອງຂອງຕົນ ຕາມພາລະບົດບາດ ຈໍານວນພະນັກງານ - ລັດຖະກອນເພດຍິງ ຢູ່ ສນຊ ກວມເອົາ 45.94% ຂອງພະນັກງານ-ລັດຖະກອນທັງໝົດຂອງ ສນຊ ໃນນັ້ນ ພະນັກງານເພດຍິງທີ່ເປັນພະນັກງານນໍາພາ-ຄຸ້ມຄອງຂັ້ນກົມ, ຂັ້ນພະແນກ ກໍເພີ່ມອັດຕາສ່ວນຂຶ້ນຫຼາຍສົມຄວນ ໂດຍສະເພາະຂັ້ນພະແນກ; ສະນັ້ນ, ສະແດງໃຫ້ເຫັນວ່າ ຜົນງານ ແລະ ຜົນສໍາເລັດຂອງວຽກງານກໍມີແມ່ຍິງປະກອບສ່ວນ, ຫຼ້າສຸດບົດໂອ້ລົມຂອງທ່ານ ເຍ່ຍເກີຢ່າ ໜໍ່ຈໍ່ຈົງຕົວ ຄະນະປະຈໍາພັກ ຮອງປະທານ ຜູ້ຊີ້ນໍາອົງການຈັດຕັ້ງມະຫາຊົນ ສນຊ ຕໍ່ກອງປະຊຸມໃຫຍ່ສະມາຊິກສະຫະພັນແມ່ຍິງ ສນຊ ຄັ້ງທີ XV ເມື່ອທ້າຍເດືອນມີນາ 2025 ບາງຕອນກ່າວວ່າ: “ທ່າແຮງຜົນສໍາເລັດຂອງອົງຄະນະພັກ ມາຈາກບັນດາອົງການຈັດຕັ້ງມະຫາຊົນ ກໍຄືເອື້ອຍນ້ອງເພດຍິງໄດ້ປະກອບສ່ວນ”.
ສັງລວມແລ້ວ; ບົດບາດແມ່ຍິງລາວ ໄດ້ຮັບການເອົາໃຈໃສ່ນໍາພາຊີ້ນໍາຈາກພັກປະ ຊາຊົນປະຕິວັດລາວແຕ່ລະໄລຍະຕະຫຼອດມາ, ແມ່ຍິງລາວບັນດາເຜົ່ານັບມື້ໄດ້ຮັບການພັດທະນາຮອບດ້ານ ທາງດ້ານຮ່າງກາຍ ແລະ ຈິດໃຈ.
ເນື່ອງໃນໂອກາດວັນສ້າງຕັ້ງແມ່ຍິງລາວທີ່ຈະມາເຖິງ ຂ້າພະເຈົ້າຂໍສະແດງຄວາມຮູ້ບຸນຄຸນເປັນຢ່າງສູງ ຕໍ່ພັກ-ລັດ ແລະ ອວຍພອນໃຫ້ການນໍາພັກ-ລັດທຸກຂັ້ນ ໂດຍສະເພາະອົງການຈັດຕັ້ງແມ່ຍິງລາວທີ່ເປັນຕົວແທນໃນການປົກປ້ອງສິດຜົນປະໂຫຍດຂອງແມ່ຍິງ ແລະ ເດັກນ້ອຍລາວບັນດາເຜົ່າ ຈົ່ງສືບຕໍ່ນໍາພາແມ່ຍິງລາວ ເຂົ້າໃນສອງໜ້າທີ່ຍຸດທະສາດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ນັບຈະເລີນກ້າວໜ້າຢ່າງບໍ່ຢຸດຢັ້ງ.
ຄໍາເຫັນ