 |
ທ່ານ ນາງ ພອນທິບ ສາວະລີ ກຳມະການຄະນະບໍລິຫານງານພັກ ຫົວໜ້າກົມຈັດຕັ້ງ-ພະນັກງານ, ຄະນະບໍລິຫານງານສູນກາງສະຫະພັນແມ່ຍິງ ສະໄໜທີ VIII ປະທານສະຫະພັນແມ່ຍິງອົງການໄອຍະການປະຊາຊົນສູງສຸດ (ອອປສ) ໄດ້ສະແດງຄວາມຮູ້ສຶກຕໍ່ວັນດັ່ງກ່າວວ່າ: ຕົນເອງມີຄວາມພາກພູມໃຈເປັນຢ່າງຍິ່ງທີ່ໄດ້ເຫັນການເຕີບໃຫຍ່ຂອງ ສະຫະພັນແມ່ຍິງລາວເຮົານັບແຕ່ມື້ອົງການຈັດຕັ້ງແມ່ຍິງລາວໄດ້ຮັບການສ້າງຕັ້ງຂຶ້ນມາສະຫະພັນແມ່ຍິງລາວມີຄວາມເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ໄດ້ເອົາໃຈໃສ່ປັບປຸງການຈັດຕັ້ງ, ປັບປຸງແບບແຜນວິທີນໍາພາ, ວິທີເຮັດວຽກ ຂອງສະຫະພັນແມ່ຍິງແຕ່ລະຂັ້ນໃຫ້ມີຄວາມໜັກແໜ້ນ, ເຂັ້ມແຂງ, ໃຫ້ແທດ ເໝາະກັບຄວາມຮຽກຮ້ອງຕົວຈິງຂອງວຽກງານໃນໄລຍະໃໝ່. ແມ່ຍິງລາວບັນດາເຜົ່າໄດ້ຄຽງບ່າຄຽງໄລ່ກັບເພດຊາຍ ອຸທິດເລືອດເນື້ອ, ເຫື່ອແຮງ, ສະຕິປັນຍາ, ວັດຖຸປັດໄຈປະກອບສ່ວນເຂົ້າໃນພາລະກິດລວມຂອງຊາດ ເວົ້າລວມ, ເວົ້າສະເພາະ ພາລະກິດປ່ຽນແປງໃໝ່ຂອງພັກເຮົາ.
ທ່ານໃຫ້ຮູ້ຕື່ມວ່າ: ຜົນງານອັນພົ້ນເດັ່ນໃນຕະຫຼອດໄລຍະຜ່ານມາຂອງສະມາຊິກສະຫະພັນແມ່ຍິງ ອອປສ ໄດ້ຮັບຄວາມໄວ້ວາງໃຈຈາກຄະນະພັກ - ຄະນະນໍາ ອົງການ ໂດຍໄດ້ຮັບການມອບໝາຍໜ້າທີ່ ແລະ ຄວາມຮັບຜິດຊອບທີ່ສໍາຄັນໃນຕໍາແໜ່ງນໍາພາ-ຄຸ້ມຄອງຄື: ຮອງຫົວໜ້າອົງການໄອຍະການປະຊາຊົນສູງສຸດ 1 ສະຫາຍ; ຫົວໜ້າກົມ 1 ສະຫາຍ; ຮອງຫົວໜ້າກົມ 7 ສະຫາຍ; ຫົວໜ້າພະແນກ 15 ສະຫາຍ; ຮອງຫົວໜ້າພະແນກ 23 ສະຫາຍ.
ພ້ອມກັນນັ້ນ, ສະມາຊິກສະຫະພັນແມ່ຍິງກວມ 95% ໄດ້ມີຜົນງານດີເດັ່ນ ປະກອບສ່ວນເຂົ້າໃນການຈັດຕັ້ງປະຕິບັດໜ້າທີ່ວຽກງານ ທີ່ຂັ້ນເທິງມອບໝາຍໃຫ້ດ້ວຍຄວາມຮັບຜິດຊອບສູງ ແລະ ໃນໄລຍະຜ່ານມາ ສະມາຊິກສະຫະພັນແມ່ຍິງໄດ້ຮັບໃບຍ້ອງຍໍຈາກລັດຖະບານ, ທ່ານຫົວໜ້າອົງການໄອຍະການປະຊາຊົນສູງສຸດ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ປະທານຄະນະບໍລິຫານງານສູນກາງສະຫະພັນກໍາມະບານ ແລະ ເລຂາຄະນະບໍລິຫານງານຊາວໜຸ່ມ.
ເນື່ອງໃນວັນສ້າງຕັ້ງ ສະຫະພັນແມ່ຍິງລາວ ຄົບຮອບ 75 ປີ ໃນນາມສ່ວນຕົວ ຂໍອວຍພອນໄຊອັນປະເສີດ ມາຍັງການນໍາພັກ - ລັດ, ພະນັກງານອາວຸໂສບໍານານ, ຄະນະນໍາສະຫະພັນແມ່ຍິງ, ສະມາຊິກສະຫະພັນແມ່ຍິງ, ແມ່ຍິງລາວບັນດາເຜົ່າ, ພະນັກງານ, ທະຫານ, ຕໍາຫຼວດ ໃນຂອບເຂດທົ່ວປະເທດ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສ່ວນຕົວ, ຄອບຄົວ ແລະ ມີຜົນສໍາເລັດໃນໜ້າທີ່ວຽກງານທຸກປະການ.
ຂ່າວ: ອອປສ
ຄໍາເຫັນ