ຜ່ານມາຕາງໜ້າມອບໂດຍທ່ານ ໄຊສົງຄາມ ມະໂນທັມ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ), ມີທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີລັດຖະມົນຕີກະຊວງການຕ່າງປະເທດ, ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ໄຊສົງຄາມ ມະໂນທັມ ກ່າວວ່າ: ການມອບ-ຮັບໃນຄັ້ງນີ້, ຖືເປັນເຫດການສຳຄັນປະຫວັດສາດແຫ່ງການພັດທະນາການຄົມມະນາຄົມຂອງ ສປປ ລາວ, ແມ່ນສັນຍາລັກຂອງໝາກຜົນຄວາມສຳເລັດທີ່ຍິ່ງໃຫຍ່ຮ່ວມກັນຂອງສອງຊາດລາວ-ຈີນ ໃນການຝຶກຝົນຫຼໍ່ຫຼອມພະນັກງານທາງລົດໄຟທີ່ມີຄວາມອາດສາມາດຂອງປະເທດລາວ. ທາງລົດໄຟລາວ-ຈີນ ໄດ້ເປີດດໍາເນີນການຂົນສົ່ງຢ່າງປອດໄພມາເປັນເວລາ 2 ປີກວ່າ, ວຽກງານທາງລົດໄຟລາວ-ຈີນໄດ້ຮັບການຂະຫຍາຍຕົວຢ່າງກ້າວໜ້າ ແລະ ພັດທະນາຢ່າງວ່ອງໄວ, ດ້ານການຂົນສົ່ງຜູ້ໂດຍສານ ແລະ ການຂົນສົ່ງສິນຄ້ານັບມື້ນັບເພີ່ມຂຶ້ນຢ່າງຕໍ່ເນື່ອງ, ບົດບາດຂອງເສັ້ນທາງທອງຄຳແຫ່ງນີ້ນັບມື້ນັບພົ້ນເດັ່ນ, ເສັ້ນທາງລົດໄຟລາວ-ຈີນຖືເປັນອົງປະກອບທີ່ມີບົດບາດສຳຄັນຫຼາຍໃນການຂັບເຄື່ອນເສດຖະກິດ-ສັງຄົມຂອງປະເທດ ແລະ ການເຊື່ອມຕໍ່ລະຫວ່າງບັນດາປະເທດໃນພາກພື້ນ.ເພື່ອຮັບປະກັນໃຫ້ວຽກງານທາງລົດໄຟລາວ-ຈີນ ມີຄຸນນະພາບສູງ, ໃນເດືອນມິຖຸນາປີ 2020, ບໍລິສັດທາງລົດໄຟ ລາວ-ຈີນ ຈຳກັດ ໄດ້ເປີດຮັບສະໝັກພະນັກງານຂັບລົດໄຟຄົນລາວ ຊຸດທຳອິດ,ຜ່ານການຮຽນຫຼັກສູດທິດສະດີ, ເຂົ້າຮ່ວມຝຶກອົບຮົມ ແລະ ຜ່ານການນຳພາຝຶກຂອງອາຈານຈາກ ສປ ຈີນ, ຜ່ານການຝຶກຝົນວຽກງານຕໍາແໜ່ງຂອງຕົນເອງ, ມາຮອດເດືອນມິຖຸນາ 2022 ໄດ້ຮັບການຄັດເລືອກຈຳນວນ 66 ຄົນ ໃນການເປັນຮອງຜູ້ຂັບລົດໄຟ ແລະ ໃນທ້າຍປີ 2023 ມີຈຳນວນ 30 ຄົນໄດ້ຜ່ານການຄັດເລືອກຮ່ວມຂັບລົດໄຟ ເປັນໄລຍະທາງຫຼາຍກວ່າ 100.000 ກິໂລແມັດ. ພາຍໃຕ້ຜົນງານຂອງເຂົາເຈົ້າທີ່ປະຕິບັດມາຢ່າງຕໍ່ເນື່ອງຈຶ່ງສໍາເລັດການຄັດເລືອກເອົາຜູ້ຂັບລົດໄຟດີເດັ່ນຈໍານວນ 14 ຄົນ (ຜູ້ຂັບລົດໄຟທີ່ໃຊ້ໄຟຟ້າຈໍານວນ 12 ຄົນ ແລະ ຜູ້ຂັບລົດໄຟທີ່ໃຊ້ຈັກກາຊວນຈໍານວນ 2 ຄົນ) ຊຶ່ງໄດ້ຜ່ານການຝຶກອົບຮົມເພີ່ມຄວາມຮູ້ທາງດ້ານທິດສະດີເປັນເວລາ 4 ເດືອນ ແລະ ຝຶກອົບຮົມເພີ່ມທັກສະທາງດ້ານການປະຕິບັດຕົວຈິງເປັນເວລາ 4 ເດືອນເຊັ່ນກັນ. ປັດຈຸບັນຜູ້ຂັບລົດໄຟທັງ 14 ຄົນ ລ້ວນແຕ່ຜ່ານການກວດສອບຄຸນວຸທິການຂັບລົດໄຟ ແລະ ໄດ້ຜ່ານການຄັດເລືອກເພື່ອຮັບໃບຢັ້ງຢືນນັກຂັບຂີ່ລົດໄຟທີ່ອອກໃຫ້ໂດຍກະຊວງ ຍທຂ ສປປ ລາວ ແລະ ບໍລິສັດທາງລົດໄຟລາວ-ຈີນ ຈຳກັດ.
ທ່ານ ຫຼິວ ຫົງ ຜູ້ອຳນວຍການໃຫຍ່ ບໍລິສັດທາງລົດໄຟລາວ-ຈີນ ຈຳກັດ ກ່າວວ່າ: ນັກຂັບຂີ່ລົດໄຟຄົນລາວ ທີ່ບັນຊາຂັບເຄື່ອນດ້ວຍຕົນເອງ ແມ່ນໝາກຜົນຄວາມສຳເລັດອັນສຳຄັນຂອງຄວາມມານະພະຍາຍາມຮ່ວມກັນ ແລະ ການຮ່ວມມືຢ່າງຈິງໃຈລະຫວ່າງສອງປະເທດລາວ-ຈີນ ທີ່ສຸມໃສ່ດ້ານການຝຶກຝົນຫຼໍ່ຫຼອມຄວາມສາມາດໃຫ້ພະນັກງານດ້ານການລົດໄຟຂອງລາວ ແລະ ການດຳເນີນງານທາງລົດໄຟລາວ-ຈີນໃຫ້ມີຄຸນນະພາບສູງ. ໃນບາດກ້າວຕໍ່ໄປ, ບໍລິສັດຈະນຳໃຊ້ຊັບພະຍາກອນດ້ານວຽກງານການສຶກສາເຂົ້າໃນການສິດສອນຢ່າງເຕັມຮູບແບບເຊັ່ນ: ຊຸກຍູ້ໃຫ້ມະຫາວິທະຍາໄລການລົດໄຟຈີນ ແລະ ວິທະຍາໄລເຕັກນິກ-ວິຊາຊີບການລົດໄຟລາວ ສົມທົບກັນໃຫ້ມີປະສິດທິຜົນສອດຄ່ອງກັບຄວາມເປັນຈິງ, ກຳນົດຕຳແໜ່ງງານ, ມີທັກສະທີ່ພົ້ນເດັ່ນ ແລະ ປັບປຸງລະບົບການຝຶກທັກສະດ້ານວິຊາຊີບຢ່າງຕໍ່ເນື່ອງ, ຝຶກອົບຮົມສ້າງຜູ້ບໍລິຫານ ແລະ ວິຊາການຄົນລາວຊຸດທຳອິດ ທີ່ມີທັກສະຄວາມຊຳນານດ້ານວຽກງານທາງລົດໄຟ, ສ້າງໜ່ວຍງານທີ່ມີຄວາມມັກຮັກຕໍ່ກັບວຽກງານການລົດໄຟ, ຖະໜັດໃນວິຊາຊີບ, ມີຄວາມສຳນິຊຳນານໃນການດຳເນີນທຸລະກຳທາງລົດໄຟ ໂດຍສຸມໃສ່ເປົ້າໝາຍທີ່ມີມາດຕະຖານສູງ, ມີຄວາມຍືນຍົງ, ສ້າງຊີວິດການເປັນຢູ່ທີ່ດີແກ່ປະຊາຊົນ, ບໍລິສັດພວກເຮົາຈະສືບຕໍ່ຊຸກຍູ້ວຽກງານທາງດ້ານການພັດທະນາເສັ້ນທາງລົດໄຟຂອງລາວໃຫ້ນັບມື້ນັບມີຄຸນນະພາບສູງຂຶ້ນ.
ນອກນີ້, ຝ່າຍທາງລົດໄຟແຫ່ງຊາດຈີນ ກໍໄດ້ໃຫ້ການສະໜັບສະໜູນຂະແໜງການທາງລົດໄຟຂອງລາວ ໃນດ້ານມາດຕະຖານເຕັກນິກທາງລົດໄຟທີ່ກ້າວໜ້າ, ການຝຶກອົບຮົມທາງດ້ານທັກສະຄວາມສາມາດ ແລະ ລະບົບການປະເມີນສີມືຂອງພະນັກງານໂດຍບໍ່ເສຍຄ່າ, ຈັດສົ່ງວິຊາການຜູ້ຊ່ຽວຊານມາປະຈຳການຢູ່ລາວ, ຊ່ວຍໃຫ້ທາງລົດໄຟຂອງລາວມີຄວາມທັນສະໄໝຍິ່ງຂຶ້ນ. ລະບົບການຄຸ້ມຄອງການຂົນສົ່ງທາງລົດໄຟ, ຝຶກຝົນບຸກຄະລາກອນຄົນລາວ ໃຫ້ມີຄວາມສາມາດທາງການລົດໄຟໃຫ້ມີຄຸນນະພາບສູງ ແລະ ເປັນມືອາຊີບ ເພື່ອຊຸກຍູ້ເຂົ້າໃນດ້ານອຸດສາຫະກຳທາງລົດໄຟ ແລະ ການພັດທະນາເສດຖະກິດ-ສັງຄົມຂອງລາວ.
ຂ່າວ: ຂປລ, ພາບ: ເກດສະໜາ
ຄໍາເຫັນ