 |
ໂຄງການກໍ່ສ້າງໂຮງຮຽນມັດທະຍົມຕອນຕົ້ນ ສົບແວກ ໂດຍແມ່ນ ພະແນກສຶກສາທິການ ແລະ ກິລາແຂວງຫົວພັນ ເປັນເຈົ້າຂອງໂຄງການ ແລະ ບໍລິສັດ ວັນໂນພອນ ກໍ່ສ້າງ ເປັນຜູ້ຮັບເໝົາ. ໂຄງການໄດ້ເລີ່ມລົງມືກໍ່ສ້າງມາແຕ່ວັນທີ 22 ພຶດສະພາ 2024 ແລະ ສຳເລັດ 100% ໃນວັນທີ 3 ກັນຍາ 2026 (ລວມໃຊ້ເວລາດຳເນີນການກໍ່ສ້າງທັງໝົດ 824 ວັນ). ຊຶ່ງໂຄງການນີ້ໄດ້ຮັບການສະໜັບສະໜູນງົບປະມານລັດຖະບານ ຈາກກະຊວງສຶກສາທິການ ແລະ ກິລາ (ບ້ວງນ້ຳເທີນ 2) ລວມມູນຄ່າທັງໝົດ 5,829,804,937 ກີບ ໂດຍໝວດວຽກ ແລະ ໂຄງສ້າງອາຄານທີ່ໄດ້ຮັບການກໍ່ສ້າງ ປະກອບມີ:ອາຄານຮຽນ 1 ຫຼັງ (4 ຫ້ອງຮຽນ, 1 ຫ້ອງການຄູ) ຂະໜາດ 9×39 ແມັດ; ອາຄານຫ້ອງທົດລອງ ແລະ ຫ້ອງອ່ານ(ຫ້ອງສະໝຸດ) 1 ຫຼັງ (2 ຫ້ອງ) ຂະໜາດ 9×15 ແມັດ; ອາຄານຫໍພັກນັກຮຽນ (ຍິງ-ຊາຍ) 1 ຫຼັງຂະໜາດ 6.5×39 ແມັດ; ອາຄານຫໍພັກຄູ 1 ຫຼັງ (4 ຫ້ອງ) ຂະໜາດ 9×16 ແມັດ; ອາຄານເຮືອນຄົວ 1 ຫຼັງ ຂະໜາດ 5×8 ແມັດ; ອາຄານຫ້ອງນ້ຳ (ແຍກຍິງ-ຊາຍ) 2 ຫຼັງ ຂະໜາດ 2.9×4.8 ແມັດ. ນອກນີ້ຍັງລະບົບພື້ນຖານໂຄງລ່າງ ເຊັ່ນ ວຽກສະໜອງນ້ຳ ແລະ ອ່າງເກັບນ້ຳ; ອຸປະກອນ ແລະ ເຟີນີເຈີຄົບຊຸດ ໂຕະ-ຕັ່ງນັກຮຽນ, ໂຕະຄູ, ໂຕະຫ້ອງທົດລອງ, ຕູ້ໃສ່ປຶ້ມ, ຕຽງນອນ, ໂຕະກິນເຂົ້ານັກຮຽນ, ຕູ້ອາຫານ, ຝາກໍ່ດ້ວຍດິນຈີ່, ຫຼັງຄາມຸງກະເບື້ອງ, ພື້ນເບຕົງເສີມເຫຼັກ ແລະ ລະບົບໄຟຟ້າຄົບຊຸດ.
 |
ໃນໄລຍະປະຕິບັດໂຄງການ ເຖິງວ່າຈະພົບພໍ້ຂໍ້ຫຍຸ້ງຍາກຫຼາຍປະການ ເປັນຕົ້ນແມ່ນ ເສັ້ນທາງຂົນສົ່ງວັດສະດຸມີຄວາມຫຍຸ້ງຍາກ, ຂາດແຄນໄຟຟ້າ (ຕ້ອງໄດ້ໃຊ້ຈັກປັ່ນໄຟ), ແຫຼ່ງນ້ຳບໍ່ພຽງພໍ (ຕ້ອງໄດ້ສູບນ້ຳຈາກຫ້ວຍຂຶ້ນມາໃຊ້) ແລະ ບໍ່ມີສັນຍານໂທລະສັບ ເຮັດໃຫ້ການປະສານງານ ແລະ ການຕິດຕາມກໍ່ສ້າງມີຄວາມຊັກຊ້າ. ແຕ່ດ້ວຍຄວາມພະຍາຍາມ ແລະ ເອົາໃຈໃສ່ຂອງບໍລິສັດຜູ້ຮັບເໝົາ ບວກກັບການຕິດຕາມຢ່າງໃກ້ຊິດຂອງຄະນະຮັບຜິດຊອບ, ໂຄງການຈຶ່ງສາມາດສຳເລັດຕາມສັນຍາ ແລະ ພ້ອມມອບ-ຮັບ ເພື່ອນຳໃຊ້ເຂົ້າໃນການຮຽນ-ການສອນ ຢ່າງມີປະສິດທິພາບ ແລະ ເກີດປະໂຫຍດສູງສຸດ. (ຂ່າວ:ພະແນກສຶກສາທິການ ແລະ ກິລາແຂວງຫົວພັນ)
ຄໍາເຫັນ