ມອບ-ຮັບເຄື່ອງສໍາຫຼວດ ແລະ ວັດແທກທີ່ດິນ ພ້ອມທັງອົບຮົມການນຳໃຊ້

ພິທີມອບ-ຮັບ ພ້ອມທັງເປີດຝຶກອົບຮົມການນໍາໃຊ້ເຄື່ອງມືສໍາຫຼວດວັດແທກທີ່ດິນ ເພື່ອກຽມພ້ອມລົງຈັດຕັ້ງປະຕິບັດ ການຢັ້ງຢືນທີ່ດິນກະສິກໍາ ໃນບັນດາເມືອງ ແລະ ບ້ານຢູ່ແຂວງຄໍາມ່ວນ ໄດ້ຈັດຂຶ້ນໃນວັນທີ 2 ຕຸລາ ນີ້ ທີ່ພະແນກກະສິກຳ ແລະ ປ່າໄມ້ແຂວງ ໂດຍມີ ທ່ານ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ທ່ານ ນາງ ດາລຸນນີ ໄຊຍະບຸດ ຮອງຫົວໜ້າພະແນກກະສິກຳ ແລະ ປ່າໄມ້ແຂວງ, ບັນດາທ່ານຕາງໜ້າຈາກພະແນກການ, ຂະແໜງການ, ໜ່ວຍງານວິຊາການກ່ຽວຂ້ອງເຂົ້າຮ່ວມ.
    ວຽກງານທີ່ດິນ ແມ່ນເປັນວຽກງານໜຶ່ງ ທີ່ທາງພັກ-ລັດຖະບານຂອງພວກເຮົາ ໄດ້ເອົາໃຈໃສ່ໃຫ້ຄວາມສໍາຄັນເປັນພິເສດ ໂດຍເລັ່ງໃສ່ການຄຸ້ມຄອງ, ການປົກປັກຮັກສາ ແລະ ນໍາໃຊ້ໃຫ້ເກີດຜົນປະ ໂຫຍດສູງ ແລະ ຍາວນານ ໂດຍແມ່ນຂະແໜງການທີ່ດິນ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ເປັນຜູ້ຄຸ້ມຄອງຂັ້ນມະຫາພາກ, ໃນນັ້ນກໍໄດ້ແບ່ງອອກເປັນ 8 ປະເພດທີ່ດິນ ພ້ອມທັງມອບໝາຍໃຫ້ ບັນດາກະຊວງ, ພະແນກການ ທີ່ກ່ຽວຂ້ອງ ຮັບຜິດຊອບ ໃນການຄຸ້ມຄອງ, ວາງແຜນການນໍາໃຊ້ ພ້ອມທັງອອກລະບຽບການຕ່າງໆ ໃນການປົກປັກຮັກສາ ແລະ ລາຍງານໃຫ້ຂັ້ນເທິງໄດ້ຮັບຊາບເປັນແຕ່ລະໄລຍະ.
ການນໍາຂອງແຂວງຄໍາມ່ວນ ຈຶ່ງໄດ້ສະໜອງງົບປະມານ ເພື່ອຈັດຊື້ເຄື່ອງສໍາຫຼວດ ແລະ ວັດແທກທີ່ດິນ GNSS ຮຸ່ນ RTK CHC i83 ຈໍານວນ 1 ຊຸດ ນໍາມາມອບໃຫ້ແກ່ພະແນກກະສິກໍາ ແລະ ປ່າໄມ້ແຂວງ ເພື່ອນໍາໃຊ້ໃນການລົງເຄື່ອນໄຫວເຮັດວຽກຢັ້ງຢືນການນໍາໃຊ້ທີ່ດິນກະສິກໍາ. ພ້ອມນີ້ທາງຄະນະຄູຝຶກຈາກບໍລິສັດຜູ້ສະໜອງອຸປະກອນ ກໍໄດ້ແນະນໍາວິທີການນໍາໃຊ້ ແລະ ການບໍາລຸງຮັກສາ (ຝຶກອົບຮົມ) ເພື່ອເຮັດໃຫ້ມີປະສິດທິຜົນສູງສຸດ ໂດຍໃຊ້ເວລາ 3 ວັນ ໃນລະຫວ່າງ ວັນທີ 2-4 ຕຸລາ 2023 ຈາກນັ້ນແມ່ນຈະໄດ້ສືບຕໍ່ລົງໄປເຮັດວຽກຕົວຈິງຢູ່ບັນດາບ້ານ, ເມືອງ ໃນທົ່ວແຂວງຄຳມ່ວນ. 
ການຈັດຕັ້ງປະຕິບັດວຽກງານການຢັ້ງຢືນທີ່ດິນກະສິກໍາ ໃນຄັ້ງນີ້ຖືວ່າເປັນໜ້າວຽກທີ່ສໍາຄັນ ເປັນ ບາດກ້າວລິເລີ່ມທີ່ດີ ຊຶ່ງຈະໄດ້ເລັ່ງໃສ່ດິນກະສິກຳ ທີ່ເປັນເປົ້າໝາຍເຂດຈຸດສຸມໃນການຜະລິດເປັນສິນຄ້າ ແລະ ຄໍ້າປະກັນທາງດ້ານສະບຽງອາຫານ ທີ່ນອນໃນບັນດາແຂວງຈຸດສຸມຂອງລັດຖະບານ. ຈຸດປະສົງ ແລະ ເປົ້າໝາຍຫຼັກ ເພື່ອປົກປັກຮັກສາຄຸ້ມຄອງການນໍາໃຊ້ ທີ່ດິນກະສິກໍາ 4,5 ລ້ານເຮັກຕາ ໃນທົ່ວປະເທດ ທີ່ລັດຖະບານໄດ້ຮັບຮອງເອົາແລ້ວນັ້ນ ເວົ້າລວມ, ເວົ້າສະເພາະ ກໍຄື ເນື້ອທີ່ດິນກະສິກໍາ ຈໍານວນ 247.890 ເຮັກຕາ ທີ່ສະພາປະຊາຊົນແຂວງຄໍາມ່ວນ ໄດ້ຮັບຮອງ ຕາມແຜນແມ່ບົດຈັດສັນທີ່ດິນ ແລະ ຄຸ້ມຄອງສິ່ງແວດລ້ອມຮອບດ້ານຂອງແຂວງ ຮອດປີ 2030, ເພື່ອເຮັດໃຫ້ການນໍາໃຊ້ທີ່ດິນກະສິກຳ ໃຫ້ເກີດຜົນປະໂຫຍດສູງສຸດ ແລະ ຍາວນານ, ເພື່ອເປັນຂໍ້ມູນພື້ນຖານການຢັ້ງຢືນເປັນທາງການ ໃຫ້ແກ່ພໍ່ແມ່ນປະຊາຊົນ ມີສິດຄຸ້ມຄອງນໍາໃຊ້ໄດ້ຢ່າງຖືກຕ້ອງ ຕາມລະບຽບກົດໝາຍ, ເສຍພາສີທີ່ດິນ, ເສຍພັນ ທະໃນການນໍາໃຊ້ທີ່ດິນ, ປະກອບສ່ວນສ້າງລາຍຮັບໃຫ້ແກ່ລັດຖະບານ ຕາມຂອບເຂດເນື້ອທີ່ຂອງຕົນຄຸ້ມຄອງ, ສ້າງເງື່ອນໄຂເອື້ອອໍານວຍໃນການພັດທະນາທີ່ດິນກະສິກຳ ໃຫ້ມີຄວາມຮັບປະກັນ ດ້ານການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ. 
(ຂ່າວ-ພາບ: ກອງຄໍາ)