ມອບ-ຮັບທຶນການສຶກສາໃຫ້ນັກຮຽນດ້ອຍໂອກາດ ຈໍານວນ 109 ຄົນໃນ 3 ແຂວງເປົ້າໝາຍ ໂດຍການສະໜັບສະໜູນຂອງວົງນັກຮ້ອງຊາຍ ເຊເວັນທີນ ສ ເກົາຫຼີ ພາຍໃຕ້ໂຄງການ Bridge Laos Project ໄລຍະທີ II
ຄະນະກຳມາທິການແຫ່ງຊາດລາວເພື່ອອຸຍແນສໂກ, ກົມຮ່ວມມືກັບຕ່າງປະເທດ ຮ່ວມກັບ ກົມການສຶກສານອກໂຮງຮຽນ, ກະຊວງສຶກສາທິການ ແລະ ກິລາ ໄດ້ຈັດພິທີມອບທຶນການສຶກສາໃຫ້ນັກຮຽນດ້ອຍໂອກາດ ຈໍານວນ109 ຄົນ (ຍິງ 54 ຄົນ) ໃນ 3 ແຂວງຄື: ອຸດົມໄຊ, ຄຳມ່ວນ ແລະ ສະຫວັນນະເຂດ ພາຍໃຕ້ໂຄງການ "Bridge Laos Project" ໄລຍະທີII ໂດຍໄດ້ຮັບການສະໜັບສະໜູນຈາກວົງນັກຮ້ອງຊາຍເຊເວັນທີນ (Seventeen) ຈາກປະເທດ ສ ເກົາຫຼີ ໃນໂອກາດສະເຫຼີມສະຫຼອງຄົບຮອບ 11 ປີ ຂອງວົງດັ່ງກ່າວ.
ໂຄງການ Bridge ແມ່ນການຮ່ວມມືດ້ານກາານສຶກສາ ລະຫວ່າງຄະນະກຳມາທິການແຫ່ງຊາດລາວເພື່ອອຸຍແນສໂກ ແລະ ຄະນະກຳມາທິການແຫ່ງຊາດເກົາຫຼີເພື່ອອຸຍແນສໂກຊຶ່ງມີຈຸດປະສົງເພື່ອສົ່ງເສີມເປົ້າໝາຍການພັດທະນາແບບຍືນຍົງ-ເປົ້າໝາຍທີ 4 (SDG4) ໂດຍສຸມໃສ່ການສ້າງໂອກາດໃຫ້ເດັກ ແລະ ຊາວໜຸ່ມຜູ້ດ້ອຍໂອກາດ ທີ່ຢູ່ນອກໂຮງຮຽນມີໂອກາດໄດ້ຮັບການສຶກສາ ພ້ອມທັງວິຊາຊີບຂັ້ນພື້ນຖານ. ສປປ ລາວ ໄດ້ເຂົ້າຮ່ວມໂຄງການໃນໄລຍະທີ I ໃນຊ່ວງປີ 2020-2024 ແລະ ໄດ້ສືບຕໍ່ຈັດຕັ້ງປະຕິບັດໂຄງການດັ່ງກ່າວໄລຍະທີ II ແຕ່ ປີ 2025-2029. ໃນປີ 2026 ນີ້, ໂຄງການໄດ້ຮັບການສະໜັບສະໜູນດ້ານງົບປະມານເພີ່ມຕື່ມ ຈາກວົງນັກຮ້ອງຊາຍເຊເວັນທີນ ຜ່ານໂຄງການ "Going Together" ພາຍໃຕ້ໂຄງການທຶນຊ່ວຍເຫຼືອຊາວໜຸ່ມໂລກ (Global Youth Grant Scheme) ເພື່ອສະໜັບສະໜູນການສຶກສາໃຫ້ນັກຮຽນທີ່ດ້ອຍໂອກາດໃນ ສປປ ລາວ ໂດຍຜ່ານຄະນະກຳມະການແຫ່ງຊາດເກົາຫຼີ ເພື່ອອຸຍແນສໂກ ພາຍໃຕ້ໂຄງການ Bridge Laos Project.
 |
| |
ນັກຮຽນຜູ້ໄດ້ຮັບທຶນ ຈະໄດ້ຮັບການສະໜັບສະໜູນດ້ານອຸປະກອນແລະງົບປະມານ ສຳລັບສະໜັບສະໜູນການເຂົ້າຮຽນໃນຊັ້ນມັດທະຍົມສຶກສາຕອນຕົ້ນປີທີ 1 ໃນສົກຮຽນ 2026-2027 ເພື່ອປະກອບສ່ວນຫຼຸດຜ່ອນການໃຊ້ຈ່າຍຂອງຄອບຄົວ ປະຈຳປີ ເຊັ່ນ: ຊຸດເຄື່ອງແບບນັກຮຽນ ແລະ ຊຸດກິລາ; ປຶ້ມແບບຮຽນມັດທະຍົມຕອນຕົ້ນຄົບຊຸດ; ອຸປະກອນການຮຽນ; ເບ້ຍລ້ຽງໃນໄລຍະສົກຮຽນ 2026-2027 ແລະ ຄ່າບໍາລຸງຮັກສາໂຮງຮຽນ. ພ້ອມທັງມີໃບຍ້ອງຍໍ ແລະ ນະໂຍບາຍຕໍ່ນັກຮຽນຜູ້ທີ່ມີຜົນການຮຽນດີເດັ່ນ. ນັກຮຽນຜູ້ໄດ້ຮັບທຶນແມ່ນຢູ່ໃນ 30 ບ້ານເປົ້າໝາຍ ຂອງ 6 ເມືອງ ໃນ 3 ແຂວງ: ແຂວງອຸດົມໄຊ 36 ຄົນ (ຍິງ 18 ຄົນ), ແຂວງສະຫວັນນະເຂດ 36 ຄົນ (ຍິງ 22 ຄົນ) ແລະ ແຂວງຄຳມ່ວນ 37 ຄົນ (ຍິງ 14 ຄົນ).
 |
| |
ພິທີມອບ-ຮັບທຶນ ໄດ້ຈັດຂຶ້ນໃນລະຫວ່າງວັນທີ 13-14 ສິງຫາ 2026 ທີ່ ເມືອງໄຊ ແລະ ເມືອງງາ, ແຂວງອຸດົມໄຊ; ວັນທີ 20-21 ສິງຫາ 2026 ທີ່ ເມືອງເຊໂປນ ແລະ ເມືອງນອງ, ແຂວງສະຫວັນນະເຂດ; ແລະ ວັນທີ 25-26 ສິງຫາ 2026 ທີ່ ເມືອງຍົມມະລາດ ແລະ ເມືອງມະຫາໄຊ, ແຂວງຄໍາມ່ວນ. ພິທີດັ່ງກ່າວ ມີຜູ້ຕາງໜ້າຈາກກະຊວງສຶກສາທິການ ແລະ ກິລາ, ພະແນກສຶກສາທິການ ແລະ ກິລາແຂວງ, ຫ້ອງການສຶກສາທິການ ແລະ ກິລາເມືອງ, ຄູ-ອາຈານ, ພໍ່ແມ່-ຜູ້ປົກຄອງ, ຕາງໜ້າອົງການປົກຄອງຕາແສງ-ບ້ານ ແລະ ນັກຮຽນ ເຂົ້າຮ່ວມຢ່າງພ້ອມພຽງ.
ການມອບ-ຮັບທຶນໃນຄັ້ງນີ້ ໄດ້ສ້າງຄວາມປິຕິຍິນດີ ແລະ ນຳມາຊຶ່ງຄວາມຫວັງໃໝ່ໃຫ້ແກ່ນັກຮຽນ ແລະ ຄອບຄົວ. ພ້ອມນີ້, ທຸກພາກສ່ວນຍັງມີຄວາມເຊື່ອໝັ້ນວ່າ ໂອກາດທາງການສຶກສາທີ່ໄດ້ຮັບໃນຄັ້ງນີ້ ຈະເປັນພະລັງ ແລະ ແຮງບັນດານໃຈໃຫ້ນັກຮຽນມີຄວາມຕັ້ງໃຈ, ພາກພຽນ ແລະ ບຸກບືນຮ່ຳຮຽນ ເພື່ອສ້າງອະນາຄົດທີ່ດີກວ່າ.
ຄໍາເຫັນ