ມອບລາງວັນແຂ່ງຂັນວິດີໂອສັ້ນ ເລື່ອງລາວຂອງຂ້ອຍກັບທາງລົດໄຟ ລາວ-ຈີນ

ສະຖານທູດ ສປ ຈີນ  ປະຈໍາ ສປປ ລາວ ຮ່ວມກັບ ບໍລິສັດລົດໄຟ ລາວ-ຈີນ, ສູນວັດທະນະທໍາຈີນ ປະຈໍາ ສປປ ລາວ, ສໍານັກຂ່າວຊິນຮວາ ສາຂານະຄອນຫຼວງວຽງຈັນ ແລະ ສະຖານີວິທະຍຸສາກົນແຫ່ງຊາດຈີນ CRI ປະຈໍາ ສປປ ລາວ  ໄດ້ຈັດພິທີມອບລາງວັນໃຫ້ຜູ້ຊະນະເລີດການແຂ່ງຂັນວິດີໂອສັ້ນພາຍໃຕ້ຫົວຂໍ້ ເລື່ອງລາວຂອງຂ້ອຍກັບທາງລົດໄຟ ລາວ-ຈີນ ຂຶ້ນໃນວັນທີ 16 ຕຸລາ ນີ້ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍມີ ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ(ຖວທ); ທ່ານ ຫວາງ ຊ່າງ(Wang Chang) ອຸປະທູດສະຖານເອກອັກຄະລັດຖະທູດ ສປ  ຈີນ ປະຈໍາ ສປປ ລາວ, ພ້ອມດ້ວຍພາກສ່ວນກ່ຽວຂ້ອງ ແລະ ຜູ້ໄດ້ຮັບລາງວັນ ເຂົ້າຮ່ວມ. 
ເພື່ອປະກອບສ່ວນສະເຫຼີມສະຫຼອງ ຂໍ້ລິເລີ່ມຂອງທ່ານ ສີຈິ້ນຜີງ ກ່ຽວກັບ ໜຶ່ງແລວ ໜຶ່ງເສັ້ນທາງ. ປັດຈຸບັນແມ່ນຄົບຮອບ 10 ປີ. ໃນໄລຍະ 10 ປີຜ່ານມາ, ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ໄດ້ກາຍເປັນຜະລິດຕະພັນສາທາລະນະລະດັບສາກົນ ທີ່ໄດ້ຮັບຄວາມນິຍົມ ແລະ ເປັນເວທີຮ່ວມມືສາກົນຂະໜາດໃຫຍ່ທີ່ສຸດ ສອງຊາດລາວ-ຈີນ  ໄດ້ບັນລຸຸໃນການຮ່ວມກັນສ້າງ ຂໍ້ລິເລີ່ມດັ່ງກ່າວ ທີ່ມີຄຸນນະພາບສູງ ແລະ ໄດ້ຮັບການແຕກດອກອອກຜົນຢ່າງສະຫງ່າງາມ, ພັດທະນາສົ່ງເສີມ ໂຄງການເພື່ອຊີວິດການເປັນຢູ່ຂອງປະຊາຊົນ  ຫຼາຍໂຄງການ ໂດຍສະເພາະກໍຄືໂຄງການເສັ້ນທາງລົດໄຟ ລາວ-ຈີນ  ຊຶ່ງມັນໄດ້ກາຍເປັນໂຄງການທີ່ສໍາຄັນ ເປັນຕົວແທນໃຫ້ແກ່ມິດຕະພາບລະຫວ່າງສອງຊາດ ລາວ-ຈີນ ແລະ ສັນຍາລັກໃຫ້ກັບຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ. 
ໃນການແຂ່ງຂັນຄັ້ງນີ້ ໄດ້ຄັດເລືອກເອົາຜົນງານທີ່ດີເດັ່ນ 21 ຜົນງານ.  ລາງວັນຊະນະເລີດ(ທີ1) ມີ 1 ລາງວັນ ໄດ້ແກ່ ທ້າວ ບຸນສຸກ ຄັງໄຊ ໄດ້ຮັບເງິນ 12.500.000 ກີບ ພ້ອມປີ້ລົດໄຟຊັ້ນໜຶ່ງ ພາຍໃນປະເທດ ຈໍານວນ 3 ປິ້; ລາງວັນທີ 2 ມີ 2 ລາງວັນ ໄດ້ຮັບເງິນ 7.500.000 ກີບ ພ້ອມປີ້ລົດໄຟຊັ້ນໜຶ່ງ ພາຍໃນປະເທດຈໍານວນ 2 ປີ້; ລາງວັນທີ 3 ມີ 3 ລາງວັນ ໄດ້ຮັບເງິນ 2.500.000 ກີບ ພ້ອມປິ້ລົດໄຟຊັ້ນສອງ ຈໍານວນ 2 ປີ້ ແລະ ລາງວັນທີ 4 ມີ 15 ລາງວັນ ໄດ້ຮັບເງິນ 1.250.000 ກີບ ພ້ອມປີ້ລົດໄຟຊັ້ນສອງ ພາຍໃນປະເທດຈໍານວນ 2 ປີ້.  
ໃນຜົນງານທີ່ໄດ້ຮັບລາງວັນແມ່ນໄດ້ສະແດງໃຫ້ເຫັນວ່າໂຄງການທາງລົດໄຟລາວ-ຈີນ ໄດ້ຊ່ວຍພັດທະນາປະເທດລາວ, ໄດ້ສ້າງຜົນປະໂຫຍດໃຫ້ແກ່ປະຊາຊົນທ້ອງຖິ່ນ; ໄດ້ຫັນປ່ຽນໂສມໜ້າໃໝ່ແກ່ການພັດທະນາເສດຖະກິດ-ສັງຄົມ; ປ່ຽນຄວາມຝັນແຫ່ງຄວາມຜາສຸກຂອງປະຊາຊົນຕາມແລວເສັ້ນທາງລົດໄຟໃຫ້ປະກົດເປັນຈິງ. 
ຂ່າວ-ພາບ: ຍຸພິນທອງ