ມອບສານຕາຕັ້ງ ໃຫ້ເອກອັກຄະລັດຖະທູດ ຜູ້ຕາງໜ້າຖາວອນ ໄປປະຈຳ ອົງການ ສປຊ

ໃນໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍ້ອງຍໍຊົມເຊີຍຕໍ່ ທ່ານ ທອງຜ່ານ ສະຫວັນເພັດ ທີ່ຈະໄປປະຕິບັດໜ້າທີ່ ເປັນເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການ ສປຊ, ພ້ອມທັງໄດ້ສະແດງຄວາມເຊື່ອໝັ້ນວ່າ ທ່ານເອກອັກຄະລັດຖະທູດແຕ່ງຕັ້ງ, ຜູ້ຕາງໜ້າຖາວອນ ຄົນໃໝ່ ຈະສືບຕໍ່ປະກອບສ່ວນ ສຸມທຸກເຫື່ອແຮງ ແລະ ຄວາມຮູ້ຄວາມສາມາດຂອງຕົນ ເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ອົງການສະຫະປະຊາຊາດ ໃຫ້ແຕກດອກອອກຜົນຍິ່ງໆຂຶ້ນ, ລວມທັງການຍາດແຍ່ງເອົາການຮ່ວມມື ແລະ ສະໜັບສະໜູນຊ່ວຍເຫຼືອດ້ານຕ່າງໆ ຈາກສາກົນ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນລາວບັນດາເຜົ່າ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ ກໍຄື ການບັນລຸເປົ້າໝາຍການພັດທະນາແບບຍືນຍົງຂອງອົງການ ສປຊ, ໂດຍສະເພາະການລຶບລ້າງຄວາມທຸກຍາກ ໃຫ້ປະຊາຊົນລາວ ແລະ ການນຳພາປະເທດ ໃຫ້ຫຼຸດພົ້ນອອກ ຈາກສະຖານະພາບ ປະເທດດ້ອຍພັດທະນາ ໃນປີ 2026 ຕາມເປົ້າໝາຍທີ່ວາງໄວ້.