ເມືອງແບງ ປະກາດຄອບຄົວ-ບ້ານປ້ອງກັນຄວາມສະຫງົບດີ,ຄອບຄົວ-ບ້ານປອດຢາເສບຕິດ

ເມື່ອບໍ່ດົນມານີ້, ກອງບັນຊາການປ້ອງກັນຄວາມສະຫງົບ (ປກສ) ເມືອງແບງ ແຂວງອຸດົມໄຊ ໄດ້ຈັດພິທີປະກາດຄອບຄົວ-ບ້ານປ້ອງກັນຄວາມສະຫງົບດີ ແລະ ຄອບຄົວ-ບ້ານປອດຢາເສບຕິດຈຳນວນ 4 ບ້ານຄື: ບ້ານນາງົວ, ບ້ານມາງ, ບ້ານນໍ້າປໍ ແລະ ບ້ານນໍ້າຕຸຍ ພາຍໃຕ້ການເປັນປະທານຂອງທ່ານ ພັທ ສິງຄໍາ ມະນີແກ້ວ ຮອງກອງບັນຊາການ ປກສ ເມືອງພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານ ພັທ ສີວັນ ສຸທິວົງ ຫົວໜ້າພະແນກຄຸ້ມຄອງສໍາມະໂນຄົວ ໄດ້ຜ່ານບົດສະຫຼຸບການປະເມີນຄອບຄົວ-ບ້ານປ້ອງກັນຄວາມສະຫງົບດີ,ຄອບຄົວ-ບ້ານປອດຢາເສບຕິດຈຳນວນ 4 ບ້ານມີທັງໝົດ 551 ຄອບຄົວ. ຜ່ານການລົງປະເມີນຕົວຈິງຕາມມາດຖານເງື່ອນໄຂ ສາມາດປະເມີນໄດ້ຈຳນວນ 461 ຄອບຄົວເປັນຄອບຄົວ-ບ້ານປອດຢາເສບຕິດ ແລະ 432 ຄອບຄົວເປັນຄອບຄົວປ້ອງກັນຄວາມສະຫງົບດີຊຶ່ງໃນນີ້ມີ 4 ບ້ານໄດ້ຮັບຮອງເປັນຄອບຄົວປອດຢາເສບຕິດຄື: ບ້ານນາງົວມີ 99 ຄອບຄົວ, ບ້ານມາງມີ185 ຄອບຄົວ, ບ້ານນໍ້າປໍມີ 56 ຄອບຄົວ, ບ້ານນໍ້າຕຸຍມີ 121 ຄອບຄົວ,ໃນນັ້ນຄອບຄົວປ້ອງກັນຄວາມສະຫງົບດີ ບ້ານນາງົວມີ 96 ຄອບຄົວ, ບ້ານມາງມີ 180 ຄອບຄົວ, ບ້ານນໍ້າປໍມີ 54 ຄອບຄົວແລະ ບ້ານນໍ້າຕຸຍມີ 102 ຄອບຄົວ, ໃນນີ້ໄດ້ຮັບຮອງເອົາບ້ານນໍ້າປໍ, ບ້ານນໍ້າຕຸຍເປັນບ້ານປອດຢາເສບຕິດ ແລະ ບ້ານປ້ອງກັນຄວາມສະຫງົບດີ ໃຫ້ກຽດມອບໃບຢັ້ງຢືນໂດຍທ່ານ ພັທ ສິງຄໍາ ມະນີແກ້ວ.
ຂ່າວ-ພາບ: ຮຕ ຄຳໄຊ ເຢຍລີທໍ