 |
ໃນພິທີ, ປະທານກອງປະຊຸມໄດ້ເລົ່າເຖິງເຫດການຂອງອົງການຈັດຕັ້ງແມ່ຍິງໃນເມື່ອກ່ອນ ກໍຄືສະຫະພັນແມ່ຍິງລາວທີ່ໄດ້ມີພາລະບົດບາດ ແລະ ໜ້າທີ່ຂອງການຈັດຕັ້ງແມ່ຍິງໃນໄລຍະເບື້ອງຕົ້ນ: ແມ່ນເບິ່ງແຍງ, ລ້ຽງດູ, ຊຸກເຊື່ອງ, ຕິດຕໍ່, ສົ່ງຂ່າວພະນັກງານ, ທະຫານປະຕິວັດ, ສົ່ງເອກະສານໃຫ້ພະນັກງານ, ທະຫານ ທີ່ປະຕິບັດໜ້າທີ່ຢູ່ແນວໜ້າ ແລະ ໃນເຂດຄວບຄຸມຂອງສັດຕູດ້ວຍຫຼາຍຮູບແບບ ແລະ ຫຼາຍວິທີການ. ລໍາລຽງສະບຽງອາຫານ, ອາວຸດ, ເຄື່ອງນຸ່ງຫົ່ມໃຫ້ພະນັກງານ, ນັກຮົບຢູ່ແນວໜ້າ. ປຸກລະດົມຂົນຂວາຍຊາວໜຸ່ມ, ລູກ, ຫຼານອອກຮັບໃຊ້ປະເທດຊາດ. ປຸກລະດົມຂະບວນການຂອງແມ່ຍິງ ປະຕິບັດວຽກງານແນວຫຼັງ, ເພີ່ມພູນຜະລິດຜົນຫາລ້ຽງກຸ້ມຕົນເອງ ປະຢັດເຂົ້າປາອາຫານ ເພື່ອສົ່ງໄປແນວໜ້າ ແລະ ປະຕິບັດວຽກງານຕາມການຈັດຕັ້ງມອບໝາຍດ້ວຍຄວາມຮັບຜິດຊອບສູງ. ໂດຍພາຍໃຕ້ການນໍາພາຂອງພັກ ແລະ ໄດ້ຮັບຜົນສະທ້ອນຈາກຂະບວນຕໍ່ສູ້ປະຕິວັດ ທີ່ເລັ່ງທວງໃຫ້ປະຕິບັດເສລີພາບ ຄວາມສະເໜີພາບລະຫວ່າງຍິງ-ຊາຍທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ເທື່ອລະກ້າວ, ອົງການຈັດຕັ້ງເເມ່ຍິງຂັ້ນຮາກຖານຈຶ່ງໄດ້ເລີ່ມເກີດຂຶ້ນໂດຍເລີ່ມຈາກການຈັດຕັ້ງໜ່ວຍເເມ່ຍິງນັກຮົບ ຢູ່ຊົນນະບົດ, ມາຮອດວັນທີ 20 ກໍລະກົດ 1955 ພັກປະຊາຊົນປະຕິວັດລາວໄດ້ປະກາດສ້າງຕັ້ງອົງການສະຫະພັນແມ່ຍິງລາວຂຶ້ນຢ່າງເປັນທາງການ, ມາຮອດປັດຈຸບັນ ເເມ່ນໄດ້ປະກອບສ່ວນເຂົ້າໃນການສ້າງສາພັດທະນາປະເທດຊາດ ບ້ານເມືອງໃຫ້ຈະເລີນຮຸ່ງເຮືອງເປັນກ້າວໆ.
 |
ຈຸດປະສົງໃນການປາຖະກະຖາຄັ້ງນີ້, ກໍເພື່ອແນໃສ່ໃຫ້ບັນດາສະມາຊິກສະຫະພັນແມ່ຍິງທຸກຄົນທີ່ເຂົ້າຮ່ວມໄດ້ຮັບຮູ້ປະຫວັດມູນເຊື້ອການກໍາເນີດ, ເຕີບໃຫຍ່ຂະຫຍາຍຕົວ ແລະ ຜົນງານການ ເຄື່ອນໄຫວວຽກງານ ຂອງອົງການຈັດຕັ້ງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ ທີ່ໄດ້ອຸທິດຕົນ ເພື່ອພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືພາລະກິດພັດທະນາແມ່ຍິງລາວ, ເພື່ອນຳໄປຜັນຂະຫຍາຍໃຫ້ກ້ວາງຂວາງ ແລະ ທົ່ວເຖິງ.
(ຂ່າວ-ພາບ: ພຸດທະສິນ ວົງວິໄລທອງ)
ຄໍາເຫັນ