 |
ສະຫາຍ ບຸນເນື່ອງ ສີລາຄົມ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ໄດ້ຂຶ້ນຜ່ານບົດລາຍງານໂດຍຍົກໃຫ້ເຫັນໂດຍສັງເຂບວ່າ: ປັດຈຸບັນອົງຄະນະພັກເມືອງໂຂງ ປະກອບມີທັງໝົດ 240 ຮາກຖານພັກ (ທຽບໃສ່ປີ 2024 ຫຼຸດລົງ 5 ຮາກຖານພັກ). ໃນນັ້ນ ປະກອບມີ ຄະນະພັກຮາກຖານ 30 ຮາກຖານ, ໜ່ວຍພັກຮາກຖານ 34 ໜ່ວຍພັກ ແລະ ໜ່ວຍພັກທີ່ຂຶ້ນກັບຄະນະພັກຮາກຖານ 206 ໜ່ວຍພັກ.
 |
ຜ່ານການຕີລາຄາແບ່ງປະເພດໜ່ວຍພັກທັງໝົດ 240 ໜ່ວຍພັກ ໃນປີ 2025 ສາມາດຈັດປະເພດໄດ້ ດັ່ງນີ້: ໜ່ວຍພັກແຂງ: ມີ 24 ໜ່ວຍພັກ (ກວມເອົາ 10%); ໜ່ວຍພັກປະເພດກາງ: ມີ 2 ໜ່ວຍພັກ (ກວມເອົາ 0.83%); ໜ່ວຍພັກປະເພດອ່ອນ: ມີ 1 ໜ່ວຍພັກ (ກວມເອົາ 0.41%); ໜ່ວຍພັກບໍ່ໄດ້ແບ່ງປະເພດ: ມີ 10 ໜ່ວຍພັກ (ກວມເອົາ 4.16% ຍ້ອນເງື່ອນໄຂບໍ່ຄົບຖ້ວນ ຫຼື ເປັນໜ່ວຍພັກສ້າງຕັ້ງໃໝ່); ໜ່ວຍພັກທີ່ໄດ້ຮັບຮອງເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ມີທັງໝົດ 203 ໜ່ວຍພັກ (ກວມເອົາ 84% ຂອງໜ່ວຍພັກທົ່ວເມືອງ).
ທົ່ວເມືອງໂຂງ ມີສະມາຊິກພັກທັງໝົດ 3,129 ສະຫາຍ (ຍິງ 733 ສະຫາຍ, ສະມາຊິກພັກສຳຮອງ 146 ສະຫາຍ, ຍິງ 50 ສະຫາຍ), ເມື່ອທຽບໃສ່ປີ 2024 ແມ່ນມີສະມາຊິກພັກເພີ່ມຂຶ້ນ 99 ສະຫາຍ. ຜ່ານການຈັດປະເພດສະມາຊິກພັກ ພົບວ່າມີ ສະມາຊິກພັກແຂງ 2,564 ສະຫາຍ (ຍິງ 572 ສະຫາຍ), ປະເພດກາງ 1 ສະຫາຍ, ບໍ່ມີປະເພດອ່ອນ ແລະ ເສຍທາດ, ສ່ວນສະມາຊິກພັກທີ່ບໍ່ໄດ້ຕີລາຄາຈັດປະເພດມີ 419 ສະຫາຍ (ຍິງ 170 ສະຫາຍ) ເຊິ່ງສ່ວນໃຫຍ່ແມ່ນພະນັກງານບໍານານ ແລະ ສະມາຊິກພັກສຳຮອງ.
 |
ສະຫາຍ ສາທິດ ປັດສາພັນ ໄດ້ໃຫ້ກຽດໂອ້ລົມ ແລະ ທິດຊີ້ນຳ ເຊິ່ງສະຫາຍໄດ້ເນັ້ນໜັກໃຫ້ຄະນະພັກທຸກຂັ້ນ, ເລຂາໜ່ວຍພັກບ້ານທົ່ວເມືອງໂຂງ ຈົ່ງເພີ່ມທະວີຄວາມຮັບຜິດຊອບ, ເອົາໃຈໃສ່ປັບປຸງຮູບແບບວິທີນຳພາ, ຍົກສູງຄຸນນະພາບການເຄື່ອນໄຫວຂອງໜ່ວຍພັກ, ກວດກາປະເມີນຜົນຢ່າງເປັນປົກກະຕິ ແລະ ຕິດພັນກັບຕົວຈິງ ເພື່ອພ້ອມກັນສືບຕໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ມີຄຸນນະພາບສູງຂຶ້ນກວ່າເກົ່າໃນປີ 2026.
ຄໍາເຫັນ