ໃນວັນທີ 19 ມີນານີ້ ໂດຍການເຂົ້າຮ່ວມບັນຍາຍ ແລະ ປາຖະກະຖາຂອງທ່ານ ຖາວອນ ພົມມະໄລລຸນ ພະນັກງານບໍານານ ອະດີດກໍາມະການປະຈໍາພັກແຂວງ ອະດີດຮອງເຈົ້າແຂວງເຊກອງ, ມີທ່ານ ບຸນທັນ ຈູມຈັນທະວົງ ຫົວໜ້າຄະນະໂຄສະນາອົບຮົມແຂວງ, ທ່ານ ຕຸລາວັນ ວົງໄຊ ເຈົ້າເມືອງລະມາມ, ຄະນະພັກ-ຄະນະນໍາ, ສະມາຊິກພັກ, ພະນັກງານ-ລັດຖະກອນ ອ້ອມຂ້າງເມືອງເຂົ້າຮ່ວມຮັບຟັງ.
ຈຸດປະສົງ ເພື່ອທົບທວນຄືນມູນເຊື້ອ ແລະ ໄຊຊະນະອັນຍິ່ງໃຫຍ່ ຂອງການປະຕິວັດພາຍໃຕ້ການນຳພາ-ຊີ້ນຳ ຂອງພັກປະຊາຊົນ ປະຕິວັດລາວ ຕະຫຼອດໄລຍະ 70 ປີຜ່ານມາ, ເພື່ອເປັນການໂຄສະນາສຶກສາອົບຮົມໃຫ້ພະນັກງານ, ສະມາຊິກພັກ ກໍຄື ປະຊາຊົນບັນດາເຜົ່າໄດ້ຮັບຮູ້, ເຂົ້າໃຈທາດແທ້ມູນເຊື້ອອັນດີງາມຂອງພັກ ແນໃສ່ສັນລະເສີນຄຸນງາມຄວາມດີ ຂອງບັນດາບັນພະບູລຸດຜູ້ທີ່ເສຍສະຫຼະຊີວິດເພື່ອຊາດເພື່ອປະຊາຊົນ ແລະ ເພື່ອປຸກລະດົມນໍ້າໃຈຮັກຊາດ, ຮັກລະບອບໃໝ່, ຍົກສູງການສ້າງເສດຖະກິດເອກະລາດ ເປັນເຈົ້າຕົນເອງ ຕາມທິດເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ.
ໃນພິທີ, ທ່ານ ຖາວອນ ພົມມະໄລລຸນ ໄດ້ຍົກໃຫ້ເຫັນເຖິງປະຫວັດ, ມູນເຊື້ອການກຳເນີດ ແລະ ເຕີບໃຫຍ່ຂະຫຍາຍຕົວຂອງພັກປະຊາຊົນ ປະຕິວັດລາວ ຕະຫລອດ 70 ປີຜ່ານມາ, ນັບແຕ່ມື້ສ້າງຕັ້ງຂຶ້ນ ກໍໄດ້ປະເຊີນກັບຈັກກະພັດລ່າເມືອງຂຶ້ນແບບໃໝ່ທີ່ຮ້າຍກາດກວ່າເກົ່າ, ແຕ່ພັກເຮົາກໍໄດ້ແບກຫາບເອົາພາລະກໍາອັນໜັກໜ່ວງ ເພື່ອນໍາພາ-ຊີ້ນໍາປວງຊົນລາວທັງຊາດຕໍ່ສູ້ຕ້ານການຮຸກຮານຂອງຈັກກະພັດ ແລະ ລູກແຫຼ້ງຕີນມືປະຕິການຢ່າງດຸເດືອດຂ້ຽວຂາດ ກ້າວໄປສູ່ການປົດປ່ອຍປະເທດຊາດຢ່າງສົມບູນ ແລະ ພັດທະນາມາເປັນແຕ່ລະໄລຍະ.
ຕະຫຼອດ 70 ປີ ພັກເຮົາໄດ້ນໍາພາ ແລະ ແບກຫາບພາລະກໍາປະຫວັດສາດອັນຍິ່ງໃຫຍ່ ໃນແຕ່ລະໄລຍະທີ່ແຕກຕ່າງກັນ ແລະ ສາມາດປະຕິບັດພາລະກໍາປະຫວັດສາດເຫຼົ່ານັ້ນໄດ້ຢ່າງສະຫງ່າງາມ, ພາຍຫຼັງການສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ພັກໄດ້ນໍາພາປະຕິບັດສອງໜ້າທີ່ຍຸດທະສາດ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ, ຜົນສໍາເລັດສໍາຄັນ ແລະ ເປັນພື້ນຖານກວ່າໝູ່ໝົດ ແມ່ນຄວາມເປັນເອກະລາດ, ອໍານາດອະທິປະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮັບການປົກປັກຮັກສາໄດ້ຢ່າງໝັ້ນຄົງ, ລະບອບປະຊາທິປະໄຕປະຊາຊົນ ມີສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດແຫ່ງຊາດຂະຫຍາຍຕົວດ້ວຍຈັງຫວະໄວຕໍ່ເນື່ອງ ແລະ ຖືກທິດ, ລວມຍອດຜະລິດຕະພັນພາຍໃນ ແລະ ລາຍໄດ້ສະເລ່ຍຕໍ່ຫົວຄົນ ຂອງປະຊາຊົນເຮົານັບມື້ເພີ່ມຂຶ້ນ, ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການເໜັງຕີງຂຶ້ນ-ລົງ ຂອງອັດຕາແລກປ່ຽນເງິນຕາຕ່າງປະເທດ ລວມທັງບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້ນໃນສັງຄົມ ກໍໄດ້ຮັບການແກ້ໄຂ ແລະ ມີທ່າອ່ຽງດີຂຶ້ນຕາມລໍາດັບ.
(ຂ່າວ-ພາບ: ສັນຍາ)
ຄໍາເຫັນ