ວັນວິລະກໍາໂຕນຄຸກໂພນເຄັງຢ່າງມະຫັດສະຈັນ ຂອງບັນດາຜູ້ນໍາພັກ ແລະ ແນວລາວຮັກຊາດ ຄົບຮອບ 65 ປີ (ວັນທີ 24 ພຶດສະພາ 1960- ວັນທີ 24 ພຶດສະພາ 2025) ໂດຍມີການນໍາເມືອງ, ອາດິດການນໍາເມືອງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ຮອງຫົວໜ້າຫ້ອງການ, ສອງກອງບັນຊາການ, ຄະນະພັກຮາກຖານກຸ່ມບ້ານ, ເລຂາພັກບ້ານອ້ອມຂ້າງເມືອງ ແລະ ພະນັກງານ-ລັດຖະກອນເຂົ້າຮ່ວມ.
ສະຫາຍ ບຸນຄົງ ພິມມະສອນ ເລຂາພັກເມືອງ ຮັກສາການເຈົ້າເມືອງ ໄດ້ຂຶ້ນປາຖະກະຖາວັນປົດປ່ອຍຫຼວງນໍ້າທາ ຄົບຮອບ 63 ປີ. ພາຍຫຼັງສິ້ນສຸດຍຸດທະສາດບັ້ນຮົບປົດປ່ອຍຫຼວງນໍ້າທາ ກຳລັງທະຫານປະເທດລາວ ແລະ ທະຫານອາສາສະໝັກຫວຽດນາມ ໄດ້ປັດເຂ່ຍພວກສັດຕູອອກຈາກວົງສູ້ຮົບໄດ້ 1,800 ຄົນ, ດັບສູນໝົດກ້ຽງ, ຈັບທະຫານສັດຕູເປັນສະເລີຍເສິກໄດ້ 1,432 ຄົນ, ຍຶດອາວຸດທຸກຊະນິດໄດ້ 600 ກະບອກ, ລູກປືນໄດ້ 150 ໂຕນ, ຍິງເຮືອບິນຕົກ 4 ລຳ, ປົດປ່ອຍດິນແດນໄດ້ 8,000 ກິໂລຕາແມັດ, ປົດປ່ອຍພົນລະເມືອງໄດ້ 76,000ຄົນ; ມາຮອດວັນທີ 15 ພຶດສະພາ 1962 ສູນກາງພັກ, ກອງບັນຊາການສູງສຸດກອງທັບປົດປ່ອຍປະຊາຊົນລາວ ໄດ້ມີຂໍ້ຕົກລົງສ້າງຕັ້ງກອງບັນຊາການທະຫານແຂວງຫຼວງນໍ້າທາຂຶ້ນ ໂດຍແມ່ນ ສະຫາຍ ສີສະຫວາດ ແກ້ວບຸນພັນ ເປັນຜູ້ປະກາດສ້າງຕັ້ງ ກອງບັນຊາການທະຫານແຂວງຫຼວງນໍ້າທາ ຢູ່ທີ່ບ້ານນໍ້າເເງ້ນ ເມືອງຫຼວງນໍ້າທາໃນປັດຈຸບັນ. ຈາກນັ້ນ, ສະຫາຍ ຄໍາຜາຍ ອຸແປງວົງ ກໍາມະການປະຈໍາພັກເມືອງ ຫົວໜ້າຄະນະໂຄສະນາອົບຮົມເມືອງໄດ້ຂຶ້ນປາຖະກະຖາ ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ ຄົບຮອບ 66 ປີ ແລະ ສະຫາຍ ນາງ ຈັນສະໄໝ ແກ້ວມະນີວົງ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ໄດ້ປາຖະກະຖາວັນວັນວິລະກໍາໂຕນຄຸກໂພນເຄັງຢ່າງມະຫັດສະຈັນ ຂອງບັນດາຜູ້ນໍາພັກ ແລະ ແນວລາວຮັກຊາດ ຄົບຮອບ 65 ປີ ໃນໄລຍະປີ 1957-1959. ພ້ອມກັນນັ້ນ, ໃນພິທີ ຍັງໄດ້ປະດັບຫຼຽນກາລະນຶກ 70 ປີ ວັນສ້າງຕັ້ງພັກປະຊາຊົນປະຕິວັດລາວ ໃຫ້ແກ່ອາດິດການນໍາຂອງເມືອງຫຼວງນໍ້າທາ ຈໍານວນ 31 ສະຫາຍ, ຍິງ 4 ສະຫາຍ ໂດຍການປະດັບຫຼຽນຂອງສະຫາຍ ບຸນຄົງ ພິມມະສອນ ຢ່າງສົມກຽດ.
(ແຫຼ່ງຂ່າວ: ແຂວງຫຼວງນໍ້າທາ)
ຄໍາເຫັນ