ເມືອງພຽງ ປະກາດສ້າງຕັ້ງຕາແສງທົ່ງນາພຽງ

ທ່ານ ຄຳພັນ ຄຳພູບົວ ປະທານຄະນະກຳມະການປົກຄອງເມືອງພຽງ ໄດ້ລາຍງານການສ້າງຕັ້ງຕາແສງທົ່ງນາພຽງ ເຊິ່ງ ມີສໍານັກງານຕັ້ງຢູ່ບ້ານເມືອງພຽງ ປະກອບມີ 12 ບ້ານຄື: ບ້ານແສງຈະເລີນ ບ້ານໜອງງົວ, ບ້ານໂພນໄຊ, ບ້ານເມືອງພຽງ, ບ້ານໂພນຫີນ, ບ້ານດົງເງິນ, ບ້ານດົງຫຼວງ, ບ້ານກາງ ບ້ານໂພນສະຫວ່າງ, ບ້ານນາກອກ, ບ້ານນໍ້າເຮ້ຍ ແລະ ບ້ານນໍ້າງິມ; ມີພົນລະເມືອງທັງໝົດ 15,178 ຄົນ, ຍິງ 7,424 ຄົນ, ມີໜ່ວຍພັກທີ່ຈະຂຶ້ນກັບຕາແສງທັງໝົດ 22 ໜ່ວຍພັກ, ໜ່ວຍພັກບ້ານ 12 ໜ່ວຍພັກ, ໜ່ວຍພັກໂຮງຮຽນ 8 ໜ່ວຍພັກ, ໜ່ວຍພັກ ປກສ ກຸ່ມບ້ານ 1 ໜ່ວຍພັກແລະ ໜ່ວຍພັກຫ້ອງການຕາແສງ 1 ໜ່ວຍ, ມີສະມາຊິກພັກທັງໝົດ 388 ສະຫາຍ.

ທົ່ວຕາແສງມີເນື້ອທີ່ການຜະລິດທັງໝົດ 3,939.76 ເຮັກຕາ, ໃນນັ້ນເນື້ອທີ່ປູກເຂົ້າ 1,694.76 ເຮັກຕາ, ເນື້ອທີ່ປູກພືດເປັນສິນຄ້າ 11,994.55 ເຮັກຕາ, ເນື້ອທີ່ປູກພືດຜັກ 251 ເຮັກຕາ ເຊິ່ງການປະກາດສ້າງຕັ້ງຕາແສງທົ່ງນາພຽງ ໃນຄັ້ງນີ້ ກໍເພື່ອເປີດກ້ວາງໃຫ້ປະຊາຊົນ ໄດ້ເຂົ້າເຖິງການບໍລິການຂອງພາກລັດທີ່ໄດ້ລວມສູນບັນດາໜ້າວຽກ ຈາກຂະແໜງການຕ່າງໆ ຢູ່ພາຍໃນເມືອງ ລົງສູ່ຕາແສງ ແລະ ທັງເປັນການຍົກສູງທາງດ້ານການເຮັດວຽກໃຫ້ມີຄຸນນະພາບ, ມີຄວາມເຊື່ອໝັ້ນ, ສະດວກ, ວ່ອງໄວ, ໂປ່ງໃສ, ຍຸຕິທຳ, ຮັບປະກັນໃຫ້ຂອບເຂດພື້ນທີ່ດັ່ງກ່າວ ໄດ້ຮັບການພັດທະນາພື້ນຖານໂຄງລ່າງ, ການຄ້າ, ການບໍລິການ ແລະ ວຽກງານກະສິກຳ ເພື່ອເປັນການຮອງຮັບການຂະຫຍາຍຕົວຂອງພົນລະເມືອງ ໃນອະນາຄົດ.

ຂ່າວໂດຍ: ວົງສະຫວັນ ສຸທິໂວຫານ