ເປັນກຽດເຂົ້າຮ່ວມມີ ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ, ທ່ານ ຈັນພິພັກ ກອງຈຳປາ ເຈົ້າເມືອງໆສິງ, ມີພາກສ່ວນກ່ຽວຂ້ອງ ຕະຫຼອດຮອດພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມເຂົ້າຮ່ວມ.
ໃນພິທີ່, ທ່ານ ນາງ ຫຼ້າມອນ ອ່ອນແສງສີ ຫົວໜ້າຫ້ອງການແຮງງານ ແລະ ສະຫວັດດີການສັງຄົມ ໄດ້ລາຍງານຜົນກະທົບຈາກພະຍຸເຂດຮ້ອນ ຢາກິ ທີ່ໄດ້ພັດຜ່ານເຂົ້າເມືອງສິງ ວັນທີ 8-11/9/2024 ໄດ້ເກີດມີຝົນຕົກໜັກຕິດຕໍ່ກັນຫຼາຍວັນ ເຮັດໃຫ້ປະຊາຊົນຊາວເມືອງສິງໄດ້ຮັບຜົນກະທົບຈາກພະຍຸເຂດຮ້ອນ ຢາກິ ມີ 7 ບ້ານຄື: ບ້ານຈອມ, ນາໃໝ່, ຈຽງມູນ, ໜອງຄຳ, ນໍ້າແກ້ວຫຼວງ, ສີລີເຮືອງ ແລະ ບ້ານທົງຍົນ ເຮືອນຊານຖືກນໍ້າຖ້ວມເນື້ອທີ່ນາ, ສວນອ້ອຍ, ໜອງປາ, ຕົ້ນຢາງພາລາ, ດິນເຈື່ອນທັບຖົມເສັ້ນທາງເປ່ເພຫຼາຍຈຸດ ເຮັດໃຫ້ການສັນຈອນໄປ-ມາຖືກຕັດຂາດ 6 ວັນ, ໄຟຟ້າ 7 ວັນ, ນ້ຳປະປາໃຊ້ 10 ວັນ, ເຄື່ອງໃຊ້ຄົວເຮືອນເສຍຫາຍ ແລະ ສັນຍານໂທລະສັບຕິດຂັດເຮັດໃຫ້ການພົວພັນປະສານງານພົບຄວາມຫຍຸ້ງຍາກ.
ຄອບຄົວທີ່ຖືກຜົນກະທົບທັງໝົດ 208 ຄອບຄົວ, ມີ 1.063 ຄົນ, ຍິງ 527 ຄົນ, ເຂົ້າເປືອກເສຍຫາ 10,650 ກິໂລ, ເຂົ້າສານ 5,050 ກິໂລ, ພາຫະນະເປ່ເພ 182 ຄັນ, ເຄື່ອງໃຊ້ຄົວເຮືອນ (ຕູ້ໂຊ, ຕູ້ເຢັນ, ເຄື່ອງຈັກ 117 ເຄື່ອງ ແລະ ເຄື່ອງນຸ່ງຫົ່ມອີກຈຳນວນໜຶ່ງ), ກຸ່ມຊຽງແຂງ ໄດ້ຮັບຜົນກະທົບມີ 3 ບ້ານ ມີ 4 ຄອບຄົວ ເຮືອນຊານປະຊາຊົນໄດ້ຮັບຜົນກະທົບແມ່ນຫຼັງຄາເຮືອນເປີດອອກ ຢູ່ບ້ານໂລກູ 1 ຫຼັງຄາ, ບ້ານ ຜາແດງ 1 ຫຼັງຄາ, ບ້ານ ກໍເພນ 2 ຫຼັງຄາ, ຜົນເສຍຫາຍລວມ ມີສັງກະສີ 134 ແຜ່ນ, ສະເລ່ຍຜົນເສຍຫາຍ 13,700,000 ກີບ ແລະ ທະຫານກອງຮ້ອຍຜະລິດ 132 ຖືກນໍ້າຖ້ວມ ຫໍພັກພະນັກງານ ນໍ້າພັດໜີ 1 ຫຼັງຄາ ເປ່ເພ 2 ຫຼັງຄາ, ເຮືອນຄົວ 4 ຫຼັງຄາ ມູນຄ່າເສຍຫາຍ 85,000,000 ກີບ.
ເຄື່ອງອຸປະໂພກທີ່ນໍາມາມອບໃນຄັ້ງນີ້, ມີເຂົ້າສານ, ນໍ້າດື່ມ, ນໍ້າມັນພືດ ແລະ ເຄື່ອງໃຊ້ໃນຄົວເຮືອນຈໍານວນໜຶ່ງ ແລະ ອື່ນໆ. ພ້ອມດຽວກັນນີ້, ຫົວໜ້າພະແນກສຶກສາ ແລະ ກິລາ ແຂວງຫຼວງນໍ້າທາ ຍັງໄດ້ນໍາເອົາ ສັງກະສີ 100 ແຜ່ນມອບໃຫ້ບ້ານ ເພື່ອໄປສ້ອມແປງໂຮງຮຽນຕື່ມອີກ.
ຕອນທ້າຍພິທີ ທ່ານ ເຈົ້າແຂວງຫຼວງນໍ້າທາ ໄດ້ໂອ້ລົມພໍ່ແມ່ປະຊາຊົນ ແລະ ອົງການປົກຄອງບ້ານ ຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມ ກ່ອນອື່ນທ່ານ ໄດ້ສະແດງຄວາມເປັນຫ່ວງໄຍພໍ່ແມ່ປະຊາຊົນ ຈາກໄພນ້ຳຖ້ວມໃນຄັ້ງນີ້, ແມ່ນໜັກກວ່າທຸກໆຄັ້ງທີ່ຜ່ານມາ. ແຕ່ພໍ່ແມ່ປະຊາຊົນກໍສາມາດຜ່ານຜ່າໄດ້ ແລະ ກໍດີໃຈນໍາພໍ່ແມ່ປະຊາຊົນ ບໍ່ມີຜູ້ໃດໄດ້ຮັບບາດເຈັບ, ເປັນແນວໃດກະໃຫ້ພໍ່ແມ່ປະຊາຊົນ ສ້າງເສດຖະກິດ ໃຫ້ຄອບຄົວມີຢູ່ມີກິນ ແລະ ຮັ່ງມີຂຶ້ນໄປເລື້ອຍໆ.
(ຂ່າວ: ແສງອາລຸນ)
ຄໍາເຫັນ